“Si bo tende con Promer Minister Nel Oduber a papia promer cu e sali pa Hulanda pa bai busca placa bo ta ripara con golos e hendenan aki ta pa placa y cu nan ta bende nan alma mes si mester”, asina e lider di AVP, mr. Mike Eman a comenta riba e decisionnan cu gobierno a anuncia di benta di Bestuurskantoor y postura diripiente cambia di Nel Oduber promer cu e a bai Hulanda pa bai jora pa placa di Marriott.

“Ta hopi ofensa AVP a wanta riba hotelnan construi cu garantia cu awe ta salbabida pa Gabinete Oduber. Awe e ta desespera pa haya placa di benta di hotel construi cu garantia y di otro banda e ta desespera tambe pa “entrepreneur” cu a bira grandi cu otro hotel construi cu garantia dune placa cu compra di Bestuurskantoor. Nada di cuero di cara a resta e hendenan aki”, e lider di oposicion ta bisa.

No tabata tin ofensa suficiente grandi pa AVP su relacion cu Hulanda, pa AVP su posicion pa cu Union Europeo y UPG, awe e (Nel Oduber) ta bai Hulanda desespera pa placa diripiente e a haya un “mente habri”, referiendo aki na expresionnan di Nel Oduber promer cu e a sali pa Hulanda. E mente hasta ta habri awor pa “homo huwelijk”. Ta cuanto un hende por dobla pa placa , e lider di AVP ta puntra su mes.

“Si aki tabata trata di un vision pa nos pais, di intencionnan positivo pa inverti recursonan nobo, lo bo a concidera cu un hende por cambia di opinion, pero aki ta un motivacion tin: golos pa haya placa den caha pa famia sigui fiesta. Ta inacceptabel pa laga e hendenan aki ruina y “plunder” e recursonan di nos pais pa sigui paga pa e fiesta y deroche di placa. Nan a bende SETAR, acccionnan di Aruba den Raddisson, accionnan di Aruba den Hyatt y awor nan ta desespera pa placa di benta di accionnan di Marriott. Riba lista pa bende ta tambe Bestuurskantoor, Caya Grandi y Waf di Aruba”, e lider di AVP, mr. Mike Eman ta adverti.

Asina ciega nan ta pa placa cu Nel Oduber kier a drenta den Banco Central y bai cu 70 miyon florin di reserva di Banco Central. Si no tabata pa e Presidente di Banco Central, Rob Henriquez, esaki lo a sosode tambe. Pesey awe Gabinete Oduber a core cune tambe. E entrada cu nos ta haya for di benta di un patrimonio di pueblo den un anja ta somenta na e huurnan cu nos ta paga un famia cu ta birando biyonario cu huurmento di edificio na gobierno.

E lider di AVP ta bisa cu pueblo no por soporta mas y gobierno no por conta cu pueblo lo soporta mas. Den e contexto aki Eman ta cita e filosofo grandi, David Hume, cu a inspira e fundeshinan di principionan politico riba cual nos democracia y estado di derecho ta basa. E filosofo a mustra cu legitimitad di gobierno ta basa riba un systema cu ta conta cu tolerancia di pueblo: “Gehoorzaamheid berust niet op gezag, maar gezag berust op gehoorzaamheid”. Autoridad ta depende di obedencia y obedencia no ta un gracia di poder. Esaki ta un pacto di confiansa cu pueblo a entrega podernan natural di dje na un instituto cu ta goberna. E balansa den e forma con ta utilisa e poder otorga aki no mag di worde viola den tal indole cu pueblo ta cuminsa rebeldia, pasobra esey ta su derecho. Eman ta cita Hume mas aleuw: “alle gehoorzaamheid, hoe onontbeerlijk en raadzaam ook, heeft haar grenzen”. Tur tolerancia tin su limite. Ta cu e conciencia aki y cu modestidad aki gobernantenan mester utilisa e confiansa cu pueblo a duna nan. Arogancia y abuso di poder ta kibra e confiansa y na Aruba nos a yega e punto aki.

Un gobierno cu ta plunder e cartera di pueblo y e partrimonio di pais pa financia probecho di familiarnan y amigo no por conta riba tolerancia di pueblo”, Eman ta adverti Gabinete Oduber.