“E actual areglo di bijstand di Aruba conoce un bijstand primaria pa cabes di famia (Afl.325,==) y un bijslag adicional (140) pa cada miembro di e famia. E bijstand y bijslag aki a keda atras den e desaroyo di costo di bida. Pesey e amienda di AVP kier pa recupera e restraso aki y ta propone pa hisa e bijstand y bijslag cu 12%”, e lider di fraccion di AVP, mr. Mike Eman ta bisa.

Banda di e posibilidad pa un vez pa anja pidi un bijstand pa gastonan di scol no tin otro ayudo extra pa mayornan cu tin yiunan cu ta bayendo scol, mientras cu particularmente gastonan di muchanan cu ta bai scol a subi considerablemente. Gastonan pa cuminda, pa scol, pa transporte y gastonan di remedinan pa mucha cu no ta wordo cubri dor di AZV, ta pisa hopi riba e casnan.

E entregantenan di e amienda di AVP kier pa e motibonan aki duna mayornan cu ta biba na Aurba y cu ta depende di un bijstand un ayudo financiero extra (un asina yama schoolkindrentoelage) pa yuda den cuido y mantención di e miembronan di famia (muchanan) te cu 18 aña. E mayor cu como cabes di cas tin derecho riba bijstand ta bin na remarke tambe pa riba e bijslag pa miembro di famia haya un schoolkinderentoeslag pa cada miembro di famia te cu 18 aña cu ta bai scol. E suma aki ta wordo postula na Afl 100,== pa cada mucha pa luna. Asina ta cu e bijslag pa cada miembro di famia te cu 18 aña cu ta bai scol ta wordo aumenta cu e suma di e scoolkinderentoeslag. Eman ta splica cu e dos cambionan aki cu AVP ta trece den bijstand ta bai juda un famia considerablemente. Eman ta duna e ehempel cu un mama soltero awor cu dos jiu cu ta haya onderstand ta haya Afl. 325,== como cabez di cas y Afl. 140 pa cada mucha na total Afl. 605,==. Cu e cambio cu AVP ta presenta e mama soltero cu dos yiu bao di 18 anja ta haya Afl. 364,== como cabez di cas y pa cada mucha Afl. 157,== di bijslag y Afl. 100,== schoolkinderentoeslag pa cada yiu, en total Afl. 878,== . Un aumento di Afl. 273,==.

Eman ta bisa cu den presupuesto 2006 Minister a duna cifra cu tabata tin na disposicion mustrando cu tabata tin 2344 cabez di cas riba bijstand y 1778 hoben den un famia di bijstand. E 5 miyon adicional cu AVP ta pone mester cubri pa e indexering di bijstand cu 12%, di bijslag cu 12% y tambe di e introduccion di un schoolkindrentoeslag Afl. 100,== pa cada mucha.

Pa logra esaki nos no a subi gasto di gobierno, pero nos a corta den gastonan inecesario y cuminsa austerisa riba e cantidad di personal di gobierno. Den esaki ta sali for di un “vacaturestop” cu no ta pone hende di nobo den majoria servicio ora un lugar bin vacante.

Mike Eman ta bisa cu na unda hendenan mester biba pa temponan largo of structuralmente di un entrada abao, sin cu nan mes por haci na esaki, no por biba cu nan placa, tin un chens grandi cu pobresa ta lanta cabes. Esaki hopi biaha ta bai man den man cu un isolacion social. E haltura di gastonan fiho y e gastonan di bida diario ta indicativo si ta posibel cu un hende por biba di un cierto entrada. E aumento di prijsnan di cuminda, di vivienda, di coriente y awa a subi enormemente, mas cu e prijsnan total. E aumento di e gastonan aki sin un indexering igual di e sumanan di bijstand y bijslag tin un influencia masha negativo mes riba e calidad di bida di e cuidadano cu sea temporalmente of pa tempo largo ta depende di e entrada abou di bijstand. E hecho cu un parti creciente di e casnan na Aruba cu un entrada abou bijstand, no por of casi no por biba cu e placa aki, mester di atencion urgente. Pesey AVP a bin cu e amienda aki, e lider di AVP, mr. Mike Eman a splica.