Gabinete Oduber 4 ta sigui duna contenido na e lema: Nos Por Mas. Despues di resultado di eleccion 2005, Prome Minister Oduber a declara cu frustracion di a mira Mep bai atrás den asiento y cu partido MEP a lubida ariba esnan pober y esnan di menos recurso durante gobernacion di Gabinete Oduber 3. Corto tempo después di a forma Gabinete Oduber 4, e ministernan den un forma abusivo a bin ta saca placa for di budget di cada famia door di introdusi un serie di medida nan cu tin gran parti di e pueblo di Aruba ta grita pa auxilio. Introducción di cada medida a ser respalda sin ningun tipo di piedad of remordimento di parti di e 11 parlamentario nan di MEP cu ta sostene gobierno.

Pio ainda nos por mira cu e Minister di Asuntonan Social, Sra Marisol Lopez Tromp, tambe ta copera y ta consenti cu tur e abusonan cu ta tuma lugar cu esnan di menos recurso. Te ainda nos no por a Minister Lopez Tromp sali na vanguardia di esnan di poco recurso pero alcontrario, e minister tin tur su atencion pa delibera cu miyonarionan asta na su própio cas. E siman aki nos por a obeserva den diferente medionan di comunicación con Departamento di Impuesto, cu autorización di Minister di Finansas y tambe di Prome Minister Nelson Oduber, a anuncia cu entrante 1 di januari 2008 lo cuminsa retene te na un maximo di 30 porciento di e salario, di esnan cu debe diferente sorto di belasting. Esaki tabata tuma lugar solamente cu Inkomstenbelasting, pero entrante januari 2008 esaki lo ser aplica na Erfpacht, Grondbelasting, Winstbelasting y varios otro belasting.

Sigur nos tur tin ta un obligación di paga belasting pero ta depende di e forma cu e wordo cobra si ta humano of no. Gabinete Oduber 4 ta carga e culpabilidad di masacra e budget familiar di varios hogarnan aki na Aruba causando cu hopi mayornan no tin e forma di cumpra e alimentonan di cada dia pa nan yuinan. Na momento cu no por cumpli cu por ehempel pagamento di belasting y hypotheek parew lo bai over na retene te cu 30% di salario y si no por cumpli lo pone beslag caminda cu e cas lo bai na findishi y caminda cu departamento di belasting lo haya su placa y despues e persona lo mester regla cu banco e debe restante cu e tin cu ne. Partido AVP recientemente a bin cu diferente amienda, caminda cu esnan di menos recurso lo por a haya un subsidio extra y asina alivia e situación cu nan ta pasando den dje. Pero tur e amienda nan aki a wordo nenga den parlamento door di e parlamentarionan di Mep cu ta sostene gobierno.

Mirando e introducción di e siguiente medida entrante januari 2008 door di Gabinete Oduber 4 e siguiente pregunta nan ta bay na Minister Di Asuntonan Social, Sra Marisol Lopez Tromp.