Evaluacion nacional na final di klas 6 di Scol basico

Na final di mei 2007 Minister Tromp a tene pa promer ves un evaluacion nacional na final di klas 6 di Scol basico. Segun Minister e evaluacion nacional lo ta na bienestar di e mucha, di e scol y di e enseñansa den su totalidad. Ta importante pa Minister trece claridad pa cu e intencion di e evaluacion nacional, y pa cu e implicacion di e resultadonan di e evaluacion nacional. Alaves ta na su lugar pa minister saca e resultadonan mas pronto posibel pa trece claridad ariba e situacion di enseñansa den scolnan basico, y indica con e ta bai atende cu e situacion den enseñansa basico.

Un tarea primordial di Parlamento ta e control cu ta eherce ariba maneho di Gobierno. Pa por hasi esaki ta rekeri di informacion necesario cu solamente Gobierno por duna. Considerando e situacion den enseñansa na Aruba, y teniendo na cuenta cu recientemente a tene un evaluacion nacional na final di klas 6 di scol basico, miembro di Parlamento señor Rendolf (Andy) Lee tin e siguiente preguntanan na Minister di Enseñansa, Asuntonan Social y Infrastructura, señora drs Marisol M. Tromp, segun articulo III.17 di nos Constitucion y segun articulo 59 di Reglamento di Orden di Staten di Aruba, cu e peticion pa hanja contesta por escrito mas pronto posibel for di e minister aki. Meta di e preguntanan ta pa responsabilisa publicamente su meta y maneho cu e evaluacion nacional na final di klas 6 di scol basico, pendiente di tratamento di su presupuesto 2007 na augustus 2007.

Ta importante pa compronde e racionalidad tras di e evaluacion nacional, pa asina por pone posibel accionnan di minister a base di e resultadonan di e evaluacion den contexto. Minister por a clarifica su meta cu e evaluacion nacional di alumnonan den klas 6 di scol basico? Minister por a indica e resultadonan concreto y directo cu e kier realisa cu e evaluacion di 2007, y indica na ki momento e ta cuminsa traha pa realisa e metanan aki? Den e cuadro aki ta importante pa minister indica ki dia e resultadonan di e evaluacion nacional lo ta disponibel, y manda e resultadonan aki di imediato pa Staten pa asina Staten tambe por tin bista ariba e situacion di enseñansa den scolnan basico. Minister por a indica e fondonan disponibel pa traha ariba realisacion di e metanan concreto den 2007? Of indica e fondonan presupuesta pa 2008 pa traha ariba e metanan aki? Pa compronde e plan di accion di minister, cual logicamente mester sigui a base di e resultadonan di e evaluacion nacional, minister por a indica kende ta e targetgroup primordial di e evaluacion: e alumno cu ta ser evalua of e scol cu e mucha ta atende? E pregunta aki ta importante pa por evalua si e maneho cu lo surgi a base di e resultadonan di e evaluacion lo ta dirihi ariba e alumno of ariba e scol.

 Considerando cu e gruponan di alumno cu a ser evalua na fin di mei 2007 ta bandona e scol casi imediatamente despues di e evaluacion, por asumi cu e scol ta e targetgroup directo den maneho di educacion. Resultado di e evaluacion di alumnonan na final di klas 6 di scol basico pues lo sirbi interes di alumnonan cu entrante e siguiente schooljaar ta of lo bai atende e scol, mediante identificacion y remediacion di problemanan cu e functionamento di e scol. Ta na su lugar pa considera pues cu e evaluacion nacional ta mas bien un instrumento pa evalua e calidad di enseñansa na cada un di scolnan basico na Aruba? Minister por a duna su plan di accion y e middelen cu e tin disponibel pa remedia e situacion di scolnan basico cu ta sali zwak for di e evaluavcion nacional? Fabor di duna e plan di accion pa 2007 conhunto cu su kostenplaatje.

