Den Haag/Oranjestad - Den e reunion di diabierna awor di Conseho di Minister di Reino, Secretario di Estado sra. Bijleveld lo propone pa e sentencia di Hof Europeo den e caso Eman/Sevinger wordo ehecuta, pa di e forma aki bin un igualdad den e derecho di voto di Arubiano y Antianonan bibando na Aruba y Antias y esun di e Hulandesnan bibando na Hulanda. Esaki kier men cu e Arubiano y Antianonan lo tin derecho di voto den e siguiente eleccion pa Parlamento Europeo. Esaki a wordo anuncia na e delegacion di AVP durante e reunion cu nan tabatin cu Minister di Husticia Hirsch Ballin y Secretario di Estado pa Asuntonan di Reino sra. Bijleveld.

Den su sentencia aña pasa Hof Europeo explícitamente a declara cu esnan cu tin e nacionalidad di un miembro di Union Europeo (lidstaat) y cu ta biba sea den e pais ey of otro parti cu ta pertenece na un pais of region ultramar manera ta poni den articulo 299 lid.3, EG, por apela pa haya derechonan cu e habitantenan di Union Europeo tin manera ta poni den e di dos parti di e EG-tratado. Den e caso ariba menciona tabata trata di un principio fundamental encuanto e pregunta crucial riba e otorgamento di e derecho civico di Union Europeo “e derecho di voto pa Parlamento Europeo” na e ciudadanonan Eman y Sevinger.

Hof a dicidi cu apesar cu por lo pronto, bao cierto condicionan, limitacionnan ta posibel den e idea esencial di trato igual, esaki por ta un estorbo ora cu e criteria cu ta wordo mantene ta haci cu ciudadanonan cu ta haya nan mes den situacionnan similar por haya un trato desigual si no tin un hustificacion obhetivo.

Y esaki, manera Hof ta declara, ta e caso den Reino Hulandes. Cu otro palabra, e acuerdo actual di e derecho di voto pa Parlamento Europeo dentro di Reino ta en pugna cu e decreto Europeo. E consecuencianan di e echo cu Eman y Sevinger injustamente a wordo impedi di por a vota den e ultimo eleccion pa Parlamento Europeo, a keda restablece. Hof den su sentencia a mustra riba e echo cu e Francesnan cu pa añanan largo ta biba den un LGO, ta biba bao di e mesun condicionnan cu e Francesnan cu ta biba den e parti Europeo di Francia y cu nan ta participa na e eleccionnan pa Parlamento Europeo. Ta evidente cu Hof no tin ningun problema cu esaki. Den corto, no tin ningun legislación Europeo cu ta opone pa ciudadanonan di Union Europeo cu ta biba den LGO, entre otro Aruba, cu e mesun derechonan cu e Hulandesnan cu ta biba na Hulanda, por participa na e eleccion pa Parlamento Europeo.

Como resultado di e sentencia Eman/Sevinger Hulanda por a haci dos cos pa kita e discrepancia aki: sea kita e derecho di voto di tur Hulandes cu ta biba pafo di Hulanda of duna derecho di voto na tur Hulandes, Arubiano y Antiano cu ta biba na Aruba y Antia. Riba conseho di Raad van State Hulanda a scohe pa duna Arubiano y Antianonan e mesun trato cu Hulandesnan Europeo.

Lider di partido AVP mr. Mike Eman tabata sumamente contento cu e noticia. “Hopi no ta realisa nan mes con hopi envolvi nos ta den Union Europeo, su maneho, su legislación y su influencia. Cada aña mas poder di e Conseho di Minister Hulandes y e Parlamento Hulandes ta wordo traspasa pa Bruselas. Pa motibo cu ambos organo ta funciona tambe como organo di Reino tanto Aruba como Antia, si nan kier of no, ta wordo hiba den e proceso aki. Nos por para un banda pasivamente of participa activamente dor di haci uso di e posibilidadnan. Esaki ta cuminsa cu un derecho democratico di particpacion. Cu e setencia esaki ta mustra cu nos ta logrando. Ta pesey cu nos ta haya e setencia di hopi importancia, no solamente pa e victoria grandi di e derecho cu nos a bringa pe, pero mas ainda pa e direccion unda nos kier bai: na un relacion mas estrecho cu Union Europeo den forma di un region ultraperiferico y na un relacion mas productivo denter di Reino”. Esaki ta e reaccion di lider di partido AVP mr. Mike Eman kende hunto cu su colega Sevinger tabata e iniciador den e caso aki pa haya derecho di voto pa Parlamento Europeo, cu awor a bira un realidad.

Den e caso constitucional aki Eman y Sevinger a wordo representa pa e profesional riba tereno di Staatsrecht dr.mr. Mito Croes, kende aña pasa a doctora cu e tesis encuanto relacionan nobo denter di Reino Hulandes y e posibilidadnan di desaroyo cu Union Europeo ta ofrece Antia y Aruba “De herdefiniering van het Koninkrijk”.