Hustamente na e momento aki den nos historia cu nos ta sinti asina tanto falta di dirigentenan politico den gobernacion cu tey pa pueblo y no pa nan mes ta bai conmemora dos lider politico grandi y stima di pueblo cu den nan trajectoria a resalta den sacrificio total pa pueblo y pais: Henny Eman y Shon A Eman.

E anja aki Henny Eman ta haci 50 anja cu e a fayece riba 17 di Oktober 1957 y Shon A Eman ta haci 40 anja di su despedida inespera y doloroso riba 13 di Juli 1967. Un comision especial lo bai conmemora e dos lidernan stima aki di pueblo dia 17 di Oktober 2007 durante un programa di un siman di conmemoracion di e personahenan grandi aki y nan idealnan pa cual nan a sacrifica y inspira Aruba henter. Nan stimacion pa pueblo y pais nan a pasa di generacion pa generacion. Nan devocion pais ta worde carga pa un generacion nobo cu tambe ta entrega nan mes na idealnan pa duna Aruba un futuro nobo. Conmemorando e idealismo di Henny Eman y Shon A Eman den servicio na pueblo e comision special kier duna honor na nan sacrificio pa Aruba y e ehempel cu nan a laga pa otronan sigui den nan paso di entrego total na pais y pueblo.