Refleccionando riba e cantidad di violencia y criminalidad cu a asota Aruba atrobe den fin di siman e lider di AVP, mr. Mike Eman a bisa cu locual ta resalta ta cu esnan cu mester mantene leynan den comunidad, nos polisnan, no ta haya e sosten cu mester di gobierno. No ta e helicopter miyonario den aire, of e capitalaso na radarnan sin un maneho sinchronisa, pero ta polis riba caya ta e promer cu nos ta sinti falta di dje pa atende cu situacionnan di criminalidad bao di un grupo di hobennan lantando den famianan, barionan y un comunidad cu no ta haya atencion.

Tin algo fundamental cu na vision di e lider di oposicion mester haya un atencion integral. Esaki ta e deteoro den e fibranan cu ta forma nos sociedad. Eman ta bisa cu nos debe nos ser, nos educacion, nos seguridad, nos salud, nos inspiracion, nos logronan, nos exitonan na nos creador, na nos majornan, na nos famianan, nos amigonan, nos bisinjanan, nos bario, nos comunidad, na nos pais, humanidad y mundo henter.

For di esaki ta nace un compromiso. Nos a sinja esey di chiquito. Atencion pa un amistad di semper, judansa pa un bisinja den dificultad, pa un pober den nececidad, pa un anciano den soledad, caricia di consuelo pa un famia den dolor. Cu gratitud bo ta sinja stima, convivi y comparti. E espirito di comunidad y locual nos mester ta pa otro ta locual ta worde neglisha dor di e gobierno y ta worde kibra cu un maneho cu ta causando pobresa y tension den famia y barionan ronda Aruba, e lider di AVP, mr. Mike Eman ta bisa.

Ora bo duna un famia y un bario e oportunidad pa ta un comunidad fuerte bo ta crea e ambiente den cual di chikito bo ta sinja mira den cara di bo bisinja su dianan pisa y sinti unda abo por ta util p’e. Bo ta sinja y compronde cu no tin stranhero pero unicamente un amigo cu ainda bo no conoce. Bo ta sinja lesa e cicatriznan di nos grandinan, e aprecio y respet cu ta duna honor y gratitud ne caminda duro y largo cu nan a cana. Bo ta sinja carga e sonjonan di bo comunidad y pais y pone bo schoudernan bao di e reto pa un mihor mayan pa un y tur.

Asina den un famia, bario y comunidad sano bo ta crea miles di lineanan invisible di felicidad, amor y respet comparti, cu ta forma e fibranan cu ta mara un sociedad hunto expresa den palabranan manera famia, comunidad, bario, bisinja, orguyo civico y amistad. Esaki ta fundeshi di un sociedad, mr. Mike Eman ta bisa.

Awe sinembargo nos ta bibando den un sociedad cu deteoro grandi den e fibranan aki y concequentemente fracturanan profundo den e pilarnan cu mester carga nos pais. E famia ta worde kibra cu orarionan dobel di trabao y cu un peso incargabel di costo di bida. E animo y espirito di comunidad ta worde fractura cu inhusticia den trato. Sea e trahador, e lider spiritual, e educador, e profesional, e inversionista of specialista tur ta victima di decisionnan cu ta afecta nan labor, devocion, autoridad, esfuerzo, inteligencia, inciativa, estudio y riesgo.

Nos barionan ta worde desintegra dor di deteoro, negligencia, falta di atencion y perspectiva. Nos calor di amistad mutuo ta worde kibra dor di un maneho di division, oprecion y persecusion. Nos confiansa den husticia ta worde kibra pa influencia partidista den decisionnan cu mester ta basa strictamente riba ley y un maneho objetivo di derecho. Institutonan constitucional ta worde marginalisa dor cu nan funccion constitucional ta worde ignora y nan opinion importante pa e “checks and balances” den comunidad ta worde intimida. Nos nacion ta worde kibra cu arogancia di poder. Nos perspectiva pa futuro ta worde nubla cu scuridad dor di falta di claridad den direccion y ausencia total di un proposito comun y un guia nacional di parti di gobierno.

Pesey e lider di AVP ta enfatisa cu Aruba mester di un direccion nobo urgentemente. Un sentido di direccion; un mission comun. Un sentido di proposito; un meta comun. Mike Eman ta papia di un vision cla di Aruba di mayan den cual nos tur por pone confiansa, energia, labor, inventividad y creatividad. Nos mester retorna confiansa den nos systema politico cu un renovacion di pensamento y direccion. Gobernacion mester bira atrobe un manehador integro y responsabel di nos recursonan, un cumplidor cabal di su tareanan, un inspiracion y catilasador pa ideanan nobo, un wardador confiable di nos futuro y di nos imagen den exterior.

E pilarnan di sociedad, e famia, e bario, e iglesia, e school, comisionnan di majornan, e gruponan voluntario social y deportivo mester haya banda di e estado y mercado un rol central, nan espacio, nan estimulo, nan sosten pa nan por juda carga responsabildad den direccion di nos pais y garantisa un desaroyo equilibra, sano y feliz.

Nos mester duna bek e oportunidad na un famia pa ta un famia, cu un balansa husto den momentonan di trabao, momentonan di educacion, momentonan di voluntarismo, momentonan di recreo, momentonan di felicidad y union. Nos mester duna bek e oportunidad na un comunidad pa ta un comunidad, cu e sentido di amistad, orguyo y responsabilidad comparti cu ta duna e forza necesario na calor humano cu ta sostene bida, cu ta duna e seguridad di union bao otro, cu ta duna significacion di nos existencia den assosacion y cooperacion uno cu otro”. Esaki ta posibel tambe den tempo di modernisacion y globalisacion, pero e maneho mester ta dirigi riba esaki y pueblo mester worde inspira cu ehempel y hecho cu esaki ta e caminda di cana, e lider di oposicion, mr. Mike Eman ta enfatisa. E tin confiansa cu e inicio nobo ey lo cuminsa, pasobra ta creciendo un consensus nacional cu asina no por sigui y cu nos pais tin mester di un vision asina pa trece hunto riba un meta comun en busca di e “bon comun” pa tur hende.