Comision na Defensa di Patrimonio di Waf Chikito pa Piscadornan a jama un reunion di informacion pa piscadornan di Rancho y tambe tur piscador di Aruba. Tambe nan a hasi un apelacion na comunidad di Rancho pa asisti na e reunion aki. Meta di e reunion tawata ta pa informa piscadornan di Rancho ariba e situacion di e pier na waf chikito di Playa.

Un otro meta di e reunion ta pa jega na algun palabracion entre e piscadornan en general. Palabracion ariba con mester continua cu e lucha pa preserva e ultimo pida waf cu ta accesibel na piscadornan den Playa. Majoria di e piscador di Playa Pa'bou (pa no bisa tur), ta hasi uso di e facilidad aki pa hopi tempo caba. Algun di e piscadornan aki tin decadanan ta hasiendo uso di e area aki pa mara nan boto y/of bende nan pisca.

E reunion a wordo jama pa 7'or di anochi y a tuma lugar na cas di Carlito Quandt kende ta un piscador di Rancho y cu tambe, hunto cu su primo, a traha e boto cu nan ta usa pa nan trabou.
Pa 7'or ja e publico presente a conglomera y e piscadornan por a mira cu nan ta conta cu un sosten grandi. E ora cu a stipula pa cuminsa e reunion,

por a tuma nota di presencia di e comerciante cu kier haya e pier, beach y lama di waf chikito pa su compania. Esaki a causa un poco consternacion, pero e la wordo ricibi amicalmente pa e piscadornan presente y tambe pa representantenan di AVP, Sr. Mike Eman y Sr. Benny Sevinger.

Segun e comerciante, e lo kier a dialoga ariba e asunto cu e piscadornan. E comision, hunto cu representantenan di AVP a retira pa dialoga cu sr. Neme ariba e asunto aki. Den e reunion aki, sr. Neme a trece padilanti cu, una bes a haya e propiedadnan bou di su maneho, e lo hasi tur lo posibel pa laga e piscadornan hasi uso di e pier sin ningun problema. E comision na su turno a presenta sr. Neme cu un documento caminda cu ta bisa cu sr. Neme ta compromete su mes pa esaki por escrito. Lamentablemente, segun sr. Neme, e no por hasi e promesa aki por escrito.

		Discurso di: Nadeis Reyes
		Parti: 1
		2:34 min (2.36 MB) - MP3
		Augustus 22, 2007

E reunion a cuminsa cu un discurso di Nadeis Reyes (mihor conosi como ex-lider di sindicato U.P.A.). Sr. Reyes a duna un discurso hopi emocionante y cu hopi nostalgia a relata hopi di e historia di Rancho y e waf di Playa.El a sigui introduciendo e situacion cu e piscadornan ta aden. Tambe Sr. Reyes ta lamenta cu e sindicalistanan awendia no ta hasi nan trabou manera debe ser.

		Discurso di: Nadeis Reyes
		Parti: 2
		2:34 min (2.36 MB) - MP3
		Augustus 22, 2007

Sr. Reyes ta puntra su mes ta kiko gobierno ta spera cu e piscadornan mester di hasi sin un pier. Pesey mes tambe Nadeis Reyes ta splica e motibo cu nan a instala un comision cu ta bay sali na vanguardia di tur piscadornan pa asina e situacion aki no ripiti su mes. Sr. Reyes a splica, cu e no ta tuma sr. Morris Neme na malo, pero e ta culpa esunan cu kier duna sr. Neme e propiedad di pueblo aki y e ta splica tambe cu nan (e piscadornan di Rancho) no tey pa kima nada, si no nan ta djies para pa nan derecho.

E siguiente persona cu a tuma e microfoon tawata e vocero di e piscadornan di Rancho, sr. Clifford Rosa. Sr. Rosa a papia ariba varios aspecto di e problema y a mustra tambe cu danki na Mike Eman y Benny Sevinger nan a haya un "Wake-up Call". E hecho aki lo a bay dilanti sin cu e piscadornan haya sa, si no tawata pa e dos representantenan aki di pueblo.

Sr. Rosa a papia tambe di otro partinan di Playa Pa'bou cu a bay perdi, manera "Mambo Beach" y Bushiri cu awe ta un ruina. Segun Sr. Rosa nan tin un plan elabora con pa rescata y reviva Waf Chikito of e area cu jama "Shoenerhaven".

		Discurso di: Clifford Rosa
		Parti: 1
		2:34 min (2.36 MB) - MP3
		Augustus 22, 2007

Manera cu e piscadornan a trece den medionan di prensa siman pasa, Sr. Rosa ta mustra cu e siman aki, durante e mal tempo, e waf chikito tawata jen di boto cu a bin mara for di otro partinan di Aruba. Esaki pa motibo cu e proteccion di lama bruto cu "Shoenerhaven" ta ofrece. Pa tende e discurso usa e siguiente link.

		Discurso di: Representante di Piscadornan di Noord
		Parti: 1
		2:34 min (2.36 MB) - MP3
		Augustus 22, 2007

Prome cu e e reunion e piscadornan di Rancho a haya un mensahe di sosten for di entre otro Sr. Carion cu ta representa e piscadornan di Spaans Lagoen. y tambe e piscadornan di Hadicurari.
E siguiente orador ta un persona cu no ta un piscador di Rancho, pero ta representante di piscadornan di Noord. E tambe a tuma e microfoon pa splica loke ta nan posicion y kiko nan ta trahando ariba dje.

		Discurso di: Carlito Quandt
		Parti: 1
		2:34 min (2.36 MB) - MP3
		Augustus 22, 2007

E siguiente orador cu tawata hopi breve, tawata e anfitrion di e reunion, Sr. Carlito Quandt. Hunto cu su primo cu ta su tocayo, Sr. Quandt a traha un boto di pisacador. E boto aki ta sali cada pasa un dia pa pisca y ta un ehempel di con importante e pier ta pa e piscadornan di Rancho.

Na final di e reunion a trece padilanti un serie di desicionan cu a wordo accepta pa e publico. Click aki pa e resolucionan.

Cu e resolucionan, e reunion a caba y por a wak atras na un anochi intresante. Ora cu sr. Neme a drenta e sitio di e reunion, e speransa a lanta cu e lo por ta dispuesto pa entrega loke e piscadornan no kier perde. Lastimamente ta parce cu e gobierno aki ta accede tur beneficio na esnan cu ta sostene nan partido den temponan di campanja, pero pa pueblo, specialmente e pueblo di Rancho no ta posibel cu e homber chikito por haya loke ta di dje.