Lesa version na Hulandes

E lider di AVP, Mike Eman, acompaña pa Benny Sievinger y Mike de Meza ya riba e mesun dia di nan yegada na Hulanda a worde ricibi dor di Ministro Presidente Hulandes, den su funcion di Minister President di Reino. E contenido basico di e conversacion cu e delegacion di AVP a sostene cu e Minister President di Reino, dr. Jan Peter Balkenende ta cu primordialmente e gobernacion totalmente irresponsable cu tin actualmente na Aruba ta un problema y responsabilidad politico di Aruba. Pero cu esaki no ta kita afor cu di su banda Hulanda tambe dentro di e margennan di Statuut mester carga su responsabilidad pa juda coregi e situacion di mal gobernacion y elimina e menasanan grandi pa estado di derecho cu actualmente ta existi na Aruba. E delegacion a subraya cu solamente si tin un gobernacion responsable na Aruba Aruba por duna contenido real na su Status Aparte y pueblo di Aruba lo por gosa di e benefecionan cu Status Aparte por brinda.

For di Hulanda e delegacion di AVP a raporta cu durante e promer conversacion cu nan a sostene, nan a pone e Minister President di Reino na haltura di e aspectonan importante pa loke ta trata e gobernacion actual di Aruba y e proposito di nan viahe. E mensahe cu promer minister Balkenende a ricibi, ta esun cu lo duna tambe den proximo dianan na otro funcionarionan y instancianan di Reino mas den detayes pa loke ta nan reponsabilidadnan especifico.
Durante e combersacion cu Minister President di Reino, e preocupacion grandi cu ta existi den nos pueblo pa loke ta toca e mal maneho di Gabinete Oduber a worde expresa. E Minister President di Reino a demostra gran atencion y receptividad pa contenido di e ponencianan di e delegacion di AVP cu tambe a haci tambe proposicionnan pa coregi loke Gobierno Oduber ta haciendo cu pueblo di Aruba, E crisis constitucional serio cu ta existi na Aruba a worde exponi na Minister President Hulandes. A mustra ariba e conflictonan continuo cu Reino, e conflictonan cu instancianan sumamente importante den un estado di derecho manera Banco Central, Algemene Rekenkamer y Raad van Advies. E dirigente di Gobierno di Reino a haya e informacion tambe con democracia parlamentario na Aruba a stop di funciona y con por ehempel e promer mitar di aña ta yega su final y ainda Parlamento, cu ta worde poni un banda, ni sikiera a haya oportunidad pa duna su aprobacion constitucional na presupuesto. Algo completamente en pugna di nos Constitucion. Tambe e mal funcionamento di un di e pilarnan di un estado di derecho, esta Ministerio Publico, tabata parti di e conbersacionnan.
E delegacion di AVP a enfatisa enfrente Ministro Presidente Balkenende cu e situacion actual ta excepcional y cu e ta worde causa dor di un Gobierno cu a decai na un nivel cu nunca antes Aruba a conoce. A subraya cu no por bisa cu ta Aruba no ta capaz pa tin un gobernacion propio of cu Aruba no por cu su autonomia. A subraya cu al contrario den pasado Aruba a demostra cu Aruba por carga e responsabilidad pa su autonomia y Status Apart. Aruba tabata pa hopi anja e ehemplo den Reino con un pais chikito por a sa di sobrepasa retonan grandi riba tur tereno. E Gobierno di AVP a duna prueba cuanto capacidad y experencia ta presente na Aruba y con por a rescata Aruba for di e peor crisis economico cu Aruba a jega di conoce den su historia despues di cierre di LAGO. E situacion desastroso actual di nos pais riba tur tereno no ta debi na nada otro cu e maneho fatal y falta di integridad di e gobernantenan actual. Ta conhuntamente mester restablece bon gobernacion y estado di derecho na Aruba, tabata e topico central di e delegacion Arubano, cu tabata hopi satisfecho cu e reunion cu e Minister President di Hulanda.

Tambe e Comision Permanente di Parlamento pa Asuntonan di Aruba y Antiyas y otro Ministernan y instancianan cu e delegacion lo papia cune den e dianan cu ta bin, lo haya e mensahe cu Reino mester carga su responsabilidad pa salvaguardi bon gobernacion y estado di derecho na Aruba dentro di cuadro di Statuut.

Y cu Pueblo di Aruba mester por spera di Reino cu den forma di urgencia ta duna sosten na tur e forsanan constructivo na Aruba pa rescata nos pais y cu e Reino ta hasi lo necesario segun Statuut pa salvaguardia e integridad di Raad van Advies, Banco Central y Ministerio Publico y otro institutonan clave na Aruba.
E mensahe cu Hulanda ta ricibi ta, cu Aruba tin hopi joven cu bon estudio y tambe ciudadanonan di mas edad, cu tin e estudio y capacidad pa por carga e responsabilidad di e pais. E situacion actual pues ta uno cu Aruba no merece. Aruba tin derecho riba gobernantenan sincero, honesto y capaz. Mas liher por soluciona e problemanan di Aruba, mas mihor, ta e mensahe cu e delegacion di AVP ta duna.

Un mensahe cu sigur a cai den bon tera tambe serca hopi Arubiano na Hulanda cu ya a busca contacto y a duna nan respaldo na e delegacion di AVP.
Un grupo di Arubiano ente tanto a tuma initiativa pa organisa un encuentro na Rotterdam cu delegacion di AVP. E siguiente reunionan lo ta cu Minister di Husticia, E. Hirsch Ballin, Staatssecretaris pa Relacionan den Reino, A. Bijleveld y Presidente di Comision Pernanente di Tweede Kamer pa asuntonan di Reino.