Lesa version na Hulandes

Durante tratamento di e reunion publico riba e Presupuesto di Finanzas y Economia e fraccion di AVP lo presenta un amienda riba e presupuesto di Finanzas caminda ta corta den gastonan innecesario pa sirbi como “dekkingsmiddelen” pa cubri pa cambio di prioridad den presupuesto di pais Aruba. Ta trata di un alternative cuantifica. Eman ta bisa cu fraccion di AVP a scrutina e presupuesto y apesar cu ya mas di mitar di anja a pasa caminda hopi gasto ta haci caba of ta congela toch a haya suficiente “postnan” caminda por reduci gasto pa por cubri pa inversionan cu ta necesario den desaroyo social, ensenjansa, infrastructura y promocion di turismo.

Gobierno ta gastando mucho placa na gastonan coriente y inversionnan ta keda atras. E gastonan coriente ta disproporcionalmente halto compara cu su inversionan. Pesey edificionan, caretera, ensenjansa y asuntonan social y economia ta sufriendo un deteoro. E amienda di fraccion di AVP ta propone pa corta 19.6 miyon na gastonan inecesario cu e fraccion ta menciona specificamente (post pa post) y ta pone e suma aki pa: 5 miyon extra pa inversion den cuido social (introduccion di un schoolkinderentoeslag di Afl. 100,== ariba e suma di bijslag pa cada mucha di un famia riba onderstand) y indexering di e onderstand basico, 5 miyon extra pa inversion den renovacion y mantencion di schoolnan; 5 miyon extra den mantencion y renovacion di caretera; 4.6 miyon extra den promocion di turismo.

E 19.6 miyon florin aki fraccion di AVP a busca den reduccion di gastonan riba postnan den presupuesto y no dor di busca otro entrada adicional pa gobierno cu comunidad tin cu paga.

E reduccionan den e cambio y den amienda den presupuesto 2007 cu fraccion di AVP ta propone ta entre otro den e postnan “Salarissen en Toelagen” (keda sin yena vacaturanan cu ta habri den e resto di anja); Premies (esakinan di e vacaturnan cu no ta worde yena); Reis-en Verblijfkosten; Telefoon, Fax en Internetkosten; Huurgebouwen; Voorlichting en Promotie (cu excepcion di promocion pa turismo, salubridad y ensenjansa); Deskundig Advies; Overige Uitbestedingen; Overige Kosten. E lider di oposicion, mr. Mike Eman ta bisa cu ta bisto cu por corta hopi mas cu 19.6 miyon for di e prespuesto ora cu esaki worde presenta promer cu e anja pa cual e gastonan ta worde haci. Pa no papia mes di centenares di miyones cu por worde reduci den cuater anja cu un maneho eficiente, transparente y cu control di gastonan stringente den e postnan “Salarissen en Toelagen”; “Goederen en Diensten” y “Werkgeversbijdrage”.

Desde 2001 Gabinete Oduber a gasta 410 miyon extra na postnan aki.162 miyon florin extra na e post “salarissen en toelagen”; 175 miyon florin extra na e post “goederen en diensten”; 70 miyon florin extra na e post “werkgeversbijdrage”.

Pa e fraccion berde e amienda alterantiva aki ta un ehempel cu cos por bai hopi diferente. Pa futuro AVP kier soluciona e problemanan aki na un forma structural y asina ofrece Aruba otro perspectivanan. Ta pesey mes cu partido AVP ta traha cu un cantidad di expertonan tanto local como internacional y tambe su propio institututo cientifico pa yega na solucionnan pa pais Aruba. “Nos ta sigui un procedura solido pa por defini un vision pa e pais aki”. Eman ta haci referencia na tantisimo seminarionan y symposia cu su partido y organonan di conseho a organisa y ta menciona e raportnan y estudionan cu a base di e metodo aki AVP a y ta prepara. Cu e preparacion y e equipo nobo AVP lo deshaci di e desaster cuminsando riba e “day-after” di gabinete Oduber.

A base di e estudionan aki y “brainstorming” amplio ‘Plan Aruba’ a wordo desaroya. Ta pesey cu den un maneho nobo di AVP e situacion ta wordo ataca na nan rais. E vision di Plan Aruba ta pa kita e desbalance financiero cu gobierno a causa. E ta pa na un forma bon y dirigi sostene e economia y pa reestablece e confiansa. Henter e Plan ta basa tambe riba principio cu gobierno no mag di gasta mas cu e ta haya na entrada. Esey kier men: un balanse den presupuesto y un saldo financiero den concordancia cu e inversionnan.

Globalmente bisa, gobierno maneha pa partido AVP den un periodo di cuater, lo reduci e gastonan cu 150 miyon y e entradanan, haya principalmente di belasting directo y indirecto, lo subi cu mas o menos 150 miyon a base di un crecemento real di nos economia di 3% pa aña. Cu un maneho di AVP e restructuracion ta suma un total di 300 miyon. E gobierno di AVP lo usa e placa aki pa di un banda ahusta e deficit financiero di gobierno di acuerdo cu e inversionnan, di otro banda lo usa 50 miyon extra den enseñansa, 50 miyon den un programa pa esnan socialmente debil y 50 miyon na inversionnan extra den entre otro infrastructura.

Eman ta bisa cu e pensamento di restructuracion aki di e forma con ta utilisa e entradanan di pais Aruba ta worde sosteni tambe pa e rapport di “The National Commission on Public Finance (NCPF) “. E no ta simplemente un balance budget, pero con bo ta inverti e recursonan di pais. Eman ta cita NCPF: “how best to limit and control the growth of government current expenditure, the size of government employment and to change the mix of public expenditures”.

Mr. Mike Eman te enfatisa cu e maneho di rescate cu AVP ta ofrece no ta encera solucionnan parcial (pues no temanan los riba un lista di deseo), pero cu e ta ofrece solucionnan total cu ta real, structura y debidamente presupuesta, cu a wordo prepara na un forma profesional, profundo y responsabel. Esaki ta keda demonstra den e amienda aki di fraccion di AVP y e vision cu ta bin hunto cune.