“Aruba ta bibando momentonan critico di deteoro di nos pais causa pa decadencia den dirigentenan di Gabinete Oduber”. Asina e lider di AVP, mr. Mike Eman a reacciona riba e hecho cu Minister di Salubridad Publico, Booshi Wever a yama tres medico specialista personalmente y intimida nan pa motibo cu nan a duna sosten den corte na e medico specialista dr. Jaime Lopez Dorado cu Minister Booshi Wever kier saca di Aruba. Eman ta bisa cu e sosedido aki ta sumamente condenabel y un refleho di un deteoro total cu Gabinete Oduber ta causando nos pais.

“Cu practica di tirania kier silencia e voznan di protesta contra di persecusion di ciudadanonan, profesionalnan y inversionistanan den nos pais. Cu practica di tirania kier tapa e gritonan di dolor saliendo for di un comunidad perdiendo su poder di compra y un pueblo bibando tur dia mas y mas den pobresa na man di medidanan imponi pa sigui paga pa e fiesta di amigo y familiarnan di Gabinete Oduber. Cu practica di tirania ta intimida tur instituto cu ta alerta pa e debacle social-financiero cu Gabinete Oduber ta causando cu un maneho di deroche di placa. Cu practica di tirania ta purba para tur investigacion di actonan di violacion di ley, corrupcion y fraude di miembronan di Gabinete Oduber. Cu practica di tirania ta corta e derecho di prensa liber y derecho liber di expresion pa e clamor pa husticia, norma y valornan den nos pais no worde scucha”.
Esaki ta e realidad doloroso di e Aruba despues di cinco anja di deteoro y teror di Gabinete Oduber, e lider di AVP, mr. Mike Eman a expresa. Locual Gabinete Oduber kier haci cu su practica di tirania ta tapa y sconde e realidad di Aruba awe. E peso di costo di bida y medidanan ta causa di un pobresa preocupante y creciente. Calidad di bida y union famiar ta deteriorando, poniendo hopi famia den situacionnan hopi doloroso. Falta di orientacion, orarionan dificil y dianan di trabao largo pa mayornan, droga y alcohol ta menasa nos hubentud. Ausencia di un maneho di integracion a crea division y intolerancia. Disperdicio di fondonan publico ta carga nos isla cu debe y ta menasa nos economia y stabilidad di nos florin. E preocupacion ta general; di oposicion pa Banco Central. E gritonan ta bini di tur skina; e situacion ta urgente. Cu bista por mira e deteoro fysico; cu pena ta constata e deteorio imaterial.

Eman ta bisa cu ausencia di vision y autoridad moral serca gobernantenan ta laga nos isla manera un barco sin un rumbo fijo. Cu tirania y intransigencia gubermental ta causando polarisacion y ta kibra e fibranan di cohesion y union den nos sociedad. E lider di AVP ta mira y scucha e dolor tur caminda; di nos grandinan pa nos jiunan.
Eman ta haci un apelacion riba sociedad civico pa responde cu firmesa, no dobla bao di menasa, no accepta degeneracion di nos pais pa salvaguardia otro interesnan. Nos tin cu responde na e momento aki mescos cu nos antesesornan a responde riba nan momentonan di reto of nos destino lo worde determina pa circumstancianan negativo cu ya ta vislumbrando den cada faceta di nos bida y den e estado di nos pais.
E lider di oposicion ta mustra cu e momento di cambio a inicia cu un pueblo cu na diferente ocasión a lanta para, marcha, demonsta y bai baricada pa husticia social y gobernacion drechi. E momento di culminacion di e deseo di cambio aki ta den nos man conhuntamente. E lider di AVP, mr. Mike Eman ta bisa cu lo no tin cambio sin sacrificio. “Nos lo mester para firme. Nos lo mester bringa duro. E ehempelnan di curashi a worde demonsta anja pasa ora nos a bai baricada. Nos mester ta e pioneronan nobo pa un etapa nobo di progreso. Tin un potencial grandi di energia, talento y bon voluntad den nos pais. E potencial aki mester worde inspira. Pueblo mester mira e avenida cu lo conduci na su derecho y oportunidadnan nobo, pero igualmente na su obligacionnan y responsabilidad”. “Den tur nos tristesa, desapunto y dolor ta scondi e fuente di nos forza y determinacion pa trece cambio. E murayanan di tirania no por stroba esey. E murayanan aki a worde derumba den historia, e baricadanan aki a worde supera dor di hopi pueblo den otro parti di mundo cu a bringa contra tirania, inhusticia, pobresa y discriminacion. E ta den nos curason y alma, cu guia di nos Creador, pa haci mescos na Aruba e lider di AVP, mr. Mike Eman ta convenci. Nos tey, te na e ultimo sacrificio, pa para pa nos pueblo y pais, e lider di oposicion, mr. Mike Eman a enfatisa.