Den nomber di Partido di Pueblo Arubano (AVP) Mike Eman a manda un palabra di felicitacion pa sr.Yves Leterme, lider di e partido cristian democrata di Belgica , CD&V cu su logro electoral victorioso riba 10 di juni 2007 den e elecionnan federal na Belgica. Tambe e president nobo di CDA cu a wordo elehi recientemente na Hulanda sr. Peter van Heeswijk, a ricibi un nota di felicitacion di nan  partido ruman berde na Aruba.

Den su nota pa Yves Leterme Eman ta enfatisa cu den e añanan cu a transcurrí partido AVP a estrecha fuertemente e lasonan cu aliadonan cristian demócrata na hopi parti di mundo. Riba diferente nivel intercambionan di experiencia, ideanan y idealnan a tuma lugar. Tambe cu CD&V partido AVP kier yega na un cooperación den un futuro cercano. “Cu cooperacion nos por sigui desaroya nos partidonan di pueblo cu tin un base cristian democrata na interes di pueblonan y paisnan cu nos ta sirbi”, Eman ta expresa den su nota pa Leterme. Tambe Eman ta desee hopi sabiduria y forsa den formacion di un gobierno fuerte pa Belgica. Yves Leterme ta un candidato fuerte pa bira e siguiente Prome Minister di Belgica.

Den nomber di Partido di Pueblo Arubano AVP ta felicita tambe Peter van Heeswijk kende a caba di wordo elegi como president di partido CDA. Eman ta señala cu e bon relacion cu CDA ta data di hopi tempo atras, pero cu ta durante e periodo di e reciente presisidente sra.Marja van Bijsterveldt y bao guia di Jan Peter Balkenende e relacion aki entre AVP y CDA a wordo amplia. Hunto cu e presidente nobo di CDA partido AVP ta compromiti pa haci tur su esfuerso pa traha den interes di e pueblonan y paisnan dentro di Reino. “Como un partido cristian democrata trahando den un comunidad chikito nos ta masha agradecido pa e sosten y cooperacion esencial cu nos ta hayando di nos partido ruman na Hulanda, CDA, lider di AVP Mike Eman ta conclui. Riba foto lider di AVP, mr. Mike Eman, su esposa Doina Eman y Marja van Bijsterveldt cu ta worde remplasa como Presidente di CDA dor di Peter van Heeswijk. Marja van Bijsterveldt a bira awor Staatssecretaris di Ensenjanza, Cultura y Sciencia.