Palamentarionan Dowers y Sevinger for di Hulanda a duna un imprecion di locual nan a discuti ariba e tereno di sobrepeso y obesidad. Obesidad y sobrepeso ta un problema creciente y cu lo tin consequencianan serio pa nos comunidad. No solamente ariba tereno di salud pero tambe riba tereno social y laboral lo por spera problema si nos no ataka e problema aki di un forma mas determina. Colega dr. Richard Visser ta un di e personanan cu a mira e desaroyo aki y a hasi un di e estudionan riba e tema di obesidad bao nos hobenan y a pone esaki na atencion di nos comunidad. Mas y mas nos ta mira cu e problema di obesidad ta hanja su atencion den parlamento y cu tin di bai condusi na un maneho integral unda tur actornan riba e tereno aki lo mester waak den un direccion.

E encuentronan den cuadra di tri- partite ta encuentronan fructifero unda expertonan riba e tema di obesidad a trese na un manera cientifico y cu anjanan di studio riba e topico aki nan conclucionnan y nan recomendacionnan. Bao guia di prof.dr. Remy Hirasing di Vrije Universiteit medisch centrum Amsterdam, diferente expertonan a duna un bista di nan investigacion y recomendacion. Segun cifranan disponibel e problema di obesidad na Hulanda a bai cu e mes un ritmo cu Merca y otro paisnan desaroya den e ultimo 25 anjanan e cifra di sobre peso a subi cu 50% di cual 55% ta hende homber y 45% ta hende muher di esakinan 10% di e hombernan ta obessito y 12% di e muher ta obesita.

Bao di e muchanan tambe e cifranan ta precupante. For di tur e investigacionnan aki por mira un gran cantidad di malesanan manera Diabeties, Preshon, Cholesterol y problemanan Cardio vascular (hart- en vaatziekten)ta creciendo y cu consecuencianan serio pa nos salud. E investigacionnan aki ta mustra cu si sigui asina e generacion di futuro lo biba menos cu e sun prome. E problema di obesibab ta un problema cu mas y mas ta cuminsa manifesta na edadnan hoben cu tur consecuencia cu esaki lo tin pa e hobennan y e comunidad cu tin di juda carga e gastonan.

Segun parlamentarionan Dowers y Sevinger por mira cu Gobierno hulandes a instala un comishon cu ta trese varios actornan riba e tereno aki ta hunto pa delinia e maneho tanto riba nivel di municipio como nivel national. A sera un protocol cu tur e actornan manera Gobierno (volks gezondheid), Seguronan, scholnan, federacionan di deporte, centro di barionan y organisacionnan cu ta hasi investigacion. E protocol aki ta duna oportunidad pa stimula tur esnan envolvi asumi nan responsabilidad pa cu e problema, cu no nesesariament ta un problema di e individuo solamente pero tambe di e sociedad. Un asercamento asina lo ta recomendabel pa Aruba.