E Cuminsamento

Partido AVP a haya su nomber na 1942, tempo cu el a keda funda, pero mucho prome cu esey, mas o menos desde 1920, tabatin un movecion na Aruba cu tabata wordo dirigi pa Henny Eman (1887-1957), kende tabata mira cu Aruba no tabatin voz den Kolonie Curacao.


Henny Eman, e homber bisti na blanco cu dashi ta bula den biento, skerpi y chistoso tabata grita pa separacion, los for di Corsou. Su voz fuerte a bira e voz di Aruba y na mes momento e tabata tuma pasonan dificil pa por a alcansa e anhelo di Aruba. E tabata mustra e pueblo cu ta pueblo mes tin e derecho fundamental di dicidi riba su propio destino, usando e lema famoso "Vox populi, Vox Dei".
Henny Eman ta e persona cu a encamina cu pasonan sigur un caminda largo y tramposo pa por a logra un cambio estatal pa Aruba, los for di Corsou como miembro di Reino Hulandes. Su lucha y esun di otronan no tabata envano, nan gritonan tabata resona y a alcansa Hulanda. Na 1942 Reina Wilhelmina, kende tabata na Inglatera pa motibo di e Segundo Guera Mundial, a manda un mensahe grandi y impactante pa Aruba: despues di guera Hulanda lo introduci cambionan estatal pa su colonianan cu lo bira partner igual den Reino.
E mensahe aki a inspira Henny Eman pa tuma accion inmediato y asina e organisacion politico AVP a haya su nomber.

E causa

E causa, e lucha pa ta baas den nos propio cas, tabata e motibo pakico partido AVP a keda funda.
E lucha aki a haya su raisnan den comienso di siglo pasa ora cu e tata di Henny Eman, Sr.Cornelis "Cornes" Eman a sali dilanti como e pionero di Aruba, bringando pa e cambionan necesario worde tuma na fabor di Aruba y su hendenan. E tabata condena severamente e yugo di opresion estatal. Su empeñonan y inspiracionnan grandi a stimula otronan, su yiunan y nietonan, pa sigui cu e lucha cu el a inicia. E candela cu el a cende a keda kima pa decadanan largo. Esnan cu a sigui su ehempelnan a sigui boga pa Aruba sali for di e sistema colonial y e grito pa "separacion" a cuminsa worde tendi for di tur skina na Aruba. Entre esnan cu tabata grita pa separacion tabata e yiu homber di Cornes Eman, Henny Eman. Den temponan dificil, ora cu nos no tabatin e infrastructura cu nos tin awe, e tabata motiva Arubianonan pa continua cu e lucha cu su tata a inicia. E lucha a cuminsa haya forma fiho y politicamente a cuminsa traha pa trece cambionan.
Despues cu Henny Eman a retira for di politica su yiu homber a sigui cu e lucha. Asina a bin sosode cu na e Ronde Tafel Conferentie dia 18 di maart 1948 e ta entrega un mocion den nomber di Aruba pa pidi un "afzonderlijke status" - Status Aparte - pa Aruba den Reino. E mocion a keda acepta pa e lidernan di e delegacionnan di Hulanda, Surnam y Corsou.

(documentacion : "Status Aparte, e causa grandi di siglo 20")


E nificacion di e logo di partido AVP

For di un principio partido AVP a usa e color berde den su bandera y logo. Berde, mescos cu e anker den e logo di AVP ta simbolisa " Speransa ". Speransa pa un miho Aruba, un miho mañan, los for di Corsou pero cu lasonan estrecho cu Hulanda. E letter "S" den e logo ta di e palabra "Separacion". E isla Aruba den e logo ta papia pa su mes: nos baranca stima, los for di e yugo di opresion estatal.
E logo a wordo diseña pa Sra. Ina Eman-Lampe.		Josephina (Ina) Sofia Eman-Lampe

Partido AVP awe. Den un milenio nobo.

