Dialuna ultimo durante di tratamento di presupuesto di Minister Marisol Lopez-Tromp, fraccion di AVP a entrega un mocion cu lo a segura e piscadornan di Waf Chikito di Playa loke nan tin na e momentonan aki. E mocion lo tawata un proteccion pa e piscadornan si e planan di e comerciante (sr. Neme) sigui manera cu e tin intencion. Adicionalmente e mocion aki lo a protehe e piscadornan tambe for di e carta cu e comerciante a haya for di Minister Marisol Lopez-Tromp. Den e carta, Sra. Lopez-Tromp, ta duna e comerciante e opcion pa apodera su mes di e pier, incluyendo e awa y e beach banda di dje. Mas leu ainda, e comerciante aki tin den su poder un otro carta di A.P.A. N.V. (cu ta resorta bou di Minister Briesen) cu tambe ta diacuerdo cu planan di sr. Neme. Den un entrevista cu varios medionan di prensa, sr. Neme a segura cu e tin mas documentacion cu lo segura su compania (The Pier N.V.) e opcion ariba propiedadnan na Schoenerhaven, of manera e ta conosi den pueblo, Waf Chikito di Playa.

Pa partido AVP, ta totalmente inacceptabel, cu un comerciante por apodera su mes di un pier cu pa generacionan a wordo utilisa pa piscadornan.. E pier aki, banda di ta fuente di entrada pa hopi famia di Rancho y vecindario, tambe ta forma parti integral di e caracter historico di e bario di Rancho y e pueblo humilde y noble di e piscadornan en general. Banda di tur e hechonan aki, mester remarca tabe cu Waf Chikito ta un di e ultimo lugarnan cu botonan di piscador por busca refugio durante di mal tempo. Como cu e waf ta protehi naturalmente pa e rif y e structura di e waf mes, hopi piscador di tur parti di Aruba, ta usa e waf aki pa e proteccion cu e ta ofrece.

Mirando tur e hechonan aki, partido AVP ta kere cu ta hopi importante pa parlamento duna e piscadornan e proteccion cu nan merece y nan mester. Mirando cu e comerciante ta segura cu e tin mas documentacion, ta hopi importante pa e piscadornan ta bon prepara y cu sosten di parlamento.

E mocion di fraccion di AVP a pidi lo siguiente:

E mocion a wordo sosteni pa tur fraccion den parlamento, cu excepcion notable di e fraccion di MEP. E ta un desapunto pa tuma nota di e hecho cu partido MEP ta laga piscadornan na caya y ta habri caminda pa comerciantenan por hasi y deshasi cu propiedad di pueblo. E ta birando mas y mas evidente cu patrimonio di pueblo no ta algo cu fraccion di MEP, ni gobierno di MEP ta considera sagrado. E ultimo 6 añanan a wordo caracterisa pa dunamento indiscriminadamente di terenonan na hendenan cu simplemente tawata contribuidor di campaña politico of campañadornan, sin importa cu e terenonan ta forma parti di herencia social y historico di nos pais.

Partido AVP ta lamenta e actitud aki di fraccion di MEP y ta hasi un apelacion na un y tur cu tin nos pueblo, nos historia y herencia na pecho, pa tuma nota di tur e abusonan di poder aki, pasobra nos historia y herencia no ta na venta! Patrimonio di pais Aruba no tin prijs.