“Ideanan riba renovacion di waf di Playa den un waf mas moderno y atractivo pa “cruise tourism” y mudamento di containerhaven pa Barcadera mester ta parti di un plan integral pa e desaroyo di Aruba. E ta un “blueprint” cu ta existi awor pa hopi anja caba pa duna un empuhe na nos industria di turismo crusero y habri e oportunidad pa Aruba por bai tin un waf di container moderno den un area industrial cu mas esapcio, infrastructura y comercio di translade y zona liber. Hamas por accepta cu e “blueprint” aki, riba cual tin consensus nacional hopi anja caba, bira e capa pa desaroya na porta di waf 40 hectara cu mega malls, tienda, hotels, apartamento, casino y otro recreacion cu ta bai guli manera un canasta tur clientela cu ta bin cu crusero y kitanan tur practicamente di tur otro mall, tienda, restaurant cu tin actualmente den centro di ciudad. Esaki lo ta un atentado contra e bida comercial di tur mall existente y morto sigur di tiendanan, markthallen y kioskonan den “downtown” area di Aruba y den nos caya principal”, esaki lider di AVP, mr. Mike Eman a expresa en coneccion cu e noticianan cu ta saliendo di e mega-cruisemall plan di Namdar Group y Royal Caribbean. Mientras cu Ministerio Publico ta haciendo investigacion riba asunto di soborno di 1 miyon di Namdar Group pa MEP, e lider di oposicion a bisa cu e projecto riba su mes tambe ta trece interogatorio grandi.

Eman ta bisa cu Aruba tin actualmente un desaroyo grandi y inversionnan gigantesco cu a worde haci e ultimo 20 anja den un desaroyo di nos waterfront, industria hotelero y commercial den centro di ciudad. Esaki como parti di e Plan di Rescate di AVP cu a worde desaroya y ehecuta pa supera e crisis economico cu a bin cu seramento di Lago. Mr. Mike Eman ta mustra cu un parti grandi di e centronan comercial y comercio a bin ta orienta y depende mas y mas riba e turistanan crucero. E ta inventarisa e cantidad di mall, tienda, markthall, kiosko, restaurant y nightclubnan cu ta bai worde menasa pa e Namdar-Royal Caribbean Mega Plan.

E menasa ta pa: Port of Call Mall y su 21 tiendanan, Seaport Mall y su 40 establecimento comercial, Royal Plaza Mall y su 45 establecimento comercial; Havenstraat cu su 32 establecimento commercial; Caya Grandi cu ya ta sufriendo cu su 144 establecimento comercial; Shea Mall cu su 9 establecimentonan comercial; Aventura Mall cu su 9 establecimento comercial; Plaza Daniel Leo y su 8 establecimento comercial; Bay Side Mall y su 48 establecimento comercial; Renaissance Mall y su 57 establecimento comercial; Holland Mall y su 9 establecimento comercial; Wilhelminastraat y su 30 establecimento comercial y no mester lubida e 20 kiosknan na porta di waf y 17 markthal/kiosko na waf chiquito. En total nos ta papia di 15 centro comercial, cayanan principal, mas cu 400 tienda y mas cu 40 restaurant cu ta core peliger di conoce un caida grandi den nan negoshi cu un desaroyo asina dirigi riba comercio y “retail” den porta di waf manera contempla pa Namdar-Royal Caribben Group.

Eman ta bisa cu desaroyadornan por bisa cu nan lo kier yuda “downtown”, pero logica comercial ta bisabo cu si bo haci un inversion di 200 pa 300 miyon den porta di waf lo bo haci tur cos posibel pa haya cada dollar cu e turista crucero ta gasta pa saca bo inversion y haci ganashi. Hamas e enfoke di desaroyo di waf crucero mester bira 40 hectara di mega malls, hotels, casino y restaurantnan nobo pa competi cu esnan existente, pero e mester bira un waf moderno y atractivo cu un corridor cu ta garantisa fluo di turistnan crusero pa nos centro di ciudad, su cayanan y centronan comercial y sitionan historico, e lider di AVP, mr. Mike Eman ta accentua. Ya caba nos “downtown” na Playa y San Nicolas ta conociendo un deteoro grandi. Tanto desaroyo di competencia descontrola banda di hotelnan, negligencia di parti di gobierno pa inverti den infrastructura y pa garantisa seguridad for di adictonan cu ta cana kibra cos y menasa cliente a pone e centro di ciudad di Aruba na Playa y San Nicolas bai hopi atras. Eman ta bisa cu tin un expresion na ingles ta bisa: “Take a look at its downtown and you get an idea of where the community's headed”. Por midi na nos habilidad y deseo pa por revitalisa nos “downtown” areanan e capacidad cu nos tin como comunidad pa maneha cambio.

Centronan di ciudad fibrante y nucleonan di barrio bibo ta esencial pa e interrelacion social comunitario di un pueblo, Eman ta expresa. Pesey gobiernonan di AVP semper a duna prioridad na renova, construi y designa areanan publico y priva den centro ciudad y nuclionan di barrio pa promeve interaccion. Renovacion y revitalisacion di “downtown” Playa y San Nicolas den e gobiernonan di AVP continuamente tabata tin atencion. Mientrastanto cinco anja a pasa di negligencia di nos centronan di ciudad. Pesey nos di AVP a duna e revitalisacion di nos centronan di ciudad prioridad atrobe den Plan Aruba. Banda di esaki, Eman ta remarca relaciona cu e projecto contreversial di Namdar-Royal Caribbean, cu mester tin un discusion nacional na Aruba promer cu tuma decision riba tranferi propiedad di algo asina crucial manera bo waf pa tercer persona. Un cos ta partnernan strategico pa opera of accionista minoritario y otro cos ta pasa propiedad di e porta di bo cas (bo waf) pa tercer persona. Esaki ta algo hopi peligroso mes y mester mira e distinccion aki bon cla, e lider di oposicion ta expresa. Ta obvio cu gobierno no kier corta gasto den personal di gobierno pa cuminsa haci riba propio recurso e inversionnan (kapitaal investeringen) den nos infrastructura. Ta keda busca formulanan cu sea ta sali nos hopi mas placa (financial lease) of hasta kier bende propiedadnan strategico manera waf y edificionan historico y fundamental manera Bestuurskantoor pa sigui paga pa e maneho di desperdicio di placa cu tin Aruba su finanzas publico den ruina y pueblo y comercio ta paga tur dia na man di medida pa carga e peso cu no por carga mas.