Hopi ta e cuidadanonan ku den e ultimo simanan y dianan ku ta jenando of laga jena nan formulario di inkomstebelasting 2006, por a tuma nota ku e interes personal ku nan a paga na un banco of otro, ya no ta completamente deducible mas for di nan onzuiver inkomen of mehor dicho entrada.

Promer ku 2004 tur cuidadano pagador di belasting por a deduci for di su entrada tur su interesnan personal paga na un banco of otro completamente. Por a tuma nota ku pa anja 2006 ta solamente e suma di 5 mil florin por wordo deduci for di entrada anual. Berdad ya pa various anja ta stipula den e ley di inkomstenbelasting ku e maximo ku por declara na interes ta 5 mil florin. Pero Gobierno bao Gabinete Eman nunca a ehecuta e ley aki, mirando ku mayoria di nos hendenan ta hasi prestamonan y ta pagando interesnan ku ta surpasa e suma aki.

Pero Gobierno actual si tin e curashi di ehecuta e ley aki pa asina atrobe indirectamente hinka man den saco di nos concuidadanonan. Mayoria di nos hendenan ta paga hopi mas ku 5 mil florin na interes debi ku entre otro; ta hasi prestamonan pa asina manda placa pa nan juinan ku ta studiando den exterior, ta hasi prestamonan pa cubri gastonan di medico den exterior, pa drecha un cas etc.etc.. Pero ku e positivismo ku e interes halto ku nan ta paga por wordo deduci for di nan entrada y consequentemente por hanja placa bek di belasting.

Un ehempel si un persona pa anja 2006 a paga 9 mil florin na interes, 4 mil ta bay gewoon perdi debi ku ta 5 mil so e por declara y consequentemente ta hanja menos plaka di belasting bek. Encambio si e la declara e 9 mil completo e lo a hanja mas plaka di belasting bek. Pero awor e diferencia ku e mester a hanja Gobierno ta esun ku ta keda ku ne pa sigui ku e derochamiento di plaka, manera ku e ta bin ta hasiendo pa e ultimo 6 anjan ku ta nos tras. Kiermeen aki claramente pueblo por sinti, ora ku nan aanslag inkomstenbelasting pa anja 2006 wordo regla, e medida ku Gobierno a impone sin ku pueblo na promer instante a tuma nota di dje.