E nivel final di alumnonan di scol basico ta un function di e calidad di enseñansa cu e alumno ta ricibi, en particular for di su maestronan. Según e ponencia aki, e resultado di alumnonan di cada scol ta un refleho directo di e calidad di enseñansa y e ambiente di trabou di e maestronan na e scol en cuestion. Asumiendo pues cu e evaluacion nacional tin como targetgroup primordial e functionamento di scol basico, e resultado di e evaluacion nacional ta implica tambe evaluacion nacional di tur maestro di scol? Of ta bai evalua solamente maestronan di e scolnan caminda un cantidad significante di e alumnonan ta score abou? Minister por a duna un indicacion si evaluacion di maestronan tambe ta forma parti di e plan di evaluacion nacional di scolnan basico? Fabor di indica na ki aña ta cuminsa evalua e maestronan, si acaso esaki ta aplicabel. Den caso cu no ta evalua maestronan di scol, minister por a duna un mihor splicacion encuanto e consistencia interno di e maneho di evaluacion nacional?

Asumiendo cu e targetgroup primordial di e maneho di evaluacion nacional na final di klas 6 ta e scol basico, y observando cu pa e evaluacion nacional e alumno cu a participa no mester a jena su nomber ariba e test, por conclui cu minister no ta asumi ningun responsabilidad specifico pa e alumno cu ta score abou pa e evaluacion? Por conclui di antemano cu minister ta di opinion cu alumnonan cu ta score abou pa e evaluacion tin di haber cu e capacidad di e alumnonan aki y no cu e calidad di enseñansa na e scol en cuestion? Cu e evaluacion nacional ta identifica tambe problemanan individual y colectivo den scolnan basico, en particular den scol basico cu – pa un of otro motibo - no por a percura suficientemente pa un bon nivel di educacion pa su alumnonan. E gruponan di alumnonan cu tin scorenan cu ta significativamente inferior na e promedio, no ta crea cierto responsabilidad di parti di Gobierno of di schoolbestuur? Con Minister ta bai deal cu e situacion aki?

Scenario 2: e alumno como targetgroup di maneho

 Den caso cu e evaluacion ta dirihi primordialmente ariba e alumno cu ta ser evalua, pues e alumno ta e targetgroup di e evaluacion, e maneho ta confronta e dificultad cu e alumno en cuestion ta bandona e scol casi imediatamente despues di hasi e evaluacion. E hecho cu a scoge pa tene un evaluacion cu karakter anonimo tambe ta dificulta mas ainda e maneho den caso cu e ta dirihi ariba e alumno. Ta na su lugar pa conclui cu no ta e alumno cu ta pasa e evaluacion nacional ta e targetgroup di e maneho, considerando cu minister a escoge pa hasi e evaluacion uno anonimo, esta cu no mester a jena nomber di e alumno ariba e formulario?

Den caso cu resultado di evaluacion nacional ta duna indicacion di discrepancianan significativo den calidad di enseñansa entre scolnan basico, ki paso Minister lo bai tuma? Esaki kier meen cu si tin scolnan basico caminda un porcion significativo di alumnonan ta score zwak pa e test, indicando fuertemente den direccion cu e scol no por a percura – pa un of otro motibo – pa e alumno jega e nivel rekeri den klas 6, e alumnonan aki lo no hanja algun typo di ondersteuning of nazorg di Ministerio di Enseñansa, ya cu minister a scoge concientemente pa no identifica e score di cada alumno door di hasi e evaluacion uno anonimo? E escogencia pa hasi e evaluacion nacional uno anonimo, ta cualifica e alumnonan di klas 6 di scol basico como simple “Guinea pigs” di e experimento di minister Tromp, sin cu nan mes tin beneficio di e evaluacion nacional? A base di e evaluacion nacional anonimo por conclui di antemano cu minister no a pone fondonan disponibel pa 2007 y 2008 pa nazorg di alumnonan cu a score zwak pa e evaluacion nacional?

Den caso di diferencianan significante den nivel di score entre scolnan, kendenan lo ta promer jama pa remedia e diferencia aki entre scolnan basico? E scol en cuestion, e schoolbestuur of Departamento di Enseñansa? E resultado di e evaluacion nacional por tin implicacion pa e fondonan cu ta ser aloca pa scolnan basico?