Durante di un conferencia di prensa 16 di mei ultimo parlamentarionan Otmar Oduber y Mike de Meza, a anuncia un mision di orientacion di un delegacion parlamentario di AVP cu lo sali pa Republica Domincana. E delegacion lo tin como meta pa orienta nan mes ariba e manera di trata adicitonan problematiconan na e pais ey. Ultimo simanan e topico di adictonan problematico, of Chollernan, a hanja un focus grandi despues cu Micheal Saladin a wordo aresta y deteni pa mas di un luna pa un problema cu e tawata tin cu un di e Chollernan cu ta frecuenta centro di Oranjestad. Despues di un confrontacion entre e dosnan aki, pa motibo cu e Choller a kibra propiedad di Sr. Saladin y tambe menasa su casa, Sr. Saladin a wordo aresta.

E motibonan aki, ta pa kiko e delegacion a opta, segun parlamentario di AVP, Sr. Mike de Meza, pa busca di orienta nan mes internacionalmente ariba e problema aki. Na Aruba mester un solucion ariba corto plazo pa e problema di Choller pa asina baha e presion social ariba pueblo, y no mester lubida e presion enorme cu e Chollernan tin ariba futuro di nos turismo.
Aki na Aruba e structura di tratamento no ta bon hinca den otro. Contrario na esey, segun Sr. de Meza, cu asina cu AVP tuma gobernaion over, mester segura cu e presionan social wordo baha ariba un corto plazo. Esaki mester pasa ariba corto plazo y tambe mester re-structura henter nos systema di trata y juda adictonan problematico ariba un largo plazo.
E delegacion lo bishita “Hogares Crea” na Santo Domingo, pa motibo cu na Aruba ta conosi cu e experiencia (priva) di e instituto aki. E nomber di e instituto aki rond di Caribe y tambe pafor di dje, ta masha bon mes. E parlamentarionan kier orienta nan mes ariba e trabou di e instituto aki specificamente, pero tambe en general na Santo Domingo mes. E solucion pa e problema di Chollernan tin hopi urgencia pa trate, mas ainda si por ripara cu miembronan di gobierno no ta mustra interes pa soluciona e situacion aki.

Segun Sr. de Meza, no ta prome lugar cu representantenan di AVP a bishita e ultimo temponan aki. Mike Eman hunto cu Benny Sevinger a bishita algun instituto den e mesun ramo na Hulanda y tambe na Curaçao. E bishitanan aki ta orienta esnan den e partido pa forma un plan con pa ataka e problema aki den futuro. Segun Sr. de Meza, ora cu nan bolbe, manera semper ta e caso den AVP, nan recompila e informacion, combinanan cu compilacionan anterior (di e.o. Sr. Eman y Sevinger), studianan y comparti nan cu experto y conseheronan pa asina crea un programa efectivo pa combati adiccion en general na Aruba. Claro cu tambe lo considera loke tin den Plan Aruba, den cu tambe a hasi estudio di e topico aki di un maner hopi profesional. Segun sr. de Meza, e situacion ta birando hopi precario na Aruba y partido AVP no por para na banda y djies wak e cosnan bira pio cada dia. E situacion a bira asina preocupante cu algun luna pasa un persona a perde su bida pa 3 florin, den un confrontacion cu un adicto problematico na San Nicolas. Lastimamente, segun sr. de Meza, tin cu mira cu gobernantenen di MEP no ta tuma e situacion na serio.

A jega asina leu, segun Sr. de Meza, cu mester cuminsa cu un maneho di zero-tolerancia ariba tanto esnan cu ta bende y usa e droga. Pero Aruba su so no por atende e problema aki. Mester asistencia di afor, mirando e hecho cu paisnan grandi cu hopi mas recurso financiero y humano ainda ta “struggle” cu e problemanan aki. Loke mester ta importante pa nos situacion, ta pa no bay drenta den “experimentonan” cu no tin ningun seguransa di solucion. Nos no mester “re-invent the wheel” cada biaha, pero mas bien nos mester siña di otro y adapta e conosimento na nos situacion local.

E gobierno aki mientrastanto a sinta 6 aña largo den gobernacion ta experimenta y reinventa e wiel un biaha tras di otro, mientras cu awe nos por sinti e efectonan di e mal maneho aki. Problemanan social den nos comunidad ta na un nivel sin igual y nada ta wordo hasi pa cambia esaki.
Un pregunta intresante di un miembro di prensa presente tawata cuestiona e hecho cu polis, cu sa kende ta bende y/of usa e droganan aki, no por actua pa falta di libertad den ley pa hasi esaki. Contestando e pregunta aki, Sr. de Meza a mustra cu e leynan tey. E la sigui, recapitulando, cu dos luna pasa, AVP a para fuerte den parlamento pa duna Cuerpo Policial mas libertad pa actua den e tipo di casonan aki. E la trece padilanti cu varios mocionan a wordo entrega pa e motibo aki, pero lamentablemente e fraccion cu ta sostene gobierno den parlamento, fraccion di MEP, no a mira nada den e ideanan aki y a vota contra cada uno di e mocionan aki. Sr. de Meza a sigui bisando cu AVP semper lo keda bringa pa duna polis mas espacio pa por hasi nan trabou di un manera responsabel pa sociedad.

Na final di e conferencia di prensa, Sr. Oduber a bisa cu e problema di complaciencia di e comunidad tamba ta hunga un rol den e situacion aki. Ta parce cu adictonan (y ultimamente hobenan tambe) por para den dia cla y den grupo ta hasi uso di droga den dia cla y e no ta afecta ningun hende como un problema mas of algo stranjo. Esaki ta asina pa motibo cu si bo actua contra di e cosnan aki, no tin reaccion di instancianan concerni mas. Añanan largo e problema aki ta bayendo for di man y gobernantenan di MEP no ta hasi nada pa por drecha e situacion. Consecuentemente e tipo di situacionan aki a para bira mas un custumber cu algo extraordinario.

E bishita di orientacion di Srs. Oduber y de Meza pa Santo Domingo lo cuminsa 17 di mei y lo dura 3 dia.