Partido di pueblo Arubano AVP a pasa den hopi turbulencia durante su añanan di existencia. Tabatin temponan bon, di gloria y di logronan, pero tambe temponan malo, temponan di berans. Partido PPA a sali for di partido AVP, mescos ta e caso tambe cu partido MEP. Ambos biaha cu politiconan di partido AVP a bandona e fila di e partido berde, esaki tabatin como consecuencia cu e partido a bai considerablemente atras den voto. Na 1977 AVP a pasa den temponan sumamente dificil, caminda un man yen di hendenan leal so a keda fiel na e partido. E partido e aña ey no a saca ningun asiento. Despues di e periodo aki poco poco partido AVP a cuminsa sali for di e situacion dramatico cu e tabata aden y a cuminsa haya su votadornan bek. Esaki sigur danki na e perseverancia y sabiduria sin precedente di e yiu di Shon A y nieto di Henny Eman sr., cu despues a bira e prome Minister President di pais Aruba. Henny Eman, mescos cu su abuelo y tata, ta un persona di visionnan y innovacionnan grandi. E candela ferviente cu a worde cendi dor di generacionnan prome cun'e a sigui kima ardiente den e curason di e politico hoben.

El a saca awa for di piedra y trahando incansablemente el a sa di trece e partido bek den su temponan di gloria. Esaki cu e respaldo di hendenan cu a kere fielmente den dje. Pa por a logra haya e votadornan bek, partido AVP a haci uso di diferente lemanan manera "Ban cas bek", “Un cambio pa miho", "Cambio, awor si !", "AVP, nos amigo" y tambe jinglenan cu ritmonan impactante. Tur esaki, e organisacion tremendo di e partido y tambe e programanan di AVP a duna resultado positivo y AVP a recobra confiansa total y un biaha mas, mescos cu antes, AVP a bira e partido mas grandi di Aruba den eleccionnan di 1994 y 1997.
Na final di añanan 90, Henny Eman a retira como lider di Partido AVP y tambe anunciando su retiro como politico. E lider cu a sigui tabata tin un trayectoria largo den Partido AVP y a fungi como parlamentario, Ministro di Economia, di Turismo y tambe di Finansas, Dr. Robertico “Tico” Croes. Aunke cu e resultado di eleccion 2001, no tabata loke a spera, Dr. Tico Croes a sa di pone su impresion ariba e Partido.

Despues di eleccion 2001, Dr. Tico Croes a entrega su retiro como lider di Partido y despues a drenta e mundo di enseñansa universitario den exterior. Ora cu e bashi aki a surgi, conseho di Partido AVP a apunta un grupo pa lidera e Partido te ora cu un congreso nobo apunta un lider nobo. E grupo aki a wordo lidera pa mr. Michiel Godfried Eman, miho conoci den pueblo simplemente como “Mike”. Den e periodo aki, AVP a mustra un di su cualidadnan mas impresionante, esta esun di introspeccion. Bou di e lema, “Scucha, Pensa y Trece Cambio”, Partido a traha duro pa lanta bek tur e confianza den AVP.

Durante congreso 2003, a tene eleccion di un lider nobo pa Partido. Cu un resultado impresionante, miembrecia di Partido a eligi mr. Michiel Godfried (Mike) Eman, , como lider di Partido.

Na 2005 tur e esfuerzonan, introspeccion y dynamismo nobo den partido a duna nan fruto. AVP a sa di haña e confiansa di pueblo un biaha mas. E resultado positivo por tawata inespera pa hopi opositornan, pero no pa e militancia y miembronan di AVP. Nan, hunto cu lider di partido a restructura e partido pa asina e partido no ta simplemente un grupo di hende cu kier algo, pero un forum di hende cu ta pensa y traha pa progreso di un causa. E casua aki ta Aruba.

E aña (2006) aki partido AVP ta celebra su di 64 aña di existencia. E ta e partido mas bieu di Aruba.

top