Lesa version na Hulandes

Segun partido AVP ta un echo cu gabinete Oduber nunca a demonstra un vision pa loke ta desaroyo di Aruba, pero ultimo tempo e falta di control a bolter y a bira actonan di un desesperacion total. Segun lider di oposicion, Mike Eman e ultimo pasonan di e gobierno aki ta demonstra claramente con definitivamente e actual gobernacion ta bendiendo nos patrimonio nacional na baratiyo. No tin ningun clase di atencion mas pa un desaroyo ekilibra, pa e negoshinan chikito y mediano, pa e calidad di bida di e pueblo Arubano of pa nos medio ambiente.

E plan pa bende Bestuurskantoor ta duna muestra di un falta total di respet pa e nificacion cu e edificio aki ta representa den historia di Aruba. AVP kier mantene Bestuurskantoor y restore como un monumento di nos Status Aparte. Benta di e monumento aki ta habri caminda pa un proyecto hotelero mas, pa un paso mas cerca di masa turismo, un caminda cu Aruba a cana demasiado leu caba. “Nos desaroyo economico mester di mas calidad y no mas kamber di hotel”, Mike Eman a señala.

E plan pa “upgrade” Caya Grandi sin duda ta algo cu mester. Pero, pakico gobierno mester traspasa propiedad huridico na un desarrollador?? Kico ta bai pasa cu e interesnan di e doñonan di tienda cu añanan largo a lucha pa e curazon vibrante di Oranjestad? E berdad ta cu e gobierno aki en absoluto ta invertiendo placa den nos economia, pero ta gasta tur loke cu e tin na gastonan coriente. Traspaso di propiedad di espacionan publico, cayanan y acera na un solo desarroyador ta un acto di desesperacion! Según partido AVP restructuracion di caya grandi mester ta un proyecto di y pa e empresarionan, di y pa e pueblo di Aruba. No un baca di lechi pa un solo desarroyador.

E contruccion di otro hotel parti nort di Marrito ta duna muestra, segun partido AVP, di e desesperacion total di e gobierno aki. Un di e ultimo y poco lugarnan na unda e comunidad Arubano ainda por disfruta di nos naturalesa, di nos santo blanco, ta bai perdi. E ta wordo sacrifica na un otro paso mas den e desaroyo turistico di cua nos isla tin ya caba demasiado di nan. “E moratorio riba construccion di mas kamber di hotel ta parce di a wordo lubida completamente. Aruba no mester mas di e mesun cos. A bira tempo pa nos haya calidad enbes di cantidad”, lider di partido AVP ta comenta.

E actual maneho ta menasando di lo haci Aruba dañonan irreparable. E structura economico, nos medio ambiente y e calidad di bida di e poblacion ta bayendo atras cu pasonan gigantesco. Ya a bira tempo pa nos haya un desaroyo ekilibra cu ta enfoca riba calidad manera AVP a pone den su raport “PlanAruba”. Finanzas publico mester wordo sanea, pa asina tin placa pa e inversionnan necesario. E desaroyo economico mester tene cuenta cu nos medio ambiente, halsa e calidad di bida di nos hendenan y mester respeta e caracter y e simbolonan di e pais aki”, mr. Mike Eman ta termina bisando.