Den e trabao di sirbidor di pueblo bo ta haya hopi retonan, obstaculo y contratiemponan grandi cu bo tin cu supera pa por sirbi bo pueblo y bo pais dignamente.

Atakenan y critica ta un di contratiemponan cu bo tin cu supera. No riba tur bo kier of por responde sin sacrifica e energia y dedicacion cu bo ta duna na e labor di sirbi bo comunidad. Sinembargo ora e critica ta dirigi meramente riba e norma y valornan cu bo kier conserva pa nos comunidad y ta bin di un persona, un famia y un empresa cu ta sinti su mes ofendi e no ta husto pa laga un impresion no intenciona cologa.

Nos partido AVP y mi persona ta opone fuertemente, cu alma y curpa contra di decisionan cu ultimamente gobierno ta tuma pa sacrifica patrimonionan di pueblo, manera ta nos Waf Grandi, Waf Chiquito, Caya Grandi, Bestuurskantoor di Aruba, Parlamento di Aruba y Oficina di Gobernador di Aruba.

No ta cuestion di Sr. Eduardo de Veer of Meta Corporation. Porcierto nos y ami ta respeta e lugar importante cu, trahando duro, nan a aclansa den nos sociedad. Nos ta orguyoso cu vision, maneho y labor di gobernacionnan di nos partido na momento trancendental den historia di Aruba a juda crea e facilidadnan, incentivonan y e synergia pa e progreso importante aki a tuma lugar. Awe, cu un Plan integral pa Aruba nos ta mira tambe un rol importante den futuro pa entrepenuernan manera Sr. de Veer y Meta Corporation pa futuro di Aruba, mescos cu nos ta mira esaki pa hopi otro negoshi grandi, mediano y chiquito cu ta juda carga cu labor duro y honesto e ecomia di nos pais. Esaki no ta ningun momento na discusion y nunca lo ta tampoco.

Locual nos di AVP hunto cu pueblo ta bringando fuertemente ta pa edificionan manera Bestuurskatoor y Parlamento cu ta forma parti di nos herencia cultural y ta monumentonan cu ta representa nos historia keda patrimonio di nos pais. Riba esaki nos ta tende cu si Sr. de Veer no cumpra otro lo cumpra. Esaki pa nos no ta argumento. Nos no kier pa patrimonionan aki worde bendi cu ningun hende. Pa nos ser como hende, cu vinculonan na e bida y historia di e baranca aki, ta importante pa nos tin marconan di referencia, di union y indentidad cu locual ta haci nos un pais, un comunidad, un pueblo cu un historia y un trajecto. Pero tambe pa e mesun comercio e ta importante pa Aruba ta mas cu hotel, casino y shoppingmall. P’bao di brug no ta beneficia na e momento aki cu mas hotel, sigur no a custia di edificionan y sitionan cu ta forma parti di nos historia y identidad nacional.

Tin expresionan cita den e memorandum publica cu mi no a haci. Sinembargo mi kier bisa cu si den mi lucha, nos lucha pa expresa nos postura cu firmesa mi por a mishi cu honor di cualkier persona esey ta leuw di mi intencion, pero si ta mi determinacion pa bringa sin temor pa cualkier repercusion pa para cosnan cu mi sentimientonan profundo pa e pueblo y isla aki ta bisami cu no ta corecto. Den esaki mi ta mira no unicamente un reponsabildad pa interes general di parti di gobernantenan y parlamentarionan pero tambe un responsabildad pa un postura civico na interes di e “buen comun” di parti di empresa y empresarionan den nos pais. Riba esaki mi kier apela ora mi dirigi mi mes na empresarionan y empresanan na Aruba. Tin un putrimento di nos normanan y valornan dor di gobernantenan cu a pone Aruba na benta, porfavor no tuma parti na e degeneracion aki. Por puntra esaki di un comerciante? Den mi bista, porta idealista di un bon comunidad, mi ta spera cu si.

Finalmente, ami si ta kere cu Sr. Eduardo de Veer tin tur autoridad moral pa huzga kico ta mihor pa su progreso y di su empresa. Humildemente mi ta spera cu e por concidimi e derecho di tin como respresentante eligi directamente dor di e pueblo e autoridad y responsbildad moral pa proteha e interes di pueblo y e pais aki, di ta e voz pa esnan cu no tin voz, di kier ta protector di historia di un pais chiquito cu un pueblo orguyoso cu mester worde traspasa pa e generacion cu ta bin despues di nos, di kier mira un Aruba cu un desaroyo equilibra caminda nos ta traha duro riba nos progreso economico na e mesun momento cu nos ta traha duro pa conserva nos bunitesa natural, nos herencianan historico y percura pa un distribucion husto di e bienesnan di nos pais pa un y tur riba nos Aruba dushi tera.