Mike Eman a sali diahuebs ultimo pa Caracas, Venezuela, pa asisti na un evento regional importante,  organisa pa O.D.C.A. (Organisacion Democrata Cristian di America), Instituto pa Formacino Popular y C.O.P.E.I. Partido Popular. E evento aki lo tin como tema principal "Democracia y Libertad di Expresion".

Banda di reunionan importante cu dirigentenan di partidonan afilia na O.D.C.A., Mike Eman lo asisti na un reunion cu empleadonan di RCTV (Radio Caracas Television). E compania di television aki a wordo prohobi pa sigui su transmisionan Mei ultimo, pa motibo cu gobierno di Venezuela ta kere cu nan permiso no mester a wordo renova. E reunion aki lo wordo atendi pa varios dirigentenan importante di partidonan afilia na O.D.C.A. na sede di RCTV na Caracas.
Na e reunion aki lo ta presente entre otro Marcel Granier (director RCTV), Manuel Espino (presidente di partido PAN di Mexico y O.D.C.A.), ex-presidente di COPEI. Eduardo Fernández, e periodista conosi William Echeverría (e.o. Globovision) y Alberto Federico Ravell (director Globovision).

Adicionalmente lo tin varios reunionan importante cu ditrectivanan di varios partidonan politico Venezolano, M.U.D.C.A.(Muhernan Democrata Cristian di America), comite directivo di O.D.C.A. y finalmente lo tin un conferencia di prensa e ultimo dia di e evento.

AVP ta un partido Cristian Democrata y ta secretario regional di Caribe pa O.D.C.A. Diadumingo tempran Sr. Eman lo ta bek na Aruba.