“Den fin di siman e 27 lidernan gubermental, hefenan di estado di e paisnan miembro di Union Europeo a yega na un acuerdo riba e concepto di un texto pa un tratado nobo cu mester remplasa e Tratado pa establace un Constitucion pa Union Europeo. Den e texto di e Constitucion nos a logra e tempo ey un opcion pa Aruba por cambia su status pa cu Union Europeo den futuro. Nos tabata sumamente contento cu esaki, e lider di AVP, mr Mike Eman cu mas cu dos anja a bin ta lucha pa e opcion aki a expresa na prensa. Nos tin cu segura cu den e texto nobo e opcion aki ta bini bek. E promer indicacionan ta mustra cu esaki lo ta e caso. Eman ta bisa cu e texto di opcion tabata un amienda riba articulo IV-4 paragrafo 7 (nobo) di e Constitucion di Union Europeo y ta bisa literalmente:

“7. The European Council may, on the initiative of the Member State concerned, adopt a European decision amending the status, with regard to the Union, of a French, Netherlands or Danish country or territory referred to in paragraphs 2 and 3. The European Council shall act unanimously after consulting the Commission”.

Eman ta bisa cu apesar cu e exigencia di “unanimidad” di parti di tur e paisnan den Union Europeo, awor 27 en total, naturalmente ta uno poco pisa cu por tabata otro si gobierno di Aruba en especial Promer Minister Nel Oduber a actua otro. Expresionan manera “UPG ta un dode mus” cu “no ta confia hulandesnan” y tambe e mocion iresponsabel cu MEP a pasa den parlamento contra opcion a haci hopi danjo. Esaki tur ta cosnan cu naturalmente a stroba nos masha hopi mes e tempo ey, Eman a expresa.

Sinembargo, e lider di AVP, mr. Mike Eman ta bisa, nos a insisti cu Gabinete Oduber no tin e derecho di kita e pueblo Arubano un opcion, nos a planta esaki den Tweede Kamer, den Eerste Kamer y serca Gabinete Balkenende y nos a haya oido. Asina e opcion a bin den e concepto di e Tratada pa yega na establece un Constitucion pa Union Europeo. Desde e momento cu nos a presenta nos promer nota “Koninkrijks- en Europese verhoudingen; een appèl voor een nieuwe benadering” y a pone e topico di Union Europeo riba mesa nos a keda bringa pa un opcion. E tabata algo historico cu un lucha inicia for di bankinan di oposicion pa mustra riba oportunidadnan nobo pa cu Union Europeo a yega na e punto cu Reino Hulandes a ancra un opcion pa e pueblo Arubano den e Constitucion di Union Europeo.

Awor cu e Tratado pa yega na un Constitucion ta conoce un revision grandi, nos mester bai haci esfuerzo atrobe pa e texto di un opcion worde ancra den e tratado nobo tambe, Eman ta bisa. E lider di fraccion di AVP, mr. Mike Eman ta splica cu AVP a entrega na mart 2003 e nota “Koninkrijks- en Europese verhoudingen; een appèl voor een nieuwe benadering” na informador di Gabinete Balkenende II, mr.dr.Piet Hein Donner, na Gobernador di Aruba y Antyas, na Stayen di Aruba y Antiyas y a presenta esaki den Tripartiete di maart 2003.

Den henter e proceso aki tabata tin hopi contratiempo, especialmente di parti di gobierno di Aruba mes, pero e proposicion di AVP a haya hopi atencion y sosten durante un gran cantidad di reunion y encuentronan cu dirigentenman di AVP tabata tin cu miembronan di Tweede y eerst Kamer, Minister President Balkenende, e actual Secretario General di NATO, anteriormente Minister di relacionan exterior, Jaap de Hoop Scheffer, Minister di Husticia, dr. mr. Piet Hein Donner y e actual Minister di Relacionan Exterior Ben Bot y e actual Minister di relacionnan exterior y anteriormente Lider di Fraccion di CDA, Maxime Verhagen. Na tur e lider di AVP, mr. Mike Eman ta expresa credito pa e cooperacion cu por a pone UPG riba agenda. E sosten academcio di dr. Mito Croes y consehonan di Raad van State y opinionan di Ernst Hirsch Ballin a duna hopi aporte. A costa hopi esfuerso pa convence Hulanda y otro partidonan politico di Aruba di e importancia di sikiera trata e topico aki den e reunion. Tambe e delegacion di Antiyas den su Nota, den cual a referi na e “gedegen AVP-nota” a sostene e peticion di fraccion di AVP y cu a juda na convence e delegacion di parlamentarionan Hulandes cu mester studia e posibilidad nobo pa cu Union Europeo.

Ningun momento ta asina cu ta Hulanda a presiona e idea di UPG riba Aruba. Mr. Mike Eman ta bisa cu dia a presenta e nota di AVP aki den Tripartiete hopi di e parlamentarionan Hulandes no tabata sa mes kico kiermen UPG y tampoco nan tabata na haltura cu awor lo tabata urgente pa regla algo den e consititucion di Union Europeo pa mayan Aruba tin opcion. E proceso a worde inicia riba iniciativa di fraccion di AVP y e topico aki alfin a worde adopta den programa di Gabinete Balkenende II y a yega te den e Constitucion di Union Europeo. Awor e mester bini den e teksto di e tratado nobo.

A keda demonstra cu algo importante asina pa Aruba cu un trabao serio y sistematico por worde corona cu un resultado historico cu un opcion den e Constitucion di Union Europeo. Esey ta un prueba cu nos por logra pa esaki keda tambe den e teksto nobo, mr. Mike Eman a finalisa bisando. Riba e foto mr. Mike Eman y dr. mr. Piet Hein Donner na e momento ey Informador di Balkenende II. Na e momento ey e Informador ta haya e nota di AVP riba UPG pa tene cuenta cune den e programa di gobernacion di Balkenende II. Esaki a haya debido atencion tambe den e programa aki.