Introduccion

E centro di partido AVP, mihor conoci den boca di pueblo como “Cas di Partido”, tin un historia largo. Situa na avenida Alo Tromp 56, e cas aki den diferente etapa di su existencia a sirbi pueblo, en particular pueblo di playa pabou.

Antonio Ridderstap

top

E cas cu awe ta fungi como Cas di Partido AVP, ta debe su existencia na Antonio Ridderstap (naci na 1890) ora cu e y su casa a cuminsa cu nan famia. Den pueblo, Antonio tawata conosi bou di e nomber “Buchi Pieri” y pa su famia “Tata Pieri”. E fecha exacto cu e cas a wordo construi no ta mucho cla, pero segun decendientenan di Antonio, e mester a wordo construi rond di 1910. Den e cas aki, Antonio, hunto cu su casa Rosa Ridderstap-Dirksz, a lanta 4 yiu: Angelica, Toribio, Lobo y Jose Ridderstap. Antonio su ofishi tabata piscado y consecuentemente, su cas tabata e centro pa e pueblo bin busca su pisca. Banda di tabata un lugar pa cumpra pisca, e cas di Antonio tambe tabata tin di un “Shap” banda pa nord.

E “Shap”

top

E cas di Antonio, tabata tin, “shap” parti patras. Den “shap” aki tabata drecha “Taray” (net di pisca) y bela di boto. Tambe e “shap” tabata tin un carpinteria cu a keda existi pa basta aña. Den e “Shap” aki difunto Frank Tromp y Toy Hoek a traha pa añanan largo. Despues, Hilario (Lachi) Reyes a sigui cu e “Shap”.

Vecindario

top

E cas di Buchi Pieri su vecindario tabata hopi diferente for di loke e ta awe. E parti patras y pa’riba, tabata tin menos cas, pero e diferencia remarcabel ta e bista banda padilanti y pabou di dje. E cas tabata hopi cerca di lama. Awa di lama no tabata mas cu 15 pa 20 meter leu for di porta di e cas. Esey kiermen cu e botonan di piscado no tabata mara mucho leu.

Band’i pabou di e cas, tabata tin saliña grandi, caminda cu salo tabata wordo produci. E lama tabata drenta den e saliña, pero no tabata por a sali y consecuentemente e solo tabata evapora e awa lagando e salo atras.

Mas despues, den añanan 40 pa 50,e tereno dilanti di e cas, for di bushalte y D.O.W. te pabou di caminda awe tin e pomp di gasolin, a wordo gedempel pa construccion. Den temporada di yobida, prome cu e dempelmento, awa tin biaha tabata yega dilanti di porta di e cas.
Rosa a fayece
Den e historia di e cas a bini un cambio drastico na 1947, ora cu Rosa, casa di Antonio, a fayece. E tabata un sla grandi pa henter famia, pero mas ainda pa Antonio. Durante e periodo aki e cas a conoce algun cambio grandi. Den e temponan aki, e “Shap” tambe a conoce cambionan grandi den meta y tambe doño. Despues di fayecimento di Rosa, Antonio a keda su so den e cas, pero despues un sobrino a compañ’e pa bastante aña largo.

Antonio a fayece

top

Despues cu su casa a fayece, Buchi Pieri a keda traha pa añanan largo piscando manera semper e la haci. E la traha duro manera semper tabata su custumber. Su ultimo añanan di bida, den su ochentanan caba, Antonio a cuminsa sufri quebrantenan di salud debi na su edad. Verkalking tawata un sla duro pa un homber cu tabata custumbra di traha duro pa añanan largo. Na aña 1974, Antonio a hala su ultimo rosea.

Den busca di un Centro pa Partido

top

Despues cu Antonio a fayece, e yiunan a cuminsa pensa kico pa haci cu e cas. E di dos yiu di Antonio y Rosa, Toribio a wordo duna e opcion pa cumpra e cas. Pero esun cu a cumpra e cas finalmente tabata e prome yiu di Toribio, esta Imelda Ridderstap. Den e mesun periodo, Henny Eman, cu despues lo bira e lider di partido AVP, tabata buscando un cas pa fungi como un centro pa partido. Ruman di Imelda, Maria Ridderstap, tabata un militante di partido pa hopi aña caba. Awe, Maria ta mihor conoci como e secretaria di Cas di Partido na Playa y cu hopi orguyo e ta haciendo e trabou aki pa hopi aña caba.
Henny, despues di a busca pa hopi tempo pa un cas pa partido, a aserca Maria pa puntra tocante di e cas di su ruman. E la bisa Maria: “Bo ta lagami ta busca un cas anto bo tin un cas.” E contesta di Maria tabata ta: “E cas no ta dimi, si no di mi ruman, pero si bo kier mi lo haci tur loke mi por pa partido por haña e cas.”

Maria a cuminsa cu e proceso

top

Despues di e conbersacion cu Henny, Maria consulta cu su mayornan. Segun Maria, loke a resalta den e conbersacion aki ta e aprecio cu su mayornan tabata tin pa Henny y su famia. Despues di e conseho di su mayornan, Maria a papia cu su ruman, kende mesora a bay di acuerdo. No mucho despues, Partido a cuminsa huur e cas y asina Cas di Partido su existencia a inicia na aña 1982. Atrobe e cas di Antonio a bira un centro di encuentro pa pueblo. E biaha aki, no pa cumpra pisca, si no pa yuda Aruba y partido drenta un era nobo.

Cas di Partido a bira di AVP

top

Na aña 1992 Henny a bolbe aserca Maria tocante di e cas. E biaha aki e peticion tabata ta pa partido cumpra e cas. Maria a conbersa cu su ruman y e stimacion pa partido y famia Eman a resalta un biaha mas y e compra a wordo aproba.
Palabranan di Maria dilanti di Conseho di Partido na reapertura di Cas di Partido ta bisa hopi, “Awe ta un orguyo pa Imelda, henter mi famia y mi mes pa mira con partido a logra conserva e cas aki cu ta yen di recuerdo pa’mi y mi famia. Recuerdonan di mi famia, como tambe recuerdonan di partido.”

Restauracion di Cas di Partido

top

Cas di Partido a conoce un restauracion amplio den añanan 90. E meta tabata ta pa amplia e cas y adapta su facilidadnan pa por fungi cu mas eficiencia pa partido. Pero semper a keda den mente e intencion pa mantene e architectura y esencia di e cas. E architecto cu a diseña e restauracion di Cas di Partido, tabata Sr. Profeet. E motor tras di e restauracion tabata e lider di e partido den e periodo ey, Dr. Lic. Tico Croes.

E meta primordial di Cas di Partido ta pa duna asistencia na ciudadanonan cu mester di conseho y yudansa pa nan problemanan. Na Cas di Partido, lider di partido, hunto cu un cantidad di voluntarionan den servicio di partido, ta duna ayudo y conseho na ciudadanonan den entre otro peticionnan na gobierno, consehonan cu ta regarda impuesto, huurmento y financiamento di compra di cas.