Recientemente pueblo por a tuma nota di e conferencia di prensa teni door di Servicio di Impuesto di Aruba y Aduana, na unda esakinan a splica ku pa entrante januari 2008 lo bay implementa e asina jama loonvordering riba salario di esnan ku tin debenan atrasa di belasting door ku pa un of otro motibonan ainda no por a cumpli ku e deber aki. Hecho ta ku enberdad Gobierno por hasi esaki via e ley di invordering pa asina logra hanja locual pueblo debe na dje, esta Gobierno. Hopi ta e cuidadanonan pa motibo di e situacion financiero malo ku nan ta aden, ta hanja nan mes obliga pa eherce un of mas side-jobsnan pa asina por cumpli ku nan debernan financiero mensualmente. Nos no mester lubida ku den e ultimo 6 anjanan ku ta tras di lomba e poder di compra di nos cuidadanonan a bay atras ku mas di 19%, debi na tur e medidanan ku Gobierno a implementa den e ultimo 6 anjanan di entre otro aumento riba legesnan, extracto di registro civil, permisonan etc. Tin di esakinan ku mas di 500%. Otro medidanan ta aumento di invoerrechten riba casi tur producto di uso diario, aumento di e prima di AZV, introduccion di BBO etc.etc.Kiermeen aki pueblo por deduci con e poder di compra a bay atras. Ta pesey mes manera mi a indica ta cu ta un necesidad enorme pa hopi tatanan di famia fuera di nan trabao diario, banda di esaki tin un otro trabao. Consequentia di esaki ta ku door ku nan tin mas ku un entrada, ta hanjanan confronta ku e situacion di mester paga hopi mas belasting, debi na e sistema cumulativo ku e ley di inkomstenbelasting ta stipula. Anto pa es personana aki mi ta pone man na curason ora ku entrante proximo anja Gobierno lo bay implementa e Loonvordering riba nan salario, na unda ku 1/3 parti di nan entrada lo wordo kita automaticamente por medio di nan donjo di trabao. Hopi ta esnan ku kier cumpli pero debi na nan situacion finaciero malo no por hasi esaki. Ta di spera ku Gobiern por medio di su Belastingdienst jega na un solucion hopi mas comprensivo y no sin mas jega impone e retencion di 1/3 parti di e sueldo, principalmente esnan di salario minimo.

Di otro banda mescos ku Gobierno ta bay exigi locual ku e tin derecho riba dje, Gobierno tambe mester cumpli ku e pueblo, esta na esnan ku Gobierno debe nan. Aki mi ta referi ku tin cuidadanonan ku ainda nan no a ricibi nan aanslagnan di inkomstenbelasting di anjanan atras na unda ku Gobierno ta esun ku debe nan. Hopi inhusto lo ta si por ejempel un persona ku su aanslag inkomstenbelasting di anja 2005 ainda no a wordo geregeld, esta stipula na unda ku e tin derecho di hanja plaka bek. Anto e mesun persona aki tin un p.e. erfpacht of grondbelasting pa paga. Pueblo, imaginabo ku Gobierno entrante januari proximo lo bay pone un loonvordering riba sueldo di e persona aki, siendo ku Gobierno tambe debe e mes un persona aki.

Y ora e persona aki acudi na Belastingdienst indicando ku Gobierno tambe debe plaka di inkomstenbelasting 2005, ta hanja notificacion ku e no por exigi de inmediato pa regla su inkomstenbelasting pasobra Belastingdienst tin su procedura ku e tin di mantene su mes na dje. Kiermeen ku Gobierno si por impone cu man duro riba e persona aki pero e cuidadano si no por hasi esaki y tin ku sinta man cruza pagando e debe ku e tin, sino toch un loonvordering lo wordo ehecuta contra su persona por medio di su donjo di trabao.

Berdad ku pueblo tin di cumpli ku su debernan pa ku Gobierno, pero Gobierno tambe na su turno mester cumpli ku e pueblo. Mi ta spera ku Gobierno por medio di su Belastingdienst cumpli ku e asina jama “Fair play beginsel”.