Ya riba e prome dia di nan bishita na Hulanda, despues di nan encuentro cu Minister President Jan Peter Balkenende, e delegacion di AVP, consistiendo di Mike Eman, Benny Sevinger y Mike de Meza, hunto cu dr. mr. Mito Croes a asisiti na e ceremonia special cu tabatin na Waalsdorpervlakte pa conmemora e hereonan di Segunda Guera Mundial cu a duna nan bida pa otronan por a haya un miho bida. Na Waalsdorp tabata e lugar unda a fusila entre otro e gran heroe Arubiano Boy Ecury. E delegacion Arubano a haci un ofrenda floral na memoria di e difuntonan. Tambe nan a saluda e veteranonan di Segunda Guera Mundial y nan famia cu tambe tabata presente. E presencia di e delegacion Arubiano a conmove esnan presente y e acogida tabata fantastico.

Boy Ecury, yiu di e comerciante Dundun Ecury, despues di tabata masha activo mes den e resistencia na Hulanda, a wordo traiciona y captura pa e Alemannan na luna di november di aña 1944. Un dia despues di su captura el a wordo fusila na Waalsdorp, e lugar cu e Alemannan tabata usa pa fusila nan detenidonan. Despues di guera e curpa di Boy Ecury a wordo treci su tera natal Aruba bek na unda el a wordo dera cu e ceremonia cu e tabata merece como e hereo cu e tabata. Te dia di awe, dia 4 di mei nos ta conmemora esnan cu a muri den Segunda Guera Mundial y Boy Ecury tin un luga special den curazon di nos tur.

Riba e combiacion di portret nos por mira lider di partido AVP Mike Eman den compania di Mike de Meza, Benny Sevinger y dr. mr. Mito Croes.

Tambe nos ta mira e delegacion ta saluda e veteranonan di Segunda Guera Mundial.