Durante tratamento di e presupuesto di Ministerio di Salubridad Publico, Medio Ambiente, Asuntonan Administrativo y di Estranheria pa aña 2007 di Minister Booshi Wever, e fraccion di AVP den Parlamento a mustra e Minister cu tabatin un déficit no motiva di algun miyon den e presupuesto di e compania sui generis di gobierno cu entre otro ta encarga cu pikimento di sushi, SERLIMAR. E déficit aki ta wordo estima riba 19 miyon.

E descubrimento di e buraco aki a cuminsa cu e pregunta explicito di e miembro di fraccion di AVP, Mike de Meza na Minister Booshi Wever durante e puntonan di pregunta si gobierno tin e pretencion di cobra casnan pa recohe sushi. E Minister a anuncia cu no ta intencion di gobierno pa cobra pa recohe sushi di cas. Solamente di un cas kier un di dos container lo mester paga pa esaki. E contesta aki a straña e fraccion di AVP mirando cu den e post “demas gastonan” di e presupuesto di e Minister solamente un suma di 15,5 miyon florin pa SERLIMAR a wordo presupuesta, pero cu den e presupuestonan di SERLIMAR cu AVP a studia ta resulta cu e gastonan total di SERLIMAR presupuesta pa aña 2006 tabata 32 miyon y cu Minister den su contestanan anterior riba preguntanan di Staten a bisa cu e gastonan di SERLIMAR a wordo estima na e suma di 34 miyon pa 2007.

Si SERLIMAR no ta bai cobra pa pikimento di sushi di casnan na Aruba, di unda anto ta saka e suma pa paga e déficit di 19,9 miyon aki, tabata e pregunta di AVP. E Minister riba esaki no tabatin un contesta fiho. E pregunta a trece consternación den Parlamento. E fraccion di AVP a exigi pa haya documentación den cua por saka afo cu SERLIMAR a pone gobierno na haltura cu ya caba tabatin un déficit grandi na 2006 y cu awor e ta exigi mas placa ainda di gobierno pa cubri su gastonan. Dor di nenga di pone e documentación aki na disposición di Parlamento a causa un emocion grandi. E otro dos partidonan di oposición MPA y RED a sostene e petición di fraccion di AVP den su demanda pa haya clarificacion den e déficit scondi aki.

E Minister a keda para ariba cu esaki ta e suma cu gobierno a pone disponibel pa SERLIMAR. Si nan tin un déficit anto e ora lo mester corta den e presupuesto of busca otro manera pa yega na e placa dor di fia esaki,. Despues di un sesion di pregunta (vraagpunten) cu lider di fraccion di AVP, mr.Mike Eman, e Minister a admiti cu si SERLIMAR no por cubri e buraco di 19,9 miyon , anto e ora no ta keda nada otro pa bin bek Parlamento y pidi pa hisa e contribución na SERLIMAR. Esaki lo aumenta e deficit cu otro 19 miyon.

Remarcable ta cu no mucho despues di e descubrimento aki Minister di Finanzas Nilo Swaen a bin Parlamento pa delibera cu su miembronan di partido. Mirando e descubrimento aki, fraccion di AVP ta bai manda un carta pa Minister Swaen pa mustra su malcontento riba cu no solamente ta entrega presupuesto laat pero cu ademas e ta resulta di ta un presupuesto falso (nep-begroting) tambe, na unda deficitnan grandi a wordo laga afo pa di e forma aki laga e presupuesto mustra menos negativo. Cu Minister di Finanzas ta dispuesto pa sconde cifranan pa duna un imagen falso na henter oposición ta algo sumamente condenabel. E conducta aki ta wordo afirma tambe den un raport di CAD cu ta masha critico encaunto e forma con Minister Nilo Swaen a pone cifranan incorecto den presupustonan anterior, mientras cu no tin ningun hustificacion pa e cifranan aki. E carta di AVP pa Minister lo mustra tambe riba e hecho aki. Fraccion di AVP ta di opinion cu esaki ta un engaño masha serio mes di Parlamento di Aruba. Ademas según reglanan di prespuesto gobierno mester a pone un “vooziening loonaanpassing” pa empleadonan publico pa adaptación di salario pa 2007. Esaki tambe a keda afor. Un estimacion prudente ta mustra cu un adaptacion di e indice di prijs netto pa augustus 2007 lo bai costa sigur un 55 miyon. Cu esaki e presupuesto di 2007 tampoco a tene cuenta, según e lider di AVP.