Awe mainta tempran Mike Eman y Benny Sevinger a combersa cu algun piscador desgusta y desapunta. E piscadornan aki ta mara nan boto na e pier dilanti na waf chikito, banda di  unda un tempo tawata mercado di fruta y berdura. E motibo di nan disgusto y desapunto ta e hecho cu Minister Marisol Lopez-Tromp kier kita nan pier y e tereno na banda for di nan.

E piscadornan a splica e delegacion di AVP cu Minister Marisol Lopez-Tromp kier duna un compania priva e derechonan ariba un di e ultimo accesonan pa lama cu piscadornan tin ainda na Playa. E tatanan di famia aki, mayoria di nan di Playa Pa’bou of Rancho, ta hasi uso di e acceso pa lama aki pa decadanan largo caba pa por cria nan famia cu nan trabou. Den periodo di Gabinete Eman III, e pier aki a wordo construi pa asina e piscadornan por mara nan boto den e waf cu tawata birando mas y mas desaroya. Asina e gobierno di e tempo ey kier a segura cu e piscadornan keda cu un pida tereno cu nan por usa.

Un di e piscadornan presente, a conta e delegacion di AVP cu e tin ta piscando for di tempo di segunda guerra mundial. Cu un edad avanza di 79 aña, e piscador aki ainda ta traha dia den dia’fo. E la pisca na varios pais den e region caribense tempo cu e tawata mas hoben y e ta hasi uso di e aera aki pa decadanan caba. E ta splica cu e ta haya masha oncorrecto mes cu e uso di aera aki por jega su fin di e manera aki. Hopi piscador ta, sea, usa e pier pa mara boto, baha of saca nan boto for di den awa.

Hopi di e piscadornan a splica cu nan no por compronde kiko e gobierno aki tin contra piscadornan. E pier aki, banda di ta un lugar di mara boto di e piscadornan di Rancho, e piscadornan cu ta mara nan boto na Hadicurari tambe ta hasi uso di dje. “E piscadoronan di Hadicurari ta mara nan boto aki ora cu tin mal tempo. E proteccion cu e waf aki ta ofrece ta importante pa e piscadornan ey tambe.” E proteccion aki ta pa motibo cu e waf ta den un boca cu ta protehe e botonan for di e olanan grandi cu mal tempo por trece.

E piscadornan a sigui splica e parlamentarionan di AVP cu e trabou cu nan ta hasi ta uno hopi duro y pisa, pero ta jena nan cu hopi orguyo ora nan por trece e fruto di nan trabou aden. E pier ta nan pida refugio di lama y tambe nan lugar di trabou. Na Aruba no tin mucho lugar mas cu piscadornan por usa pa baha nan boto den lama y mara boto y pio ainda den cercania di Playa. E lugarnan ta birando menos cada dia y e manera cu e gobierno aki ta desalohando jiunan di tera pa favorece esnan “generoso” of “bondadoso” financieramente ta birando dia pa dia mas preocupante. Pio ainda si constata cu e arogancia di e mandatarionan di MEP ta birando mas y mas grandi, pasobra e opinion di pueblo no ta conta pa nada mas.

Mike Eman y Benny Sevinger a duna e piscadornan nan sosten y a splicanan cu nan lo hasi tur loke ta nan alcanse pa evita cu nan perde nan lugar di mara boto: nan lugar di trabou. Pisadornan ta hasi un trabou importante pa nos pueblo y tambe pa nos turismo. E piscanan cu e piscadornan aki ta trece aden, tambe ta wordo cumpra pa restaurantnan den e vecindario. Di otro banda e turista mes tambe ta aprecia e bista cu e piscadornan y e pier ta ofrece. E pida Aruba autentico cu ainda ta existi mei mei di tur e desaroyo turistico den e area. Durante di e bishita di e parlamentarionan di AVP, por a mira varios turista admira e bista di e piscadornan ta baha y te hasta limpia nan pisca.

E vocero di e piscadornan, sr. Clifford Rosa, a splica e parlamentarionan di AVP cu nan a entrega un peticion pa e piscadornan por maneha e area pa nan mes. Esaki, segun Sr. Rosa, ta pa segura nan existencia y tambe proteha parti di nos cultura Arubiano. Loke ta hasi e situacion aki mas intresante, pero tambe preocupante, ta e hecho cu e peticion aki a wordo entrega prome cu e peticion di e compania “The Pier N.V.” Clifford Rosa a sigui conta cu e mes ta un hoben cu kier sigui cu e ofishi bunita aki, pero cu e susedidonan aki ta descurasha tanto e mes, pero tambe e otro piscadornan.

Segun Benny Sevinger e desaroyonan aki ta inacceptabel. Pasobra e comerciante aki ta haya beach, e pier y te hasta e lama! Mas preocupante den e asunto aki ta e hecho cu ni’un dia Minister Marisol Lopez-Tromp a sinta cu e piscadornan ariba e asunto aki. Ta tristo cu e piscadornan mester tende algo cu lo afectanan grandemente den nan trabou di tur dia den corant y radio. “Aki poco dia tur e propiedadnan aki ta di un miyonario”, segun Sr. Sevinger.

Segun Mike Eman e problema aki ta parti di un desaroyo cu nos a bin ta riparando e ultimo añanan mas y mas. E desaroyo economico no tin ni pia ni cabes. No tin un vision ariba unda e partido di gobierno kier hiba nos isla. E gobierno di MEP ta gobernando di un manera “ad-hoc”. No tin vision y no tin un meta comun pa e pueblo. Projectonan cu tin ta projectonan cu ta aparece nan dilanti y si ta di hendenan “bondadoso” of “generoso” financieramente pa campaña politico, e ta wordo aproba.

Na final Mike Eman y Benny Sevinger a hasi un recorido di e area pa papia cu esnan den vecindario y tende nan preocupacionan. E asunto aki no por keda ariba e rumbo cu e ta bayendo. Desaroyo di nos economia mester ta un cu vision y no djies desaroya pa bisa cu a desaroya. Desaroyo responsabel ta rekeri planifiacion, vision y responsabilidad. E Minister encarga cu e entrega di e pier aki na un compania priva no tin ni e desencia pa dialoga cu e piscadornan y aparentemente tampoco un vision pa e sociedad aki. E arogancia di, y adiccion pa poder di e gobierno ta birando determinante pa e degeneracion y desintegracion di nos sociedad.

Partido AVP kier trece un cambio den e manera di maneha nos asuntonan. Pesey mes banda di traha pa y busca solucionan pa e pueblo, e partido ta instrui su hala cientifico FESCA pa hasi investigacionan ariba diferente di e topiconan cu ta afecta e pueblo. Esaki ta algo hopi importante pa e partido, pasobra cu AVP ta kere den un desaroyo conciente y responsabel.