Awe a cuminsa tratemento di e presupuesto di Ministerio di Enseñansa, Asuntonan Social y Infrastructura den Parlamento di Aruba. E prome orador pa partido AVP. ing. Mike De Meza, a mustra varios aspecto di e frustracion pa cu e systema di tratemento di presupuesto di e ultimo añanan cu MEP ta den gobierno.

Mike de Meza a cuminsa mustrando ariba e hecho cu ainda (den final di September) ta tratando e presupuesto di e aña aki, esta 2007, y cu mas di 75% di e aña a pasa caba. "E presupuesto aki mester a wordo trata den aña 2006", segun sr. de Meza ta splica. "E ta un berguensa y un desapunto total locual ta pasando pa 6 aña caba cu e tratamento di e presupuesto".

Sr. de Meza a mustra su frustracion ariba e hecho cu, aunke cu ta asina laat cu presupuesto, un parlamentario (di MEP) por disidi pa toch bay parlatino y "pone henter un parlamento, sinta un banda, ta warda un siman largo pa por sigui tratamento di presupuesto."

E manera di traha aki ta uno cu ta pone un y tur puntra kiko ta pasando den seno di MEP. Tin pura pa trata e presupuesto? E contesta di un y tur mester ta: "Claro!" Pesey e pregunta surgi: con por ta, anto, cu un parlamentario ta subi avion y bay Brazil pa un reunion su so. Efectivamente e parlamentario di MEP aki a tene henter e parlamento, gobierno y henter Aruba rehen pa un siman largo!

Segun sr. De Meza, esaki ta un falta di respet pa nos trias politica, esta separacion di poder. Sr. De Meza a sigui splica cu "bo ta mira cu parlamento a bira sub-ordina na gobierno." Sr. De Meza ta lamenta tambe cu tin varios parlamentario den Parlamento cu no ta compronde, ni respeta e separacion di poder den nos sociedad.

E simple hecho cu e parlamentarionan di MEP ta djies aproba tur ley y presupuesto di gobierno ta algo hopi bergonsoso. Pero cu e parlamentarionan aki ta bay mas leu ainda di ni hasi e esfuerzo pa cuestiona algo di loke gobierno ta trece padilanti, ta claramente un falta di respet pa nos pueblo.

Ta mas cu bisto cu e manera di traha aki ta causando cu nos pais ta deteriorando mas y mas. Partido AVP ta condena severamente e tipo di maniobranan aki, pasobra e ta na desventaha di nos pais. Cu e presupuesto ta laat awe, ta simplemente pa motibo di e mal maneho di gabinete Oduber, y en particular e minister president y minister di finanzas.