“Nos a organisa e anochi aki cu e delegacion di AVP na Hulanda, pasobra nos ta sigui di serca kico ta pasa na Aruba y nos ta sumamente interesa den e mensahe di cambio y renovacion cu e generacion nobo di AVP tin pa nos isla", asina e Arubianonan residencia na Hulanda, Mario van der Biezen y America Lacle, tumadornan di e iniciativa pa e encuentro cu e delegacion di AVP na Rotterdam a expresa.

Cu e sentimiento pa e speransa nobo aki ta worde comparti dor di hopi Arubiano na Hulanda tabata bisto for di e cantidad di studiantenan y Arubianonan na Hulanda cu a yena e sala di encuentro den Groothandelsgebouw na Rotterdam pa bin topa e lider di AVP, Mike Eman y e miembronan di delegacion, parlamentarionan Benny Sevinger, Mike de Meza y consehero Mito Croes.

Riba diferente websitenan di Arubianonan na Hulanda tambe e iniciativa pa e evento aki a worde sosteni espontaneamente riba nan “bulletinboard” cu un invitacion pa e encuentro aki dirigi specialmente na studiantenan y Arubianonan residencia na Rotterdam y besindario. E sitenan aki a cubri e resultado di e exitoso encuentro aki tambe ampliamente riba nan paginanan.

Topico pa cual interes a resalta ta e vision di AVP pa busca un lugar mas fuerte pa Aruba dentro di Union Europeo den forma di e status ultraperiferico (UPG). Hopi kier a sa mas di e posibilidadnan cu UPG ta brinda Aruba y con por realisa e posicion aki pa Aruba den Union Europeo. Splicacion amplio tabata tin riba e “framework” legal y social-economico cu UPG lo brinda Aruba pa un desaroyo mas stabiel.

Tambe riba e posibilidadnan di diversificacion economico cu un posicion di “gateway” pa Union Europeo y vice versa pa region lo brinda Aruba. Preguntanan tabata tin riba pakico e gobierno actual ta opone UPG y kico ta e argumentonan cu nan tin pa nan posicion. Den e contexto aki a papia riba e derecho di pueblo pa dicidi pa asina un gobierno, no riba su mes kita Aruba un oportunidad asina grandi.

A mustra studiantenan riba e cantidad di documentonan cu informacion adicional for di tur angulo riba e topico aki cu ta obtenibel riba e website (fesca.org) di e Instituto Scientifico di AVP (FESCA).

E situacion di mal gobernacion na Aruba, confrontacion di gobierno cu Hulanda y aumento grandi di costo di bida na Aruba tambe tabata punto di preocupacion di Arubianonan na Hulanda. E delegacion di AVP a mustra cu pesey e mision na Hulanda ta importante pa mustra cu e decadencia aki ta debi na un gobierno y no na e capacidad di Aruba y e pueblo pa maneha nos Status Aparte.

Pa e vision di AVP riba diversificacion di economia di Aruba y di e industria turistico tambe tabata tin hopi interes. Especialmente pa e studiante Arubiano un ampliamento di variacion den posibilidad di trabao ta bira mas importante mirando cu tur anja mas di 300 studiante ta bai studia den exterior y ta scohe pa un variacion hopi grandi di profesion.

Arubianonan na Hulanda tabata tin hopi aplauso pa e logro den e caso pa derecho di voto di “Eman y Sevinger” na Corte Superior Europeo. E parlamentarionan Arubiano cu asistencia di jurista Mito Croes a logra un punto di bista di Corte Europeo cu ta bai duna Arubianonan y Antiyanonan residencia na Aruba y Antiyas derecho di voto pa eleccionnan pa Parlamento di Union Europeo.

Diabierna siman pasa e cambio di ley aki a worde aproba den promer rond den Conseho di Minister di Reino. E delegacion di AVP a mustra cu e derecho di voto lo yuda e proceso pa Aruba por bai orienta su mes mas riba e valor cu asercamento di Union Europeo lo tin pa fortifica nos relacion den Reino y habri oportunidad nobo pa Aruba.

Den e cuadra aki tambe e lider di oposicion, Mike Eman a anuncia cu AVP kier explora tambe e posibilidad pa Arubianonan den exterior por vota pa eleccionnan na Aruba. Esaki pa logra mescos cu otro paisnan pa laga nan nacionalnan den exterior participa na eleccionnan den nan pais natal. E pensamento aki a haya hopi acohida serca e Arubianonan cu obviamente ta sigui e desaroyo riba nan isla y kier yuda determina e futuro di e pais na cual majoria di nan lo kier regresa despues di nan estudio of otro compromiso den exterior.

Logra un mihor coordinacion pa e Arubiano cu kier regresa Aruba por haya un trabao tambe ta punto di interes di Arubianonan na Hulanda. Nan ta sinti cu actualmente tin hopi deficiencia den esaki. Hasta ta asina cu studiantenan Arubiano na Hulanda ta tumando iniciativa propio riba e tereno aki. Un di e organisacionnan aki cu ta yama “Pasaat” ya ta haciendo esfuersonan di coordinacion y intermediacion riba e tereno aki pa Arubianonan na Hulanda por haya un trabao na Aruba.
E delegacion di AVP a aplaudi e iniciativa aki di entre otro e hobennan Arubiano, Jordan Every y Vivian Bermudez.

Den e momento na final di e encuentro cu presentenan por a papia uno cu uno cu miembronan di e delegacion di AVP e aprecio pa e anochi aki tabata hopi bisto riba e intercambionan cu caranan sonriente.