Lesa Cartanan

Fraccion di AVP a manda un carta pa Minister di Husticia, Rudy Croes den cual e fraccion berde ta urgi e Minister pa documentonan promer cu tratamento di Presupuesto di Husticia den e reunion publico di 5 juli proximo, Fraccion di AVP kier pa Parlamento haya tur documento, cartanan y consehonan relata na: Permiso pa Bingohallen; Toezeggingen pa Bingohallen; Permiso pa Casino nobo; Extension di horario di casino of di cierto casinonan; cambio di maneho di Gabinete Oduber en conneccion cu hazard spelen, speelvergunningsrecht y loterijverordening.

Fraccion di AVP ta solicita pa ricibi e documentonan en cuestion no mas tarda cu un dia promer cu e reunion publico di 5 juli 2007. Esaki ta pa motibo cu fraccion di AVP a bin compronde cu tin un cantida di compromiso pa permiso a worde parti pa bingohallen, casino nobo y extension di horario di casino. Hopi di e compromisonan aki ta sumamente dudoso. Ta intencion di Gabinete Oduber pa crea mas comercio y favorecemento di “friends and family” atrobe riba custia di placa di pueblo cu wega di placa. Lider di fraccion di AVP, mr. Mike Eman ta bisa cu su fraccion kier claridad den henter e asunto aki. Nan no ta favorece un pensamento caminda ta bai pone un cantidad di bingohallen den caya cu ta pone wega di placa comercial asina disponibel 24 ora pa dia 7 dia di siman pa atrae hende lokal.

Mr. Mike Eman ta bisa cu fraccion di AVP kier e documentonan pa mira kico ta intencion di Gabinete Oduber. E lider di oposicion ta bisa cu Aruba ta bibando momentonan cu hopi virtud y valornan sano ta para bao di un presion grandi. Mester stimula un desaroyo den un direccion cu ta crea cohesion den famia y comunidad na e momento aki. E envazis no porta riba stimula wega di placa den un forma asina cu ta afecta e responsabildad cu miembronan di comunidad tin cu nan famia.

Wega di bingo pa nos grandinan un biaha pa siman pa poco divirticion ta un cos, pero expone nos hendenan asina 7 dia den siman 24 ora pa dia na e tentacion di wega di placa no ta sano, e lider di AVP, mr. Mike Eman ta bisa.

Segun e lider di oposicion cosnan ta saliendo totalmente for di man na Aruba. Gabinte Oduber no tin ningun vision coherente unda kier hiba Aruba y con ta bai combina progreso economico cu tranguilidad, harmonia y avance social pa un bon calidad di bida. E ta un “free for all” pa complace cu amistadnan y famianan comercialmente sin evalua kico e valor agrega ta pa Aruba y nos pueblo. Mr. Mike Eman ta bisa cu cos no por sigui asina.