Awe nos por mira cu, Colegio Arubano, un scol masha importante pa Aruba, un biaha mas ta wordo laga un banda. E mesun scol cu nos minister di enseñanza a bay, pa e por a traha un fundeshi solido, pa por a sigui studia na hulanda y pa awe e portin e titulo di drs dilanti su nomber. Esaki ta loke mi mester conclui ora mi mira cuanto problema Colegio Arubano ta confrontando. Di banda di minister mi no ta mira ni interes, corda solucion. Den mi consepto e minister aki no tin e derecho, di wordo jama minister di enseñansa, paso si nos wak bon for di dia cu Marisol a bira minister di enseñanza nada bon no a pasa cu nos enseñanza, al contrario dia pa dia e ta birando pio.

E cantidad di studiante na Colegio….

Awe nos por mira con un scol manera Colegio Arubano, ta perdiendo e caracteristicanan, di un scol caminda por tin un contacto optimal entre studiante y maestro y visa versa. Awe Colegio Arubano ta conta cu 32 clas pa loke ta ciclo basico esta un promedio di 900 studiante. Esaki ta solamente ciclo basico sin conta e otro añanan, cura di scol ta wordo jena cu trailer, tin muchanan cu ta cada pasa un siman nan ta haña sierto materianan, paso no tin suficiente “leslokaal” y asina nos por sigui mensiona problemanan cu Colegio Arubano ta enfrentando tur dia.

Solucion!!!!

Mi ta kere cu tur hende cu ta traha directamente cu enseñanza, sa y ta na altura di e diferente plannan cu tabata y ta ariba mesa pa loke ta trata e problematica aki. Caminda ta propone entre otro mas lokalidad 4 of mas ariba Aruba pa e ciclo basico, un otro lokalidad pa Colegio Arubano ciclo avansa y asina mi por sigui menciona. Tur esaki cu e meta principal, pa combati un scol mucho grandi caminda e studiante ta bay perdi den e masa, y cu sigur lo ta mas efektivo. Personalmente mi ta na altura cu e dirigentenan di e scol aki a presenta minister diferente posibel solucion, pero cu minister ta nenga y of ta ignora e posibel solucion nan aki. Tambe mi ta na altura cu e stichting encarga cu e scol aki, a hasta manda un carta pa parlamento di Aruba, algun dia atras. Mirando cu minister mester bin parlamento pa aprobacion di su presupuesto, pa parlamento intermedia pa nan lo por haña solucion pa algun di e problemanan cu nan tin.