Duna vision politico y desaroyo di plannan di maneho un fundamento scientifico y profesional ta e proposito di e reunionnan cu e lider di AVP, mr. Mike Eman ta teniendo e dianan aki na capital di Estados Unidos, Washington D.C. Despues di e bishita na Aruba y dialoga cu representante di Wetenschappelijk Inistituut di CDA algun dia pasa riba elaboracion di cooperacion entre WI di CDA y FESCA di AVP, mr Mike Eman awor ta trahando riba un cooperacion similar cu e mundo academico y professional na Washington D.C.

Pa nos renova politica na Aruba y trece riba un plano mas halto cu resultado real pa pueblo y Aruba, cooperacion cu paisnan, institutonan, academiconan y profesionalnan cu tin como nan expertisio, duna vision politico y maneho un fundamento scientico, ta esencial, e lider di AVP, mr. Mike Eman ta splica. Den e cuadra aki Eman a reuni e siman aki cu profesornan na George Washington University (GWU) den sciencia Politico, Social y Humano. Esaki riba un cooperacion den desaroyo di visionnan politico y ariba iniciativanan pa seminario y conferencia pa stimula participacion profesional na Aruba. Eman a haci tambe un bishita serca e Embahador di Hulanda na Estados Unidos, Christiaan M. J. Kröner. Durante e encuentro aki na Embahada di Hulanda na Washington D.C. a intercambia di pensamento cu Embahador Kröner riba desaroyo geo politico y Aruba y Reino su posicion den esaki. “Nos ta biba den un region cu retonan special y tension creciente entre diferente forzanan grandi den mundo. Pa Reino e ta keda continuamente un reto pa fiha un posicion y linea di maneho di relacionnan internacional cu ta cudra cu nos principionan di Democracia y Estado di Derecho y alavez mantene mihor contacto posibel cu paisnan den region cu ta pasando den fase di turbulencia y cambio politico grandi. Nos posicion y rol den esaki mester ta motibo pa tene bon contacto cu autoridadnan y diplomaticonan di Reino, e lider di AVP, mr. Mike Eman a splica como rason di su encuentro cu Embahador di Hulanda, Christiaan Kröner.

Eman tabata hopi satisfecho cu e encuentro cu Embahador y e forma cordial y habri cu por a reflexiona riba e maneho di relacionnan exterior di Reino y e factornan di influencia riba Aruba. Pa locual ta su programa di bishita na George Washington University, Mr. Mike Eman ta splica cu e profesionalisacion di vision politico ta na encargo di FESCA y profesionalisacion di e kader poltico ta tarea di Fundacion Formacion Politico Digna Lacle.

 “Pa ambos instituto nos ta stimulando cooperacion internacional”, Eman ta bisa. Na George Washington University, Eman su reunionnan principal ta cu Profesor Amitai Etzioni, Director di e Instituto pa Estudionan di Comunitarismo Strategico y otro profesor di GWU, e Director pa Latino America di e facultad Graduate School of Politcal Mangagement, Roberto Izurieta. Mr. Mike Eman ta mira e encuentronan aki como esencial den establece e cooperacion pa profesionalisacion di politica y maneho na Aruba.