For di raportnan cu e lider di AVP, mr. Mike Eman a studia cifranan di CBS ta indica cu comestibel a subi cu mas di 11%, panja cu 8.1% y batata, fruta y berdura cu 29.1 %. Si tene na cuenta cu mas di 60% (62.6%) di e total di empleadonan na Aruba tin un salario bao di Afl. 2500,== bo por imagina bo mes con grave e situacion ta, e lider di AVP, mr. Mike Eman a expresa.

mr. Mike Eman ta haya esaki algo hopi preocupante, pasobra cifranan cu Eman tin di CBS tambe ta indica cu e “bestaansminimum” na Aruba awor pa un famia di tres (pareha y 1 jiu) ta Afl. 2500,== pa luna. E cifra aki di CBS ta uno di un estudio na 1994 corregi cu inflacion te na 2006. Eman ta kere cu ora tin un “budgetonderzoek” nobo ta bai resulta hasta cu e “bestaansminimum” ta hasta mas halto. E “bestaansminimum” pa un mama soltero cu dos jiu ta Afl. 2222,==. Imagina Bo mes cu e mama soltera ta gana un salario minimo di Afl. 1450,==. Ta imposibel pa e mama soltero ey por biba un bida debida, mr. Mike Eman ta bisa.

Locual ta evidente for di e cifra aki pa e lider di AVP ta cu si tata y mama no traha un parti grandi di nos poblacion no ta alcansa e minimo cu mester pa nan biba of mihor bisa pa nan por sobrebibi. E problemanan social grave cu ta bin cu esaki ta worde ignora tambe pa Gabinete Oduber y Minister Marisol Lopez Tromp. Eman ta bisa cu e ultimo 5 anjanan inflacion a acumula na 19%. Awor cu BBO ta mira cu inflacion ta bai ta hopi halto na 2007. Cifranan di CBS tin inflacion caba na 5% te cu maart. Si sigui asina inflacion ta bai pasa 8% e anja aki. Un inflacion nunca bisto na Aruba cu ta come den poder di compra di pueblo.

E situacion pa esnan riba un onderstand, pesioen di vehez of huerfano of salario minimo no ta di papia mes.. E ahuste di 3% riba onderstand y pensioen y Afl. 100,== riba salario minimo ta worde absorba caba dor di aumentonan di pan y corant. Un dia no a cuminsa y ya e famia a perde na aumento di prijs di corant y pan so caba tur locual supuestamente a haya na aumento. Aki no ta papia mes di tur e otro aumentonan di cuminda, panja y transportacion. Mr. Mike Eman ta bisa cu ta evidente cu Gabinete Oduber ta strangulando e pobernan den comunidad haciendo nan dolorosamente mas pober.

Eman ta bisa cu esnan den clase medio por sobrebibi, pero nan aspiracion y labor duro diario ta pa bai padilanti. Esaki antes tabata posibel na Aruba. Awor no mas. Gabinete Oduber ta sofocando nos clase medio. Tur e aumentonan di prima (AOV y AZV), aumentonan di invoerrechten, cambionan di “premiegrens” y “premiegrondslag”, cierto cambionan den reduccionan antes posibel for di impuesto y tambe cambionan di “fringe benefits” a haci locual tabata un reto pa e clase medio, esta di bai padilanti algo imposibel awor.

Eman ta bisa cu mientrastanto esnan cu tin mas entrada tambe ta mira cu biba den un pais caminda no tin claridad y consistencia den reglanan, maneho, rumbo y direccion ta creando un clima di “high risk” cu inversion particular ta bira menos atractivo tur dia. E lider di AVP, mr. Mike Eman ta bisa cu di tur manera a purba adverti Gabinete Oduber pa no sigui gasta placa di e forma iresponsabel pasobra na final pueblo lo tin cu paga pa e deficitnan monstruoso por medio di medida y stabilidad monetario-economico di Aruba lo sufri cu aumento di debe pa paga pa deficitnan iresponsabel. No tabata tin forma pa convence Promer Minister Oduber. Ambiciona pa placa pa esnan den y tur rond di gobernacion a haci fiesta cu sudor di pueblo y awe e mesun pueblo y Aruba ta carga e concequencia. Mescos cu nos Banco Central a yega di adverti cu e maneho aki di gabinete Oduber lo conduci na “sociale verpaupering” awe nos ta mira e resultado. Pero mr. Mike Eman ta finalisa bisando cu e lucha pa cambio ta continua, husticia lo prevalece.