For di dia 19 pa 21 di September 2007 ta tuma lugar na Roma, Italia e top di lidernan cristian democrata internacional cu ta afilia cu e organisacion internacional di Cristianan Democrata, IDC. Lider di AVP, mr. Mike Eman lo tey hunto cu e lidernan di partidonan cristian democrata di rond di mundo. E instituto prestigioso IDC a worde presidi entre otro pa ex Presidente di Spanja, Jose Maria Aznar. Durante e cumbre na Roma lo eligi un Presidente y Vice-Presidente nobo di IDC. Actualmente e organisacion ta worde presidi dor di Pier Ferdinando Casini cu tabata Presidente di e Parlamento di Italia.

E reunion na Roma ta den un session special di IDC caminda e lidernan di e partidonan cristian democrata lo topa pa intercambia pensamentonan riba desaroyonan internacional y nacional den luz di crea un mihor calidad di bida den tur e paisnan caminda partidonan cristian democrata ta activo politicamente. E promer session ta cuminsa cu pre-reunionan di e lidernan di diferente continente.

Diarason 19 di September e lidernan di partidonan cristian democrata di America ta topa den un pre-reunion pa stipula e puntonan di prioridad cu cual lo atende e top di IDC. E reunion di tur lidernan hunto lo tuma lugar Diahuebes 20 di September. E reunion lo habri cu informe di Presidente actual di IDC, Pier Ferdinando Casini y e Secretario Ehecutivo. Parti hopi importante di e cumbre aki ta e discussion y aprobacion di e Documento Ideologico y eleccion di e Presidente y Vice Presidente nobo di IDC.

Lider di AVP, mr. Mike Eman den un corto tempo cu e ta den politica a haya un lugar hopi prominente y respeta entre e lidernan cristian democrata den mundo. Tanto cu lidernan cristian democrata di Europa como di America mr. Mike Eman a desaroya un relacion cu a cosecha hopi respet, admiracion y amistad. Di lider cristian democrata Presidente Felipe Calderon (PAN) na Mexico pa Promer Minister Jan Peter Balkenende (CDA) di Hulanda e lider di AVP, mr. Mike Eman, apesar di ta bini di un isla chiquito, a gana respet y simpatia pa su pensamentonan firmemente ancra den e principionan social-cristian. E mundo cristian democrata ta admira y respeta e forma con mr. Mike Eman a desaroya relacionnan internacional den e mundo cristian democrata cu e ta pone na servicio na mehora y profundisa e plataforma politico di su partido y ta juda na desaroya y forma e dirigentenan politico pa futuro. E vision global cu Eman tin pa su isla buscando relacionan mas grandi manera lasonan special cu Union Europeo ta indicacion di un lider cu miras cu ta cruza frontera. Mr. Mike Eman su conviccion cu mester tin un bon balance entre e desaroyo economico y esun social humanitario ta hacie un politico cristian democrata y di centro cu ta practica e fundamentonan di e ideologia di centro cu ta pone e ser humano, su famia, su bario, su comunidad central.

Durante e top di cristianan democrata na Roma lo tin tambe un programa protocolario cu ta inclui recepción na e Palacio del Quirinale ofreci dor di Presidente di Republica Italiano, Presidente Giorgio Napolitano.

Pa mas informacion, bishita e siguiente link: