Shon A Eman

Aruba ta e nomber cu a compaña Cornelis Albert (Shon A) Eman for di dia cu el a nace dia 17 di mei 1916 te dia cu el a muri, dia 13 di juli 1967. Shon A Eman a lanta di mucha den un ambiente di un dedicacion total na un lucha cu a subscribi esencia di su bida: e lucha pa Aruba bira un pais autonomo den Reino Hulandes, e lucha pa saca e pueblo Arubano for di pobreza pa un futuro cu porvenir. Su tata Henny Eman tabata pionero di e lucha aki, estadista y fundador di Partido di Pueblo Arubano (AVP), e partido politico mas bieu di Aruba. Den e ambiente aki e hoben Shon A mester a tuma un decision pa su bida. Como hoben adolescente, el a accepta su herencia. Aruba tabata tin mester di un abogado, un persona prepara pa yuda defende su causa. Su estudio no tabata p'e un porta pa bira un abogado famoso cu un carera briyante. Pa Shon A e estudio di abogado tabata e preparacion cu e mester a haya pa por a duna e base legal na Separacion, pa e por tabata abogado di Pueblo, e nomber cu el a haya pa su empeño. Na edad di 22 aña Shon A Eman a gradua como abogado y a wordo inscribi como abogado na Corte di Husticia. Abogado den Corte pa e homber pober y humilde. Abogado di Aruba: cu a skirbi e documentonan legal y a vocifera e lucha pa e realizacion di e deseo grandi di Aruba pa haya un Status Aparte den Reino Hulandes. Avance social pa e homber chikito, enseñanza pa e muchanan den tur bario y autonomia pa Aruba y su pueblo ta e aspectonan na cual Shon A a duna su bida. E orguyo di ta Arubiano a wordo transmiti cu cada palabra y gesto di Shon A Eman. Na edad di apenas 23 aña Shon A a wordo yama pa promer bes pa sirbi su Pueblo: eligi miembro di Politieraad na 1939 te na 1951, ora nan a eligie como miembro di Eilandsraad cu introduccion di autonomia insular; miembro di College van Algemeen Bestuur na 1949 encarga cu e cartera di Asunto Social; 16 aña largo el a sirbi su pais den Eilandsraad; Presidente di AVP di 1957 pa 1967; Lider di Fraccion pa su Partido den Eilandsraad y na 1958 a asumi e posicion aki tambe den Staten di Antiyas. Na 1946 Raad van Politie a delegue pa entrega na Su Majestad La Reina e peticion pa Aruba haya un Gobierno propio. Na 1948 e tabata lider di e delegacion Arubano na Conferencia di Mesa Rondo. Durante e conferencia aki, dia 18 di maart 1948, e fecha cu ta recorda te awe como Dia Nacional di Aruba, Shon A Eman a entrega un mocion. Cu acceptacion di e mocion aki e derecho di Aruba pa opta pa un "Afzonderlijke Status" (Status Aparte) pa promer bes a keda reconoci. Shon a dedica su bida na forma y planifica e futuro nobo di su pais. Dia 26 di mei 1967 pueblo a vota na fabor di un combinacion di AVP y UNA/PIA/PRO den Bestuurscollege di Aruba. Dia le di juli 1967 Shon A a mira un soño realiza. Pa prome bes den historia tur Diputado den Bestuurscollege tabata Arubiano. Poco dia despues, dia 13 di juli 1967, Shon A Eman a fayece inesperadamente. E Abogado di Pueblo a muri pober. E no a laga riqueza, pero si e herencia di un lucha. Shon A tabata casa cu Blanche Hartogh, e tabata un tata di ocho yiu. E no a biba pa mira su yiunan crece y bira grandi, pero su memoria a sigui inspira y guia nan. Su yiu homber mayo, mr. Henny Eman, nombra na su abuelo, na aña 1986 a bira e promer Ministro Presidente di Aruba, e pais pa cual tanto Shon A. Eman a lucha y sacrifica su mes: un Aruba autonomo den Reino Hulandes.