“Tur rond di nos isla por scucha y mira e problemanan creciente cu Gabinete Oduber ta creando cu su maneho di malgastamento di placa y medida pa cubri pa esaki. Nos ta haya confirmacion pa locual nos ta scucha di nos conciudadanonan den e cifranan cu Centraal Bureua Statistieken (CBS) a publica recientemente. Prijs di cuminda a subi den e promer luna di anja 2007 caba cu 10% (9.8%). Esaki ta causando un problema grandi pa e presupuesto di esnan mas margina den nos comunuidad. E maneho di medida, impuesto y BBO ta causando un crisis di pobresa penoso na Aruba, e lider di AVP, mr. Mike Eman a accentua. Siman pasa Eman a reuni cu FCCA relaciona cu un famia cu a worde saca for di nan cas di pueblo pa motibo di no por a cumpli cu nan huur. A logra un solucion pa e famia aki, pero e problema aki ta di centenares di famia na Aruba. Gastonan a subi demasiado pa e famia na Aruba, Eman ta expresa.
E lider di AVP ta cita e rapport di CBS cu ta bisa: “Food ; This sector increased with 9.8 percent compared to January 2006. Higher prices has been registered for the categories Potatoes, Vegetables & Fruit (+27.1%). Eman ta bisa cu gobierno a bisa cu no a pone invorrechten riba fruta y berdura, pero categoria aki di cuminda cu ta necesario pa un nutricion saludabel y balansa a subi cu 27%.
“Locual nos ta constata ta cu famianan ta hayando nan mes den dificultad pa motibo cu e parti di gastonan di cuminda (9.8%), berdura (27%), panja (6.2%), operacion di cas (4.1%) y trasporatcion (4.4%) den e promer luna di 2007 a subi dramaticamente. Dor cu e gastonan aki ta subi asina dramaticamente hopi famia no por cumpli mas cu pago di debenan regular, manera huur, hypoteca of otro fianza na banconan of institutonan financiero. Famianan ta drenta un crisis financiero-economico-social”. E resultado ta un crecemento di pobresa penoso den nos comunidad, e lider di oposicion mr. Mike Eman ta expresa preocupa. E ta bisa cu esnan pober ta bira mas pober. Pero tambe hopi di esnan den clase medio ta hayando nan mes den dificultad dor di e maneho di aumento di impuesto y prima dor di Gabinete Oduber. Si mira con por ehempel benta di auto a cai cu 38% den e promer kwartal di 2007 bo ta realisa cu cos a cuminsa preta tambe pa e clase medio na Aruba. Ta increibel pa tende Promer Minister Oduber cu promer a bisa cu no tin pobresa na Aruba, pasobra hopi hende ta cumpra auto awor ta bisa cu no ta nada cu benta di auto a cai, pasobra toch e placa ta bai afor. Ta cuanto producto nos ta cumpra na Aruba cu no ta bin di afor ? Acaso Promer Minister Oduber no ta realisa cu e caida aki ta un indicacion di perdida serio di poder di cumpra serca e clase medio den nos comunidad ? Tambe e comentario aki ta mustra un falta di realisacion di cuanto hende ta traha den e commercio di benta di auto cu nan salario y comision ta depende di benta di auto.
Eman ta bisa cu esnan den clase medio por net sobrebibi, pero nan aspiracion y labor duro diario ta pa bai padilanti. Esaki antes tabata posibel na Aruba. Awor no mas. Gabinete Oduber ta sofocando nos clase medio. Tur e aumentonan di prima (AOV y AZV), aumentonan di invoerrechten, cambionan di “premiegrens” y “premiegrondslag”, cierto cambionan den reduccionan antes posibel for di impuesto y tambe cambionan di “fringe benefits” a haci locual tabata un reto pa e clase medio, esta di bai padilanti algo imposibel awor.
Eman ta haya tristo cu gabinete Oduber ta causando e problema grave aki den comunidad y ta nenga tambe di mira e problema y accepta cu e tey y cu algo mester worde haci. E ta referi na e peticion di fraccion di AVP ya mas cu tres anja pa haci un “budgetonderzoek” y haya un cifra actualisa di e “bestaansminimum” na Aruba. E ultimo estudio ta data di tempo cu Gabinete Eman a haci un estudio relaciona cu e redoblacion di Pensieon.
“Minister di Asuntonan Social Marisol Lopez Tromp a priminti anja pasa durante tratamento di presupuesto cu nos lo haya e cifra aki pa mira cuanto hende na Aruba ta bibando bao di e minimo aki. Pero aparentemente Minister tin otro prioridad pasobra te awe no por haya e cifra actualisa a base di un estudio nobo kico ta e “bestaansminimum” na Aruba”, e lider di oposicion mr. Mike Eman ta lamenta invatisando cu e problema ta grave y atencion ta urgentemente necesario.