E ta conoci internacionalmente como e tata di e pensamento communitarista moderno . E ta worde reconoci den e categoria di e 100 pensadornan mas grandi den mundo. A ricibi un cantidad grandi di premio, nominacion y reconocimento pa su bukinan y publicacionnan y su aporte na crea un mihor calidad di bida pa humanidad. Ta trata aki di Profesor Amitai Etzioni actualmente Profesor y Director di e facultad di Sciencia Politico na George Washington University. E ta tambe fundador di “The Communitarian Network”.

Durante su programa na Washington D.C. e lider di AVP, mr. Mike Eman a sostene un reunion importante cu Prof. Etzioni. “Topico di e reunion ta nos interes pa profundisa mas den e filosofia communitarista y pone e tema aki riba mesa como un fuente di pensamento for di cual nos por haya inspiracion pa un linea politico y di maneho cu un enfoque mas humanitarista, cu ta pone norma y valornan central, cu ta enfoca riba reinforza e nuclio familiar y relacionnan di amistad, sentimiento di solidaridad y convivencia den comunidad”, e lider di AVP, mr. Mike Eman a splica.
“Hopi di e problemanan cu nos ta mira na Aruba tin di haber cu e deteoro den relacionnan familiar y den comunidad. Pa drecha esakinan mester tin un maneho dirigi riba fortalece e valornan aki, reinforza e fibranan cu ta mara un sociedad hunto”, Eman ta expresa. Profesor Etzioni a plantea ideanan, reconoci internacionalmente, con cu maneho, ehempel y liderasgo inspirativo por logra hustamente e mihor sociedad aki. Etzioni den su publicacionnan ta mustra cu nos tin derecho individual, pero nos tin un responsabildad social tambe pa cu nos prohimo, nos pais, nos futuro. Logra e bon comun ta un responsabildad comparti. Nos no mester biba cu e pensamento di “ami”, pero di “nos”.
Homber, muher y muchanan ta miembro di hopi comunidad: famia, barrio, un cantidad grandi di nuclionan social, religioso, etnico, di trabao y asosiacionnan professional y di un pueblo completo. Existencia humano y tampoco libertad individual por worde sosteni pa un tempo largo pafor di e comunidadnan interdependiente y interrelata na cual nos tur ta pertenece. Ningun comunidad tampoco por sobrebibi pa largo si su miembronan no dedica parti di nan atencion, energia y recurso na projectonan y causanan comun. Un comunidad cu worde trata husto di parti di estado lo responde riba e yamada pa pone su schouder bao di metanan comun.

Mr. Mike Eman despues di su reunion cu Prof. Etzioni, a bisa: “di momento cu Aruba haya un gobierno nobo nos por crea e espirito pa union humanitario. Aruba tin mester di e comienso nobo aki. Nos kier inspira nos comunidad pa tene speransa. Cu tin lider nobo cu vision nobo pa nos pais. Un vision nobo cu ta worde delinea a base di profesionalismo, un vision nobo cu lo worde ehecuta cu e espirito comunitario di union, convivencia y solidaridad di uno pa otro y di nos tur pa nos comunidad, nos pais y nos futuro”.
“Pesey mi ta contento cu nos por inicia e proceso aki cu inspiracion academico y profesional di un persona di taya di Prof. Amitai Etzioni. Ya pa nos Instituto Scientifico FESCA e filosofia comunitarista di Prof. Etzioni ta un punto di referencia importante pa e estudionan cu ta worde haci pa maneho di Aruba den futuro”, mr. Mike Eman a enfatisa. Hopi importante Eman ta considera tambe e Conferencia cu e fundacionnan FESCA y Digna Lacle lo organisa riba e tema “Comunitarismo”. Pa esaki Profesor Amitai Etzioni a worde invita y tambe profesornan Carlos Diaz y Jose Perez Adan cu a sigui den pasonan di Etzioni y a scirbi hopi publicacion importante riba e materia di comunitarismo y e “buen comun” cu nos mester pone nos schouder bao di dje.
E lider di AVP, mr. Mike Eman a regala Prof. Etzioni un buki di Aruba y e Profesor na su turno a regala Eman diferente di su reciente bukinan. Entre cual ta resalta: “The New Golden Rule, Community and Morality in a Democratic Society”, “The common Good” y un memoir “My Brothers Keeper”.