Durante tratamento di presupuesto 2007 di Finansas y Asuntonan Economico tabatin hopi discussion ariba e asunto di entrega di rapportnan di Centrale Accountants Dienst (CAD). Gobierno, en particular e Minster di Finansas kende ta responsabel pa dicho dienst, te cu ainda no a entrega Parlamento ningun rapport di CAD, apesar cu den diferente caso durante e ultimo anja y mei diferente miembronan di Parlamento a pidi pa e raportnan aki.

Durante reunion di persupuesto 2007, cual a cuminsa dia 4 juni, e asunto di raportnan di CAD ya caba a ser treci dilanti. Minister a indica cu el ta pidi CAD saca copia di dicho rapportnan, mientras cu e lo ta pidi advies huridico ariba e asunto aki. Na inicio di e reunion di 5 juni a bolbe atende Minister ariba e asunto di rapportnan di CAD, pero e ta keda para ariba su punto.

Sinembargo, a base di discusion encuanto di dicho raportnan durante e reunion di dia 4 juni ya caba tin copianan di raportnan di CAD ta drentando den brievenbus. Un di e rapportnan aki ta trata di un investigacion di CAD encuanto gastonan y entradanan pa 2004 di Douane. Locual ta resalta den e raport aki ta e hecho cu CAD ta atende Minister di Finansas ariba e hecho atrobe tin di haber cu no-realisacion di entradanan procedente di impuesto. Causa di e no-realisacion di di entradanan, segun analysis di CAD, ta e hecho cu e entradanan pa 2004 presupuesta pa Douane a ser infla cu no menos cu Afl 54 miyon.

Den e mesun raport ta indica cu den un raport di e anja anterior ya caba CAD a atende Minister ariba e consequencianan negativo ora ta presupuesta entradanan procedente di impuesto indirecto na un base no-realistico, sin tene cuenta cu projeccion a base di experiencia cu Douane a entrega. Ta conseha Minister den e raport, ora ta trata di entradanan presupuesta, pa atene na e nivel di entrada cu Douane ta indica. Esaki como cu e cifranan di dicho departamento ta realistico y ta basa ariba experiencia. Pues, den e proceso di traha e presupuesto 2004, mescos cu tabata e caso den 2003 segun e raport di CAD, tabatin iregularidad a tuma lugar, caminda intencionalmente a infla e entradanan di Douane.

E strekking di e raport aki ta ilustra claramente e importancia di raportnan di CAD ora ta trata di eherce control ariba gobierno. E balor di e conclusionnan di investigacion di CAD pues por aporta na mehora functionamento gobierno, y sigur mester ta publico, esta habri pa tur hende. Na otro un banda, ta bira hopi claro pakiko Minister di finansas no kier saca raportnan di CAD, considerando con compromitente esakinan por resulta pa Gabinete Oduber.