Lesa Cartanan

Aruba a entrega hopi di su naturalesa, di su monumentonan y di su edificionan historico pa a traha caminda pa un desaroyo economico na momentonan transendental den nos historia. Cada vez cu desaroyo economico ta rekiri sacrificio di naturalesa of sitionan di valor cultural y historico nos mester haci e balansa entre e locual nos ta perde versus locual ta logra pa sociedad. Asina e lider di AVP, mr. Mike Eman a expresa relaciona cu e intencion di Gabinete Oduber pa bende e edificio di Bestuurskantoor. Haciendo e balansa aki, mr. Mike Eman no ta mira cu e valor di comercialisacion di Bestuurskantoor ta supera e valor di restaura e edificio y conserve como un parti integral di nos herencia historico. Pa Aruba e proceso largo cu nos a cana pa logra cambionan estatal ta forma un parti importante di e historia di Aruba y di nos identidad como un poblacion cu ta pone metanan su dilanti y ta pone empeño grandi su tras pa logre.

Pa mr. Mike Eman e edificio di Bestuurskantoor ta simbolisa e trajecto historico aki. Tanto e prome parti di reconocimento di autonomia insular, ora cu Aruba a logra su propio gobernacion insular (Bestuurscollege) na aña 1951, cu a worde ubica den e edificio cu ta conoci como Bestuurskantooor, como ora nos a haya nos Status Aparte y Bestuurskantoor a bira e cas di e gobierno autonomo di pais Aruba.

Esaki ta un parti esencial di nos historia. Esaki ta duna tambe e edificio un significacion historico y special pa Aruba, e lider di AVP, mr. Mike Eman ta bisa. Eman ta kere cu Bestuurskantoor hunto cu e edificionan monumental y historico den e bisindario mester worde restaura y forma parti di e karakter di e centro di nos ciudad. E ta kere cu Bestuurskantoor, Parlamento, Oficina di Gobernador, Fort Zoutman, Willem III Toren, cas famia Hart banda di edificio Camara di Comercio, edificio restaura Aruba Bank, edificio restaura Stadhuis, edificio restaura Hotel Colombia (Censo), Biblioteca Bieuw/Rekenkamer (restaura), edificio Museo Archeologico (BUVO) ta forma un circulo di edificionan monumental y/of historico impresionante.

E lider di AVP, mr. Mike Eman ta pensa cu mester mira mas den direccion di crea algo manera un “binnenhof” memei di e edificionan aki y pone nan den un interrelacion pa cu otro. Cu architectura moderno awendia por añadi spacio na un edificio sin kita di su valor historico. Mira e acoplacion di Stadhuis na Hotel Colombia cu un espacio practico adicional pa censo. Otro ehempel ta e edificio di Tweede Kamer nobo di Hulanda acopla na e edificio di Tweede Kamer bieuw. E funccion ta keda tambe den e contexto historico di e edificio bieuw.

Segun mr. Mike Eman envez di sacrifica mas edificio historico den centro di nos ciudad pa propositonan comercial mester mira, tanto na interes di conservacion di herencia cultural como na propio interes di e atraccion di e centro di e ciudad, con ta duna un realse na su valor cultural historico.

Si mira e desaroyo banda di hotelnan cu construccion di un gran cantidad di centronan commercial hopi competitivo pa Caya Grandi G.F. Betico Croes y e centronan commercial den ciudad mester mira kico ta bay duna Caya Grandi y Centro di Ciudad un balor adicional. Esaki pa mr. Mike Eman ta e aspectonan historico y cultural cu mester bay haya un enfoke special. Den esaki e aspecto di un valor historico cultural adicional cu Centro di Ciudad por haya cu un maneho integral di e edificionan monumental y historico ta hopi importante. Eman ta enfatisa mescos pa locual trata den e discussion rond di Ritz Carlton cu nos ta biba den temponan cu nos mester haci otro evaluacionnan cu tempo nos tabata den un crisis economico cu 40% di desempleo. Si trabao pa pueblo ta “schaars” e balansa pa utilisa otro cosnan “schaars” manera ta nos naturalesa y edificionan historico pa crea empleo por cay mas lihe na fabor di desaroyo, pero ora un sacrificio asina no por worde hustifica, anto nos no mester hacie ni pa nos mes y sigur no pa nos futuro generacion. Definitvamente no tin hustificacion pa bende edificionan historico pa motibo di un desesperacion pa placa, pa paga pa un maneho financiero cu ta pone entre otro e entrada di benta bai directamente den saco di famia di gobernantenan cu ta huur gobierno miyones di florin na edificio. AVP a entrega un mocion caba den Parlamento pa para e benta di Bestuurskantoor di momento cu a cuminsa papia riba e topico aki. Parlamento mester aproba un benta di un propiedad di “Land Aruba” segun nos reglanan di comptabilidad. Esnan cu ta participa na asuntonan bao man cu gobierno mester sa cu AVP lo no honra e compromisonan aki. Eman ta pidi respet di tur hende pa proceso habri y legal y pa no presta nan mes pa bira complice den corrupcion. E asunto aki lo bai ta fuente di un turbulencia grandi na Aruba si Gabinete Oduber persisti di bende e patrimonio historico aki di pais Aruba pa traha un otro hotel, mall, hojeria of porta hasta un bingohal. E ta algo absurdo, mr. Mike Eman a finalisa bisando.