Diamars anochi ultimo a tuma lugar den Cas di Partido AVP un anochi di lectura interesante cu e tema “ Vakvereisten voor Politiek en Beleid”.  

E exigencianan profesional pa politica y maneho tabata tema central di e lectura aki cu tabatin un audiencia completo y tabata dirigi pa sr. Rene Herde. E anochi aki ta worde organisa dor di Fundacion Estudionan Social Cristian Aruba (FESCA) y Fundacion Formacion Politico Digna Lacle-Herrera.

E promer presentacion a keda duna pa drs. Paul Croes cu ta secretario di Fundacion Formacion Politico Digna Lacle-Herrera a duna un lectura riba e valor agrega di un instituto di formacion pa un partido politico. Durante su presentacion sr. Croes a elabora riba e hecho cu pa tur ramo di trabou, exigencianan ta wordo poni pa por eherce un tipo di funcion. “Pa tur trabou nan ta exigibo un cierto grado di estudio of backround, dicon pa un politico no? Solamente pa un funcion politico, esta como Minister of Parlamentario e exigencianan aki no ta existi. Alabes Paul a mustra riba e peliger cu esaki por tin pa nos futuro generacion. Enfasis a ser poni riba e punto cu tur partido politico aki na Aruba mester sigui e ehempel pa tin un instituto di formacion y estudio pa manejo riba termino largo y responsabel. Drs. Paul Croes tambe a invita tur esnan presente pa e sigiuente curso introductorio riba derecho constitucional y gubernamental (staats- en bestuursrecht ) cu lo start medio luna di mei y lo termina fin di juni. Tur hende ta keda cordialmente invita pa participa na e cursona informativo aki.

E Presidente di Fundacion Formación Politico Digna Lacle Herrera y alavez vice-presidente di FESCA, mr. Luciano Milliard tabata e segundo discursante y a mustra riba e importancia cu un instituto cientifico como instituto di estudio y di conseho profesional pa un partido politico. “Pa futuro di Aruba ta importante pa maneho gubernamental di nos pais y e proceso di legislacion worde asesora pa profesionalnan y sosteni cu estudionan cu ta duna un base mas solido na e maneho y vision politico cu un partido politico ta presenta.” Mr. Luciano Milliard a elabora riba e nececidad aki y con FESCA ta poniendo esaki den practica.

Invitado special di exterior pa e anochi di lectura aki tabata ex miembro di Tweede Kamer, Klaas Tuinstra, experto riba tereno di presupuesto y maneho di finanzas publico, actualmente consehero di e instituto cientifico di CDA, (WI).

Sr. Tuinstra su  lectura lo repasa e experiencia cu Hulanda y specificamente CDA tin cu asesoramento profesional y scientifico cu nan instituto scientifico Alabes Sr. Tuinstra a mustra riba e situacion actual y futuro di Aruba, y pone enfasis riba con importante ta pa mira y studia pa futuro. “Nos ta cla pa acapara tur e retonan cu ta para nos dilanti? Hopi di situacionnan cu nos ta mirando sosediendo na Aruba a sosode caba na Hulanda. E experiencianan aki mester ta un les pa nos aki na Aruba”. Topiconan manera e cantidad di personanan cu durante e sigiuente anjanan lo ta biniendo Aruba pa establece nan mes. Y si nos sistema ta cla pa cu e desaroyo aki. Alabes cifranan financiero di nos situacion na Aruba a keda mustra.

Tambe Sr. Tuinstra a repasa e estudionan cu e a compromete su sosten na dje cu AVP y FESCA lo bai haci riba tereno di maneho di crecemento economico, un finanzas publico responsabel, un maneho social dirigi riba e nucleo familiar, formacion di hobennan, un maneho di inversion den infrastructura y ordenamento y proteccion debido di medio ambiente (milieu bescherming en ruimtelijke ordenning).

Despues di e presentacionan tabatin oportunidad pa e publico presnte hasi pregunta na e presentadornan. Fundacion Formacion Politico Digna Lacle Herrera y FESCA ta gradici tur esnan cu a asisti na e evento y kier siguramente sigui cu tipo di initiativanan asina.