Ku asombro mi a wordo notifica di un susedido siman pasa y na unda mi a keda masha indigna mes pa locual ku ta sosodiendo riba Aruba pa loucal ku ta concerni nos seguridad y esaki tambe ta wordo refleha den pueblo.

Un kiebro y ladronicia a tuma lugar durante fin di siman na un centro ku ta organisa actividadnan pa nos grandinan situa na piedra plat. Polis a wordo jama y a presenta tambe pa averigua un ke otro. Ora a tuma contacto ku recherche ku mester bin pa hasi nan investigashonnan nan a laga sa ku no mester mishi ku nada y ku te dialuna mainta nan lo presenta na e sitio pa hasi nan investigashonnan. Motibo ku nan no por presenta inmediatamente ta ku no tin personal debi na cortamento den e overtime pa ku e Cuerpo Policial. Personanan ku ta encarga ku e centro aki mester a contrata un servicio di un compania di seguridad pa cuida e centro aki te ku dialuna pa asina evita ku anti-socialnan por sigui comete actonan di ladronicia den e centro aki. Aki sigur nos no ta cuestionando nos Cuerpo Policial. Sigur sigur anan ta eherciendo un tremendo trabao pero tin un dicho ku nos tur conoce: no por kibra hero ku man!!! Y esaki ta e realidad ku ta pasando door di e mal maneho di Gobierno door di a corta den e overtimenan di Cuerpo Policial. Consequentemente polis of rechercheursnan no por hasi nan trabao efectivamente debi ku mester tene kuenta ku no tin overtime. Un investigashon riba su mes, manera nos tur sa, ta exigi hopi oranan largo di trabao.

Ta lamentabel mes pa tuma nota kon den presupuestonan di e diferente ministerionan, cuanto miyones di florin ta wordo destina na “deskundig advies” y na huurmento di edificionan di familiaresnan. Un helicopter ku ta costa mas di 800 mil florin pa anja djies pa lease esaki so y asina por sigui menciona e mal maneho y irresponsabel di Gobierno pa locual ta concerni nos seguridad.