Den un conferencia di prensa bibo y directo for di Den Haa, Hulanda den cas di partido AVP diahuebs mainta, lider di fraccion y alabes lider di partido AVP a trece padilanti un relato di nan mision na Hulanda. E mision, cu a resulta despues di un consulta cu miembro y activistanan di AVP dia 22 di April, a duna fruta den varios nivel.

E delegacion a haya audiencia cu entre otro Premier di Hulanda, Jan Peter Balkenende; Presidente di Comision Permanente di 2e Kamer pa Asuntonan di Reino, Sr. van Beek; Staatssecretaris pa asuntonan di Reino, Sra. Bijleveld; Minister di Husticia y alavez Minister di Asuntonan Constitucional di Reino, Sr. Hirsch-Balin; Minister di Salubridad Publico, Sr. Ab Klink; Minister di Relacionnan Exterior di Hulanda, Sr. Maxim Verhagen. Adicionalmente e delegacion a tene un reunion masha bon concuri pa studiantenan y Arubianonan bibando na Hulanda.

Den un tono mas serio, Sr. Eman a mustra cu preocupacion riba e hecho cu trabounan grandi lo mester bay wordo hasi pa asina rescata nos isla pa por mantene e posicion cu nos tin den Reino Hulandes. Despues di a reuni cu minister y staatsecretarisnan na Hulanda, delegacion di AVP a yega na e conclusion cu tin un crisis serio entre Aruba y Reino Hulandes. E gobierno di Aruba den e ultimo 5 añanan a crea un duda grandi den pais Aruba den bista di nos partnernan den Reino. Segun Sr. Eman, e decadencia gubernamental aki na Aruba a crea un distancia grandi entre Gobierno di Hulanda, Gobierno di Reino y Gobierno di Aruba. Unda, cu e delegacion a reuni of yega, por a sinti un desconfiansa grandi y cu Aruba ta alejando su mes mas y mas for di Hulanda. E desconfiansa aki ta creando un situacion caminda cu hasta mantencion di posicion di Aruba den Reino Hulandes ta na duda. Esaki sigur si e situacion sigui manera cu e ta bayendo den e momentonan aki. Pe e motibonan aki ta un trabou hopi grandi pa convense gobernantenan Hulandes cu e situacion cu tin na e momentonan aki no ta un problema di Aruba of di Arubianonan, pero ta mas bien un problema di gobernantenan cu no tin Aruba na pecho.

Preguntanan grandi a surgi, segun Sr. Eman, cu ta, con por ta posibel cu un pais cu pa 18 aña largo tabata tin un debe externo di 1 miljard, y cu den 5 aña esaki ta subi te na 2 miljard. Ta cuestiona e hecho cu e debenan astronomico aki no ta hustifica loke tur hende ta wak na Aruba. Infrastructura a deteriora, skolnan ta den decadencia, a nota caidanan grandi den turismo y un negligencia total den promocion turistico di Aruba den exterior. Na unda e 1 miljard extra aki a bay no ta evidente y pio ainda si tuma na cuenta e entradanan adicional cu e gobierno aki a hanja cu ta jega na mas di 700 miyon florin. Debe externo tawata abou compara cu criterianan internacional y awe e debe a bira 50% di nos producto bruto nacional. Segun Sr. Eman, mester bisa cu na Hulanda e hechonan aki ta debidamente registra y ta pesey mes e preocupacion di funccionarionan Hulandes ta hopi grandi.

Nan ta puntra nan mes tambe ta con por ta posibel cu por a jega na un deterioro asina grandi y con ta posibel cu a mal gasta y tin caso tambe cu ta indica malversacion, pero ningun gobernante ta wordo responsabilisa pa nan actonan. No tin jaarrekening, ni presupuestonan ta aparece na parlamento pa asina responsabilisa nan mes pa e gastamento sin excrupulo di gabinete Oduber. Tur proceso democratico ta bayendo di un manera ad hoc. Mas leu ainda, segun Sr. Eman, cu nan a haña confirmacion di cu e ultimo fianza cu Sr. Nel Oduber hasi na banconan den exterior a bay cu condicionnan serio su tras. Esaki ta contrario na palabranan di e propio Sr. Nel Oduber cu a bisa lo contrario dilanti di pueblo di Aruba. E condicionan aki a trece cu ne cu Sr. Nel Oduber mester a accepta pa ambtenaarnan Hulandes ta vigila gobierno den e.o. e departamento di Finanzas. Mas preocupante ainda ta, segun Sr. Eman, cu nan por a compronde na Hulanda cu ni cu e ambtenaarnan aki presente, tin un indicacion di kiko ta pasando den e debacle financiero di gobierno.

Tambe e delegacion parlametario di AVP a wordo poni na altura cu na ningun momento ministernan tin e derecho pa pone man ariba reservanan di Banco Central aki na Aruba. E integridad di gobernantenan aki na Aruba ta kibrando e relacion entre Hulanda y Aruba mas y mas pa motibo cu e distancia cu e gobierno di Aruba ta creando ta birando demasiado grandi. Poniendo e posicion di Aruba na peliger y aki por pensa ariba nos Status Aparte cu pa hopi tempo a traha asina duro pa por logre.

Un otro preocupacion grandi y serio di e Hulandesnan ta ariba ministerio publico y su integridad na Aruba. E situacion di carta di soborno di “Namdar” ta hasi e bista ariba Aruba y su systema legal mas y mas grandi. E preocupacion tambe tey cu nomber di Gobernador tambe a wordo menciona relaciona cu e caso aki y ta di spera cu e caso por wordo investiga profundamente pa asina por saca nomber di nos gobernador for di e luz negativo aki y separe for di e ministernan cu ta e sospechosonan real den e caso aki.

E reto grandi, segun Sr. Eman, ta pa mustra nos partnernan den reino cu e problema aki no ta un problema di Arubiano y Aruba cu no por goberna su mes, pero ta un gobierno sin escrupulo cu no ta indicativo di un pais cu por y a mustra den pasado di por goberna su mes di un manera ehemplar. For di e diferente reunionan a sali si, cu e delegacion di AVP ta sumamente bon prepara y informa di e hechonan. Esaki ta hasi cu tin confiansa den e hecho cu Aruba no por wordo mira simplemente for di e bista cu gabiente Oduber y partido MEP ta ofrece na Reino y mundo. Aruba ta mucho mas cu esey.

E credibilidad cu nos mester gana bek, lo no bin barata, pero pa motibo di e situacion actual, nos pais mester bay traha duro pa hasi esaki posibel un biaha mas. E problema no ta di pais Aruba of e pueblo di Aruba. E ta un problema di un prome minsiter cu a pone su dilanti cu su ultimo gobernacionan lo ta bay hunto cu e tema di favorece “family & friends”, sin tene cuenta na unda esaki ta laga Aruba atras.

Di otro banda Sr. Eman a bisa di por a sinti sosten di esnan cu e a reuni cu ne pa e esfuersonan cu nan ta hasi pa habri un caminda nobo pa Aruba y pa mustra gobierno Hulandes cu e decadencia di partido MEP y di e gobierno di signatura di MEP no por wordo skibi ariba cuenta di Aruba.