Mike de Meza, Parlamentario di partido AVP a expresa cu Mininister President Nelson Oduber a haya confirmacion cu su Gobierno no tin un maneho di eneregia y su Gobierno a falta di duna atencion na e problema mundial di energia cu ta afectando e pueblo di Aruba tambe.

Na Aruba pueblo ta testigo cu tin un Gobierno cu no tabata realiza e urgencia y seriedad cu mester tin pa atende cu e problema di costo halto di energia. No cabe duda cu e problema aki no ta di un caracter cortico y sigur no ta asina cu e problema aki ta uno simplistico. Mundialmente tur pais ta uni forza pa ta mihor prepara y sigura di un continuo suministro di fuente pa genera energia riba un costo cu mas control cu ta posibel. Esaki ta trece un variedad di discusion cune. E discusionnan aki ta necesario y mester inclui tur persona, gremio y Gobierno.

Aki de Meza a duna algun ehempel, caminda tin discusionnan fuerte riba entrada di companianan di utilidad; reparticion di ganashi dor di duna rebaho den prijs di awa y coriente; haci un “Detailed Operational Audit” den companianan di utilidad; construccion di proyectonan grandi, interesante y inovativo pa hasi uso di “Deep Sea Cooling”; programa di energia caminda ta hasi uso di fuentenan di energia por ehempel: Solo, Biento, Awa di lama y otro fuentenan alternativo pa combustibelnan. Den e ultimo reunion di diabierna den Parlamento pueblo di Aruba por a bin nota cu Prome Ministro sr. Nel Oduber ta di acuerdo cu e gran candidad di alternativa pa yuda cu solucionan a corto plazo, mediano y largo plazo cu AVP a presenta aña pasa. Awe partido AVP su precupacion ta si e Gobierno actual lo sa di hasi bon uso di un proceso transparente, bon conseha pa hasi e cambionan necesario den companianan di utilidad y no pa bai hasi politica. Macaco ta hunga, huña y humiya su yiu y na fin e ta saca su wowo tambe! Haci cambionan descabeya den e companianan no lo controbui na nada bon pa ni nos pueblo ni e companianan estatal.

“Locual ta precupa nos ta cu te dia di awe Gobierno actual no a presenta un maneho riba energia, sin enbargo e precupacion pa cu e crisis mundial di energia ta uno hopi serio y cu mester su debido atencion”, de Meza a duna di conoce.