Un cambio di accento grandi ta locual e fraccion di AVP ta bai propone awe durante di tratamento di presupuesto di Finanzas pa 2007. Enfazis ta riba corta gastonan coriente y inverti den enseñanza, asistencia social, infrastructura y promocion di turismo. Esaki concretamente den un amienda hopi detaya riba presupuesto 2007. E amienda di fraccion di AVP ta mustra cu e presupuesto 2007 di Gabinete Oduber ta mustra un biaha mas cu no tin cuestion di un coordinación of disciplina pa loke ta trata un maneho di presupuesto. E gastonan coriente halto causa dor di e crecemento enorme den e post di salarionan y toelage den e ultimo añanan no ta wordo maneha y corehi. E productividad di e gastonan extra aki ta menos cu nada. Na mes momento e inversionnan di gobierno a keda na un nivel iresponsablemente abao y construccionnan riba e base di lease ta empeora esaki. E concecuencianan pa e structura di nos economia, enseñanza, infrastructura y cuido social masha preocupante. Confronta cu e situacion aki e fraccion di AVP ta entrega e amienda aki cu e intencion pa e retraso den inversion worde recupera. Enseñanza, infrastructura, promove turismo, ta condicionan necesario pa e desaroyo economico di Aruba. Bienestar di e comunidad tambe mester wordo eleva y e fundéshi di existencia social di pueblo no mag sufri bao di e actual malgobernacion financiero di e gobernación publico. Na e disminuicion di entrada real di cada habitante di Aruba mester bin un fin.

Meta di e amienda di fraccion di AVP ta:

• E inversionnan di pais Aruba mester wordo hisa na un nivel aceptabel di 5% di nos BBP.

• E desaroyo di Aruba ta exigi un alcanse di inversionan di e infrastructura fisico y den capital humano.

E ultimo añanan e inversionnan tabata hasta insuficiente pa por a reemplasa y renoba camindanan, edificionan escolar y otro gastonan fiho. “Afschrijvingen” a keda atrás. Corda mes cu expansionan a tuma lugar. Tampoco a wordo inverti bastante den promocion di nos turismo, conocimento y formación di nos yiunan y e población activo. Un negligencia enorme di e structura di nos economia ta e consecuencia. Un parti grandi di e inversionnan cu si a wordo haci, tabata cana via FDA, un fondo cu contribución di Aruba y Hulanda.

Den un maneho nobo di AVP e retrasonan di inversionnan mester wordo recupera, esaki tanto den infractructura fisico como conocemento economico, enseñanza, ICT y e “vangnet” social. Esaki mester pone Aruba riba e caminda di un fase nobo di desaroyo social-economico. Cu e cambionan aki den presupuesto e fraccion di AVP ta duna un empuhe den direccion di un linea nobo di prioridadnan cu mester tuma lugar den e presupuesto politico di e pais.

E cifranan di e presupuestonan di Banco Central ta mustra claramente cu e problemanan den e deficit di presupuesto no ta dor di no tin bastante recurso- cu al final di cuenta ta crece cada aña considerablemente - pero ta wordo ocasiona dor di e gastonan excesivo di e aparato gubernamental. Punto principal di e amienda di fraccion di AVP ta hisamento di inversion pa enseñansa, infrasctructura, promocion di turismo y cuido social principalmente den e fundéshi di existencia di pueblo. Pa por logra e meta aki na un forma cu ta budget neutral, firmantenan ta bin cu proposicionnan economisante pa cambio di e plan presupuestario di 2007. E cambionan aki ta trata economisacion haci den tur ministerio pa compensación di e inversionnan eleva. E amienda di fraccion di AVP ta pone 5 miyon extra pa asistencia social. E lider di fraccion mr. Mike Eman ta bisa cu ta bai crea un “schoolkindretoeslag” pa cada mucha bao 18 anja cu ta biba den un famia cu ta biba di onderstand. Riba e bijslag cu e jiu aki ta haya ta bin aserca Afl. 100,== pa cada mucha mensualmente. Tambe ta aumenta onderstand cu 10%.

Tambe ta pone 5 miyon pa drecha school. E amienda di AVP ta menciona 15 school cu mester reparacion rapido y e fraccion di AVP ta pone placa pa esaki. Otro materia di deteoro den pais cu ta haya atencion di fraccion di AVP ta e situacion di caretera. Den e amienda di AVP ta pone 5 miyon extra pa “wegenfonds” pa traha riba careteranan di nos pais cu mester di inversion rapido.

E fraccion di AVP ta pone tambe 4.6 miyon florin extra pa promocion di turismo. Ultimo anjanan gobierno a corta den promocion di turismo mientras cu cifranan ta mustra un caida preocupante den turismo di 2006 compara cu 2005. E promer lunanan di 2007 no ta mustra asina alentador tampoco. “Nos tin cu para e caida aki y parti di esaki mester worde logra cu un promocion nobo y mas intenso di Aruba, mr. Mike Eman ta bisa. Pesey a aloca placa den e presupuesto cu tabata destina pa gastonan inecesario y pone pa e prioridadnan nobo aki, e lider di fraccion di AVP ta bisa.