E cambionan fiscal desde 2006 tabatin tin como meta principal pa trece mas placa den caha di gobierno. Apesar cu ingresonan di gobierno a crece drasticamente entre 2001 y 2005, por a constata cu e gastonan publico a aumenta mas ainda. Ta juist pa evita di boltu e patrono halto di gastonan publico, gobierno a implementa difertente cambionan fiscal desde 2006. Y mester bisa cu na 2007 Gabinete Oduber ta ricibi un suma di Afl. 90,7 miyon extra na entrada, mientras cu ta bai gasta Afl. 8,6 miyon mas. A pesar di tur e entradanan extra aki, na final di cuenta gobierno ta hanja su mes ta prestando hopi mas placa di locual a presupuesta, pa cubri tur e gastonan di e anja presupuestario 2007. Te cu awor na juni 2007, un suma extra di alrededor di Afl. 43,7 miyon lo mester ser presta pa cubri gastonan extra di 2007, entre cual pa cubri e amienda di Partido MEP cu ta costando Afl. 9 miyon mas na fiansa.

Pero, locual ta trece extra den caha di gobierno, ta ser saca for di saco di otronan. No mester perde for di bista cu esnan cu ta pagando pa tur beneficionan aki, no ta e mesun cu esnan ta ricibiendo e beneficionan di entradanan extra. Por ehempel, ntroduccion di BBO na 2007 ta trece “ganadornan” y “perdedornan,” ora ta midi esaki den termino di posicion economico actual, esta e standard di bida cu ta hibando, compara cu locual e tabata promer cu BBO. Esnan cu por a logra pa mantene standard di bida despues di introduccion di BBO, por ser considera como “ganador” den e situacion nobo aki. Sea ta pertenece na e grupo cu ta pagando mas, of ta pertenece na e grupo cu ta beneficiando mas. Ta bon pa cada ken na Aruba evalua pa su mes na cual di e dos gruponan e ta pertenece awor cu BBO tin casi mei anja na vigor.

Locual ta hopi cla ta cu gobierno si ta pertenece na e grupo di ganador, cu tur e entradanan extra cu ta ricibiendo. E caha di gobierno ta jena cu mas placa, y su “poder di compra” si ta aumenta drasticamente. Pues, gobierno si a traha mas espacio financiero y a aumenta su poder di compra. Sin embargo, tur cos ta pinta cu e espacio financiero di gobierno lo no ta suficiente, manera a demonstra caba den pasado cu no tin placa pa jega.

En cambio, e poder di compra di hopi famia na Aruba si no ta cana den mes un tred cu esun di gobierno. Ya promer cu BBO tin hopi famianan tabata biba na frontera di un existencia decente cu cualkier famia merece. Esaki no ta solamente pa e hecho cu nan tin di biba di salario abou, pero tambe paso hopi famia tin gasto relata na cumulacion di debe. Debe pa por jega na un cas propio pa nan famia. Debe pa tin un auto pa bai trabou y pa hiba juinan na scol. Debe pa por paga gastonan halto relata na salud. Banda di e debenan aki, tin gastonan halto pa duna juinan un bon educacion y mihor oportunidad den bida, pa gastonan di awa, coriente y transporte. Tur e gastonan aki ta limita e entrada disponibel pa gastonan manera cuminda, recreacion, etc. Considerando e aumentonan drastico den prijsnan general na Aruba, ta e consumidor local, esta e famia local, ta esun cu ta keda afecta na final si e no logra hanja suficiente compensacion.

Ora ta biba den un situacion semehante, cualkier aumento den prijs ta ensera un bida mas humilde y tambe control mas severo di e situacion financiero di e famia. E poco luho cu por a permiti anteriormente ta desaparece. Lo mester corta gasto ariba participacion social (hobby, sport, hasimento di anja, pasco, etc.) pa logra sera e luna. E entrada fijo no ta jega mas pa paga costonan fijo, pa cumpra cuminda, paga awa, coriente y transport, pa educacion, etc. Si considera con gobierno a bini ta pasando mas gastonan pa trahador y pa dunador di trabou den e ultimo anjanan, por puntra bo mes si e cambionan fiscal, entre acual introduccion di BBO, a resulta beneficioso pa standard di bida di hopi famia na Aruba. Tur indicacion ta mustra den direccion cu esaki no ta e caso. Bida na Aruba ta birando mas duro pa hopi famia. E maneho financiero di Gobierno ta hasi, mediante aumento di impuesto, di primanan y consecuentemente di prijsnan, cu e disciplina financiero di e famianan aki lo mester ta mas rigoroso pa por sobrevivi. Pa diverticion sano ya casi no tin placa. E prosperidad cu a priminti pueblo no a bati na porta di tur famia na Aruba.

En cambio, por constata con Gabinete Oduber ainda no kier hiba e disciplina financiero rigoroso y necesario pa pone su cuentanan financiero na ordo. Ta sigui pasa su gastonan aki pa otronan den nos comunidad, pa asina por sigui gasta sin limite. Hasta fraccion di MEP den Parlamento ta contribuyendo na aumenta gastonan - y pues e debe - di Pais Aruba cu Afl. 9 miyon mediante un amienda ariba presupuesto 2007. E gobierno actual ta hibando un maneho financiero sin vision y disciplina, cu consecuencia negativo pa prosperidad y oportunidad economico di nos Pais, su hendenan y comercio local. Ta jega tempo pa exigi un maneho financiero mas profesional y integral di Gabinete Oduber. Un maneho finanaciero cu si ta cana den linea cu necesidadnan social - economico y comercial, y cu ta dirihi na stimula bienestar y oportunidad social – economico di famianan y di comerio.