Na momento cu a anuncia cu Fesca y Fundacion Digna Lacle, institutonan di partido AVP lo tene un anochi cu lecturanan interesante riba e topico “Rerum Novarum”, e atencion a wordo capta for di diferente angulo. Apesar cu e topico no ta uno comun y hasta por bisa uno profundo y dificil, e interes tabata grandi. E dos oradornan cu a wordo invita pa bin hiba un discurso riba e tema aki, ta hendenan di kaliber halto y sumamente capacita riba nan tereno. Ambos filosofo, linguista como tambe pensadornan moderno nan ta domina e topico “Rerum Novarum” den tur su aspectonan. E espectativanan tabata halto y awe Fesca, Fundacion Digna Lacle y tambe partido AVP por mira bek riba un anochi tremendamente exitoso.

Den un sala completamente yen na Manchebo Beach Hotel e anochi a cuminsa ora cu e hoben drs.Paul Croes, miembro di e Fundacion Digna Lacle, a yama esnan presente bon bini y deseando nan tur un anochi di inspiración. Despues drs.Rene Herde a splica encuanto e tema un poco y drs.Anco Ringeling kende a fungi como moderador, a introduci e prome orador pa e anochi, Prof.dr.Jandi Paula di Corsow. Sr.Paula no ta un persona desconoci. Un erudita kende a conta encuanto e historia di Rerum Novarum. El a splica con Paus Leo XIII a skirbi e encyclica aki, pa motibo cu den e tempo ey, na 1891, tabatin e revolucion industrial cu tabatin su impacto negativo riba esnan di menos recurso. Tabatin pobresa y e obrero tabata wordo malusa, maltrata y humiya pa su patronnan. Di otro banda e patron tabata bira mas rico a costo di e obrero. Papa a haya cu Iglesa Catolico no por para na banda y keda keto y a dicidi pa skirbi e documento cu a bira famoso cu te dia di awe nos ta papia di dje. Tambe el a splica di con e documento Papal aki a sirbi a bira e fundamento di partidonan politico cu e ideología cristian demócrata y lantamento di sindicatonan cristian.

E di dos orador, drs.Alfred v.d.Helm, kende ta un cientifico na Universidad di Leiden y un autoridad riba tereno di edad medio y semántica, a splica e Rerum Novarum di otro angulo. El a bai bek den edad medio y di ey el a bin te na e Aruba y e mundo di awe. Nada no a echt cambia y te dia di awe nos por aplica e principionan di e encíclica. El a papia mas di e situacion aki banda (di Sur America) y a mustra riba e relevancia cu Rerum Novarum tin pa e politica di awe y di Aruba. Despues di e dos presentacionnan sublime aki a sigui un discusion riba nivel halto. E presentenan tabata bon na haltura di e topico y nan preguntanan tabata directo y al caso. Pa banda di 10’or a sera e anochi aki y e organisadornan por ta mas cu satisfecho. E tabata un éxito den tur sentido di palabra.