Mr. drs. Richard Arends a wordo apunta como presidente di Fundacion Estudionan Social Cristian Aruba (FESCA). El a asumi e puesto cu un agenda ambisioso su dilanti, pero segun sr. Arends, “mi ta cla pa e reto”. Sr. Arends ta asumi e puesto despues cu e la keda vacante ora cu drs. Arjen Alberts a muda pa nos isla ruman, Sint Maarten na aña 2006. Despues di partida di sr. Alberts, e liderazgo di e fundacion a keda den man di e vice-presidente di FESCA, mr. Luciano Milliard. Den e periodo aki e fundacion a sali den busca di un presidente nobo cu por asumi e presidencia di e fundacion, pero tambe tin e experiencia y abilidad pa por lidera e fundacion pa jega na e metanan ambisioso cu nan a pone nan dilanti.

Den e añanan su dilianti, e presidente nobo di FESCA lo ta responsabel pa 9 estudio di vital importancia pa nos pais. E temanan ariba e lista aki ta inclui desaroyo economico, infrastructura, ruimtelijke ordening, desaroyo responsabel di salario. Temanan manera "hubentud y famia", "simplificacion di nos systema di impuesto" y tambe nos "infrastructura social" (sociaal nangnet).

E intencion ta, pa e estudionan aki tuma lugar den un plazo di 2 aña. E proceso pa produci e estudionan aki lo rekeri un colaboracion hopi estrecho entre miembronan di directiva, stakeholdersnan den nos comunidad, colaboradornan cientifico di e fundacion y tambe di “Het Wetenschappelijk Instituut” (WI) di CDA na Hulanda. E ultimo aki ta un surgi di un colaboracion estrecho cu a cuminsa for di algun aña caba.

FESCA ta haya cooperacion di y ta colabora na organisacionan similar den y pafor di nos region. Banda di ta traha estrechamente cu “Het Wetenschappelijk Instituut voor het CDA”, FESCA tambe tin cooperacion estrecho cu e Organisacion Latinoamericano di Partidonan Cristian Cemocrata, O.D.C.A.