Durante tres anja largo Presidente di Banco Central, Rob Henriquez a trata na hiba un maneho pa garantisa stabilidad monetario na Aruba. Den un forma profesional cu analyses, memorandum y reportahe riba e desaroyo monetario-financiero-economico di Aruba cu hopi prudencia continuamente a trata na alerta Gabinete Oduber cu no por sigui cu e maneho financiero cu nan ta hibando. Continuamente Banco Central bao presidencia di Sr. Rob Henriquez corectamente a alerta cu e forma con ta aumenta gastonan publico desproporcionalmente y coriendo cu deficitnan grandi lo tin concequencia pa e stabilidad monetario-financiero-econmico di Aruba y lo tin concecuencia pa e peso cu gobierno ta pone riba comunidad. Banco Central a alerta pa e fiamento pa financia deficit y pa medidanan pa tapa buraco den presupuesto. Apesar cu tur cifra tabata duna Banco Central razon cada biaha gobierno y Promer Minister Nel Oduber su reaccion riba conseho di Banco Central a bira mas hostil y menasante.
E punto “zero” a yega ora Presidente di Banco Central a bisa Promer Minister Oduber “Tanten cu mi t’ey e check pa saca 70 miyon for di reservanan di Banco Central lo no wordo firma”. Promer Minister Nel Oduber a laga sa cu e lo percura pa Presidente di Banco Central no keda largo mas. Y awe - e unico promesanan cu Promer Minister Oduber ta cumpli cunan ta esnan di persecusion politico - ta worde cumpli cune den e caso aki tambe. Promer Minister Nel Oduber ta core cu Presidente di Banco Central y no ta prolonga su contract, pasobra e a hiba un maneho segun ley, su consenshi y conforme e tarea di Banco Central.
E sosedido aki ta un peliger pa nos stabilidad monetario, Eman ta constata y ta considera e desaroyo como sumamente preocupante. Locual Gabinete Oduber kier ta haya un persona como Presidente cu lo laga gobierno haci y deshaci. Expertonan a afirma cu ningun gobierno a yega di saca placa for di e fondo di reserva di Banco Central, pasobra tin un acuerdo riba esaki. Gabinete Oduber ta cuestiona e acuerdo aki y kier pone man riba e reservanan. Eman ta bisa cu si Banco Central worde forza pa cumpli cu gobierno su exigencia, Banco Central lo mester saca e fondonan aki for di e reservanan cu ta para garantia pa nos florin.
“Esaki ta algo hopi peligroso. Locual gobierno ta haciendo ta treciendo duda den autonomia di Banco Central y ta un peliger pa reservanan cu ta garantisa stabilidad di nos moneda Arubano”, e lider di AVP, mr. Mike Eman a expresa.

Centrale bankverordening hustamente ta pa ancra den ley e posicion independiente di Banco Central: “de kern van het onderhavig voorstel (Bankverordening) is het vastleggen van de onafhankelijke positie van de bank ten opzichte van de Minister van Financien”.
“Si gobierno bai atribui su mes e derecho di pone man riba reservanan cu Banco Central ta considera como parti di e fondonan cu mester keda reserva pa sigura e posicion di Banco Central, gobierno ta torno na e posicion di Banco Central como instancia cu mester garantisa e stabilidad di e moneda Arubano”, e lider di oposicion, mr. Mike Eman a adverti.
Ta obvio cu gobierno ta keda desespera pa placa, pero core cu Presidente di Banco Central pa haya man liber pa haci y deshaci si ta pasa tur limite. E desaroyo aki ta bai haci hopi danjo na Aruba. Mundo internacional ta bai duda den e independencia di nos Banco Central, mr. Mike Eman a declara. Esaki ta un otro instituto den un serie awor cu ta worde intimida dor di Gabinete Oduber y su independencia y credibilidad ta worde afecta pa accionnan di e gobierno aki.
E lider di AVP ta puntra comunidad pa keda alerta y skerpi pa e desaroyonan aki. E funcionamento di un Banco Central independiente ta crucial pa nos stabilidad monetario y e credibilidad di e instituto aki localmente y internacionalmente. Eman ta accentua e Memoerie van Toelichting di Centrale Banverordening cu ta bisa cu funccionamento independiente di Banco Central ta crucial: “welke voorwaarde voor een optimaal functioneren – en derhalve voor de financieel-economisch-monetaire situatie van het land Aruba – van doorslaggevend van belang”.
Mr. Mike Eman ta bisa cu AVP y pueblo no lo permiti Promer Minister Oduber continua cu e presion peligroso aki riba Banco Central, e daño ta hopi grandi caba cu Aruba por tin un gobierno asina iresponsabel cu kier tira man riba reservanan di Banco Central pa financia un maneho financiero iresponsabel y kier silencia Banco Central den su rol pa garantisa stabilidad monetario di Aruba.