Siman pasa e organisacion ku ta representa nos pensionadonan, esta OPPA, tawatin un encuentro ku e vaste commissie Welzijnszaken, familieaangelegenheden, jeugdzaken en volksgezondheid di parlamento. Un conclusion ku mi persona ku ta forma parti di dicho commissie por a tuma ta ku nos grandinan, esta nos pensionadonan, ta lomba kontra muraya den e situacion actual ku Aruba en general ta pasando den dje.!! No ta un secreto ku nos pensionadonan por medio di inkomstenbelasting ta hanjando sumanan grandi pa paga extra, debi ku nan tin un of mas entrada di penshun y e asina jama penshun di biejez den boca di pueblo, esta e AOV uitkering di SVB. Ku e acumulacion di e dos entradanan aki nan ta hanja cobransanan adicional di inkomstenbelasting, locual ta hopi duro mes pa esnan ku ta cobra un penshun abao, p.e. esunnnan di LAGO, pa paga esakinan.

Ku e aumento di e prima di AZV, e hisamento di e invoerrechtennan na juni anja pasa y ku e introduccion di BBO, nos penshunadonan sigur sigur ta esnan ku a wordo mas perhudica, mirando e hecho ku kasi 25% di nan entrada ta bay pa paga primanan social y belasting. Gobierno sin tene cuenta ku nos pensionadonan a introduci dicho leynan ku sosten di e 11 miembronan di MEP. Ta hopi lamentabel ku nos pensionadonan despues ku pa anjasnan a juda contribui na nos economia, awor den nan tempo mayor mester ainda di sigui carga e peso financiero pa nos pais y pa Gobernantenan sigui ku e derochamiento di fondonan publico pa complace nan amigo y familiaresnan.

Mester bin ku cambionan mas pronto posibel pa asina alivia e peso financiero di nos pensionadonan. Pensionadonan no tin e privilegio di hanja un vakantieuitkering. OPPA a dirigi su mes na minister di finansas ku e peticion pa bini ku un reduccion, esta un belastingaftrek riba e inkomstenbelasting. Pero minister a bisa ku no ta posibel pa tal introduccion. Dikon? Akaso no por instrui Departamento di Belasting pa bin ku un cambio of un maneho pa ku esaki? Ta abo ta minister y bo por impone un maneho sin tin ku bin ku cambio di ley, mirando ku e maneho aki lo ta mas voordeliger (mas positivo) ku e ley mes. Aki por conclui ku no tin comprension pa ku e situacion di nos pensionadonan. Un otro parti discriminatorio den e ley di inkomstenbelasting ta ku nos pensionadonan no ta bini na remarka pa e reduccion di e asina jama “verwervingskosten”, debi ku dicho aftrek no ta aplicabel riba entrada di penshun. Pensionadonan ta pagando e prima completo di AZV y como si fuera poko, ku e cambionan ku a tuma lugar den e ley di inkomstenbelasting y AZV awor mester paga e prima for di e Bruto inkomen y no for di e Zuiver inkomen, manera e tawata 2004 bay atras. Den un solo palabra: mester paga hopi mas na AZV debi ku no ta tene cuenta ku interesnan paga na banconan!!!

E asina jama “ouderenaftrek”, ku un persona ku tin 60 anja of mas por a trese den reduccion for di su entrada, por constata ku anja tras anja envez ku esaki aumenta, a reduci esaki durante e ultimo anjanan. Gobierno mas pronto posibel mester bini ku cambionan manera ku ya mi a menciona y en especialmente locual ta trata e gastonan medico ku ta concerni nos grandinan. Cierto remedinan ku antes tawata wordo paga door di e fonds di ziektekosten overheidsgepensioneerden no ta wordo cubri mas door de AZV.

Consequentemente si mester sigui hasi uso di e remedinan aki, e propio pensionado mester cubri esaki. Asina tin hopi casonan conoci y ku a wordo trece dilanti door di OPPA. A wordo priminti na nan ku ora di introduci e AZV, ningun pensionado lo wordo perhudica y ku den ningun sentido lo bay atras! Pero ku e cambionan ku e Gobierno actual a introduci den e Ley di AZV a perhudica nos pensionadonan enormemente. Locual ku e organisacion OPPA ta boga pe ta pa mas pronto posibel Gobierno bin ku cambionan den e Ley di AZV unda ta duna e pensionadonan nan derechonan adkeri bek promer ku introduccion di AZV.

Partido AVP semper a Sali na vanguardia di nos grandinan. No mester lubida kon partido AVP den pasado a redobla e penshun (AOV uitkering) di nos grandinan. Por korda ainda kon sr. Nelson Oduber a bisa ku esaki hamas lo por sosode! Contra tur obstaculo AVP a hiba un lucha fuerte y asina tambe a cumpli ku su promesa ku e la hasi na nos grandinan, esta di redobla e penshun di viejes.

Den fraccion di AVP nos pensionadonan sigur por konta ku e sosten necesario pa asina jega na contribui na e deseonan y necesidad di nan unda ku via e organo mas halto, esta parlamento, lo bay trese proposicionnan pa ku e cambionan necesario ku tin di tuma lugar pa asina trese un alivio pa ku nos grandinan den e tempo dificil actual ku Aruba ta confrontando ku ne!