Lesa Mocion

Miembronan di fraccion di AVP a pidi Presidente di Parlamento pa yama un reunion di Comision Central cu punto di agenda: “Ampliación di e derecho activo di voto di Staten di Aruba”.

E fraccion di AVP ta splica cu na Hulanda tur Hulandes biba na Hulanda of den exterior di 18 aña p’riba, cu excepcion di esnan cu a wordo exclui di nan derecho di voto y esnan cu ta biba na Antiyas of Aruba y cu a biba menos di 10 aña na Hulanda y cu además no ta traha den servicio publico Hulandes, tin derecho activo di voto.

Na Aruba e derecho di voto ta keda limita na esnan cu tin nacionalidad Hulandes y ta biba na Aruba. Hopi pais a haci posibel pa nan hendenan cu ta bibando den exterior tambe por vota durante eleccionnan nacional.

Miembronan di AVP kier habri den e reunion solicita un discusion riba e posibilidad pa amplia e derecho activo di voto pa Hulandesnan naci na Aruba cu ta biba den exterior y eventualmente pa esnan Hulandes cu a biba legalmente por lo menos 10 aña aki nan. Pa un modificacion asina un cambio den nos Constitución ta necesario, pa cua tanto paden como pafo di Staten un sosten amplio ta wordo importante. Pesey e fraccion di AVP kier habri e dialogo entre tur partido riba e materia aki.

E lider di fraccion di AVP, mr. Mike Eman a splica cu cada vez cu tin un encuentro den exterior cu Arubianonan por nota un interes grandi pa locual ta sosode na Aruba. Tin hopi Arubiano den exterior cu tey pa studia of circumstancianan cu tin tur intencion di bolbe Aruba. Nan ta mantene nan mes hopi bon na haltura riba locual ta sosode na nan pais y lo kier tin e posibilidad pa juda fiha e destino di nan pais. Esaki a bira algo universal caba cu paisnan ta habri e posibilidad aki pa nan nacionalna, Eman ta bisa. Pa locual ta trata e parti logistico e lider di AVP, mr. Mike Eman ta bisa cu por delibera cu Gobierno di reino pa usa e mesun facilidadnan y servicio rond mundo cu Hulanda ta usa pa hacie posibel pa esnan cu tin derecho di voto den exterior por vota pa eleccionan na Hulanda. Nos no ta kere cu lo tin objeccion di parti di Gobierno di Reino ya cu Relacionnan Exterior ta un responsabilidad di Reino.

Eman a bisa cu e legislacion mes no ta cumplica. E ta bisa cu ta algun articulo mester cambia den Staatsregeling y den e Landsverordening di Kiesreglement di Aruba. Naturalmente cambio den Staatsregeling ta 2/3 parti di e voto den Parlamento. Derecho di voto ta algo grandi kiermen mester tin sosten amplio pa cualkier cambio den esaki, Eman a invatisa. E a mustra cu e parti cu ta mas cumplica ta con leuw Bo kier bai. Esnan cu a nace na Aruba y tin nacinalidad Hulandes y ta biba den exterior ta haya drecho di voto. Con ta haci cu esnan cu no a nace na Aruba, pero ta Hulandes y a biba na Aruba y awor nan ta den exterior. Hulanda ta usa e criteria cu Bo mester ta Hulandes y a biba 10 anja na na Hulanda pa haya e derecho di voto den exterior. Esaki ta bira un pregunta importante den e definicion riba kende fuera di esnan cu ta Hulandes y a nace na Aruba por vota den exterior den un eleccion na Aruba. Esaki tambe ta un parti cu lo tin diferente opinion riba dje, e lider di AVP, mr. Mike Eman ta anticipa. Pero alfin mester por sali un decision cu ta duna nos hendenan den exterior e oportunidad pa participa den eleccion na Aruba, mr. Mike Eman ta enfatisa.